કર્ણાટકના બાગલકોટ જિલ્લામાં શેરડીના ખેડૂતોનો ભાવ વધારાની માંગણી સાથે ચાલી રહેલો વિરોધ ગુરુવારે હિંસક બની ગયો હતો, જેના કારણે વિસ્તારમાં અંધાધૂંધી સર્જાઈ હતી. મુધોલની ગોદાવરી સુગર્સ ફેક્ટરીની અંદર જ શેરડી ભરેલા 100થી વધુ ટ્રેક્ટરોને આગ ચાંપી દેવામાં આવી હતી. દૃશ્યો અને પ્રારંભિક અહેવાલો મુજબ, ફેક્ટરીની અંદર લાઈનબંધ ઊભેલા ટ્રેક્ટરો ધુમાડાના ગોટેગોટા સાથે સળગી રહ્યા હતા, અને 2 મોટરસાઈકલને પણ આગ લગાડવામાં આવી હતી. ઘટનાસ્થળે હાજર પોલીસ કર્મચારીઓ સંખ્યામાં ઓછા હોવાથી જિલ્લા વહીવટીતંત્રને પરિસ્થિતિ પર નિયંત્રણ મેળવવામાં મુશ્કેલી પડી રહી હતી. પોલીસ અધિક્ષક સિદ્ધાર્થ ગોયલ પરિસ્થિતિને કાબૂમાં લેવા માટે હાજર રહ્યા હતા.
પોલીસ અધિકારીઓની હાજરીમાં હિંસા આચરી
જોકે, ખેડૂત નેતા સુભાષ શિરાબુરે ખેડૂતો દ્વારા આગચંપીના કૃત્યનો સખત ઈનકાર કર્યો છે. તેમણે આક્ષેપ કર્યો કે, "ફેક્ટરી સાથે જોડાયેલા" લોકોએ પોલીસ અધિકારીઓની હાજરીમાં જ આ હિંસા આચરી છે. તેમણે દાવો કર્યો કે, હુમલાખોરોએ પોલીસ વાહનો અને ખેડૂતોને નિશાન બનાવ્યા હતા, અને ફેક્ટરીની અંદર લાગેલી આગ "ખેડૂતોની છબી ખરાબ કરવાના ઈરાદાથી જાણી જોઈને" લગાડવામાં આવી હતી.
ખેડૂતો શેરડીના પ્રતિ ટન 3,500ના ભાવની કરી માંગ&nbsp;
આ ઘટના શેરડીના ખેડૂતો અને સરકાર વચ્ચે ચાલી રહેલા લાંબા સમયના ગજગ્રાહ વચ્ચે બની છે. મુધોલના ખેડૂતો શેરડીના પ્રતિ ટન 3,500ના ભાવની માંગ કરી રહ્યા છે અને ગત સપ્તાહે બેલગાવીના ખેડૂતો દ્વારા સ્વીકારવામાં આવેલા 3,300ના સુધારેલા ભાવને સ્વીકારવાનો ઈનકાર કરી રહ્યા છે. આ પહેલા, સેંકડો પ્રદર્શનકારીઓએ સંગોલ્લી રાયન્ના સર્કલથી એક વિશાળ ટ્રેક્ટર અને બળદગાડા રેલીનું આયોજન કર્યું હતું, જેમાં ઓટો-રિક્ષાઓ પણ જોડાઈ હતી અને ન્યાયી ભાવની માંગ સાથે મુધોલ શહેર ગુંજી ઉઠ્યું હતું.
તાત્કાલિક અસરથી કલમ 144 લાદવામાં આવી
પરિસ્થિતિને પુનઃસ્થાપિત કરવા માટે, ડેપ્યુટી કમિશનર સંગપ્પા દ્વારા જામખંડી, રબકાવી-બનાહટ્ટી અને મુધોલ તાલુકાઓમાં તાત્કાલિક અસરથી ક્રિમિનલ પ્રોસિજર કોડની કલમ 144 હેઠળ પ્રતિબંધક આદેશો લાદવામાં આવ્યા છે. વિજયપુરા, બેલગાવી અને પડોશી જિલ્લાઓમાંથી પણ વધારાના પોલીસ દળોને સાવચેતીના પગલાં તરીકે ગતિશી કરવામાં આવી રહ્યા છે.

ખેડૂતોનો વિરોધ બન્યો હિંસક

ગોદાવરી સુગર્સ ફેક્ટરી ખાતે શેરડીના ખેડૂતોનો વિરોધ હિંસક બન્યો

November 14, 2025 | 20:07 IST