નોઈડા ઈન્ટરનેશનલ એરપોર્ટ પર ટ્રાયલ લેન્ડિંગ સફળ, વોટર કેનનની સલામી

ઉત્તર પ્રદેશના ગ્રેટર નોઈડામાં નોઈડા ઈન્ટરનેશનલ એરપોર્ટ પર સોમવારે બપોરે લગભગ 1.30 વાગ્યે ફ્લાઈટનું પ્રથમ વખત ટ્રાયલ લેન્ડિંગ થયું અને ટ્રાયલ રન સફળ રહ્યો. દિલ્હીથી આવી રહેલી ફ્લાઈટને વોટર કેનનથી સલામી આપવામાં આવી હતી. આ ટ્રાયલ રન 15 ડિસેમ્બર સુધી ચાલુ રહેશે. પ્લેનમાં ક્રૂ મેમ્બર્સ, એરપોર્ટ ઓથોરિટી ઓફ ઈન્ડિયા અને એરપોર્ટનો ટેક્નિકલ સ્ટાફ હાજર હતો. તેમનું કામ ટેકઓફથી લઈને લેન્ડ સુધીનો સંપૂર્ણ ટેકનિકલ ડેટા એકત્રિત કરવાનું છે.

પ્લેન પ્રથમ વખત નોઈડા ઈન્ટરનેશનલ એરપોર્ટ પર લેન્ડ થયું છે. આ દરમિયાન નાગરિક ઉડ્ડયન મંત્રી કિંજરાપુ રામ મનોહર નાયડુ ઘટનાસ્થળે હાજર હતા. તેમની સાથે નોઈડા પોલીસ કમિશનર લક્ષ્મી સિંહ પણ કાર્યક્રમની સુરક્ષાને લઈને સતર્ક રહ્યા હતા. આ દરમિયાન ધારાસભ્યો, સાંસદો, ડીજીસીએના અધિકારીઓ સ્થળ પર હાજર હતા.

મળતી માહિતી મુજબ રનવે પર ટ્રાયલ દરમિયાન પ્લેન 15 મિનિટ સુધી હવામાં ઉડ્યું હતું, ત્યારબાદ તે નોઈડા ઈન્ટરનેશનલ એરપોર્ટના રનવે પર લેન્ડ થયું હતું અને 5 મિનિટ પછી પ્લેને ફરીથી ટેકઓફ કર્યું હતું. જેવરમાં એરપોર્ટના રનવે પર ઉતરતી વખતે પ્લેનમાં ક્રૂ મેમ્બર્સ અને એરપોર્ટ ઓથોરિટી ઓફ ઈન્ડિયા અને નોઈડા ઈન્ટરનેશનલ એરપોર્ટના ટેકનિકલ સ્ટાફ હાજર હતા. તેમનું કામ ડેટા એકત્રિત કરવાનું છે. આ ડેટા ડાયરેક્ટર જનરલ ઓફ સિવિલ એવિએશન (DGCA)ને મોકલવામાં આવશે. એવું માનવામાં આવે છે કે એપ્રિલમાં અહીંથી પહેલી કોમર્શિયલ ફ્લાઈટ ટેકઓફ થશે.

તમને જણાવી દઈએ કે અત્યાર સુધીમાં એરપોર્ટનું 85 ટકા કામ પૂર્ણ થઈ ગયું છે. CAT-1 અને CAT-3 ઇન્સ્ટ્રુમેન્ટ્સ ઇન્સ્ટોલ કરવામાં આવ્યા છે જે એરક્રાફ્ટની ઊંચાઈ અને ધુમ્મસમાં દૃશ્યતા વિશે માહિતી આપે છે. એરપોર્ટ પર ઇન્સ્ટ્રુમેન્ટ લેન્ડિંગ સિસ્ટમ (ILS) લગાવવામાં આવી છે. જેની તપાસ 10 થી 14 ઓક્ટોબર દરમિયાન વિમાન બીચ કિંગ એર 360 ER દ્વારા કરવામાં આવી છે. આ રનવેની લંબાઈ 3900 મીટર છે.

ઉલ્લેખનીય છે કે 1334 હેક્ટરમાં બની રહેલા આ એરપોર્ટના પ્રથમ તબક્કાનું 80 ટકા કામ પૂર્ણ થઈ ગયું છે. જોકે, આ આખું એરપોર્ટ 6 હજાર 500 હેક્ટરમાં ચાર તબક્કામાં બનાવવામાં આવશે. જેમાં 29 હજાર 650 કરોડ રૂપિયા ખર્ચવામાં આવશે . પ્રથમ તબક્કાના નિર્માણ પાછળ રૂ. 10,056 કરોડનો ખર્ચ થશે. અત્યાર સુધીમાં લગભગ 8 હજાર કરોડ રૂપિયા ખર્ચાઈ ચૂક્યા છે. કોમર્શિયલ ફ્લાઇટ ઓપરેશન્સ માટે, કંપનીઓ એરોડ્રોમ લાયસન્સ માટે સિવિલ એવિએશનના ડિરેક્ટરને અરજી કરશે, જે 15 ડિસેમ્બર પછી કરવામાં આવશે અને લાઇસન્સ મહત્તમ 90 દિવસમાં પ્રાપ્ત થશે.

પ્રથમ તબક્કાના કાર્ય પ્રગતિ અહેવાલમાં કહેવામાં આવ્યું હતું કે 3.9 કિમી રનવેનું કામ 100 ટકા પૂર્ણ થઈ ગયું છે. તેમજ ટર્મિનલ બિલ્ડીંગનું કામ એક મહિનામાં પૂર્ણ કરવામાં આવશે. ટર્મિનલ બિલ્ડિંગમાં રૂફ ફિનિશિંગનું કામ ચાલી રહ્યું છે. તે પૂર્ણ થતાની સાથે જ ટર્મિનલ બિલ્ડીંગમાં વિવિધ પ્રકારના સાધનો અને સેટઅપ લગાવવામાં આવી રહ્યા છે. 38 મીટર ઉંચો એર ટ્રાફિક કંટ્રોલ ટાવર તૈયાર છે.

આ એરપોર્ટનું નિર્માણ સ્વિસ કંપની ઝ્યુરિચ ઈન્ટરનેશનલ દ્વારા કરવામાં આવી રહ્યું છે. કંપની આ એરપોર્ટને 40 વર્ષ સુધી ચલાવશે. પ્રથમ તબક્કાની ક્ષમતા 1.2 કરોડ મુસાફરોની છે. 17 એપ્રિલથી દરરોજ 65 ફ્લાઇટ્સ ઉડશે. 62 ડોમેસ્ટિક ફ્લાઈટ્સ હશે. બે આંતરરાષ્ટ્રીય ફ્લાઇટ અને એક કાર્ગો ફ્લાઇટ હશે. પૂર્ણ થયા બાદ તે એશિયાનું ચોથું સૌથી મોટું એરપોર્ટ બનશે.

—IANS