રાજકોટના જસદણમાં એક અત્યંત સંવેદનશીલ અને બનાવ સામે આવ્યો છે, જ્યાં ગંગા ભુવન વિસ્તારમાં આવેલા પ્રમુખ પાર્કના અવાવરૂ ભાગેથી નવજાત શિશુ મળી આવ્યું હતું. આસપાસના રહેવાસીઓએ લગભગ 2 કલાક સુધી સતત રડવાનો અવાજ સાંભળ્યો હતો, જેના કારણે વિસ્તારમાં ચિંતાનો માહોલ છવાયો હતો.&nbsp;
સૌ કોઈની આંખમાં આંસુ આવી ગયા
સૌપ્રથમ તો લોકોને અવાજ ક્યાંથી આવી રહ્યો છે તેની સમજ પડતી ન હતી, પરંતુ થોડા લોકો ભેગા થઈને જ્યારે અવાવરૂ જગ્યામાં પહોંચ્યા ત્યારે તેમણે જોયું કે,એક નવજાત શિશુ કાંટાની વાડમાં પડેલું છે અને મદદ માટે રડી રહ્યું છે. આ દૃશ્ય એટલું કરુણ હતું કે, જોનારા સૌ કોઈની આંખમાં આંસુ આવી ગયા હતા અને તેઓ તાત્કાલિક મદદ માટે દોડી આવ્યા હતા.
આ પણ વાંચો: <a href="https://www.benefitnews24.com/gujarati/gujarat/godhra-s-tragic-discovery-newborn-s-mutilated-body-found-in-river-/12804" target="_blank" rel="noopener">Godhra માં અમાનવીય કૃત્ય: જંગલી પ્રાણીઓનો ભોગ બનેલા નવજાત શિશુનો મૃતદેહ મળ્યો!</a>
સિવિલ હોસ્પિટલ ખાતે સારવાર માટે ખસેડ્યા
આ બનાવની જાણ તરત જ જસદણ પોલીસ અને 108ને કરવામાં આવી હતી. બન્ને ટીમો ઘટનાસ્થળે પહોંચી અને નવજાત શિશુને તાત્કાલિક જસદણ સિવિલ હોસ્પિટલ ખાતે સારવાર માટે ખસેડવામાં આવ્યું. જસદણ સિવિલ હોસ્પિટલમાં ડૉક્ટરોએ બાળકને પ્રાથમિક સારવાર આપી, પરંતુ તેની હાલત ગંભીર જણાતા, વધુ અને સઘન સારવાર માટે બાળકને 108 એમ્બ્યુલન્સ મારફતે રાજકોટ સિવિલ હોસ્પિટલ ખસેડવામાં આવ્યું છે, જ્યાં હાલ તેની સારવાર ચાલુ છે.
જસદણના સ્થાનિકોમાં ભારે રોષ
આ નિર્દયતાભર્યા કૃત્યથી જસદણના સ્થાનિકોમાં ભારે રોષ જોવા મળી રહ્યો છે. લોકો એવી ઉગ્ર માંગ કરી રહ્યા છે કે, ક્યા નરાધમે આ રીતે નવજાત શિશુને કાંટાની વાડમાં ફેંકી દીધું, તેની સામે કડક પગલાં લેવાવા જોઈએ. જસદણ પોલીસે ઘટના અંગે ગુનો નોંધીને તપાસ હાથ ધરી છે અને આ ક્રૂર કૃત્ય કરનાર વ્યક્તિને શોધવાના પ્રયાસો શરૂ કર્યા છે.

જસદણમાં પ્રમુખ પાર્ક પાસે કાંટાની વાડમાં તરછોડાયેલું  નવજાત શિશુ મળ્યું

November 18, 2025 | 20:08 IST