પંજાબ પોલીસે બિશ્નોઈ ગેંગના 2 સાગરીત ઝડપી પાડ્યા

પંજાબની એન્ટી-ગેંગસ્ટર ટાસ્ક ફોર્સ (AGTF) એ SAS નગર પોલીસ સાથે મળીને એક મોટું ઓપરેશન પાર પાડ્યું છે. સંયુક્ત ઓપરેશન દરમિયાન, પોલીસે વિદેશી બેઝ પરથી કાર્યરત ગેંગસ્ટર ગોલ્ડી ઢિલ્લોન (જે લોરેન્સ બિશ્નોઈ ગેંગ સાથે સંકળાયેલો છે) ના બે સહયોગીઓની ધરપકડ કરી છે. ધરપકડ કરાયેલા આરોપીઓની ઓળખ શરણજીત સિંહ અને અમન કુમાર તરીકે થઈ છે.

અંબાલા-ડેરાબાસી હાઇવે પર એન્કાઉન્ટર

આ ઓપરેશન અંબાલા-ડેરાબાસી હાઇવે પર ઘગ્ગર બ્રિજ પાસે થયું હતું. પંજાબના ડીજીપી ગૌરવ યાદવે ઇન્સ્ટાગ્રામ પર આ અંગે માહિતી આપતા જણાવ્યું હતું કે, પોલીસ અને આરોપીઓ વચ્ચે એન્કાઉન્ટર થયું હતું. બે આરોપીઓએ ભાગવાનો પ્રયાસ કરતી વખતે પોલીસ પર ગોળીબાર કર્યો હતો, જેના જવાબમાં પોલીસે પણ ફાયરિંગ કર્યું હતું અને આરોપીઓ ઘાયલ થયા હતા.

ઘટનાસ્થળેથી પોલીસને બે .32-કેલિબર પિસ્તોલ અને 10 જીવંત કારતૂસ મળી આવ્યા છે. પ્રારંભિક તપાસમાં જાણવા મળ્યું છે કે આ બે માણસોને ગોલ્ડી ઢિલ્લોન દ્વારા તાજેતરના રાજપુરા ગોળીબારમાં સામેલ કર્યા હતા અને તેમને પંજાબના એક વેપારીને નિશાન બનાવવાનું કામ સોંપવામાં આવ્યું હતું.

 લોરેન્સ બિશ્નોઈનું ગુજરાત કનેક્શન

અહીં એ પણ નોંધવું જરૂરી છે કે, આતંકવાદી અને ગેંગસ્ટર ગતિવિધિઓ માટે ચર્ચામાં રહેલા મુખ્ય ગેંગસ્ટર લોરેન્સ બિશ્નોઈ હાલ ગુજરાતની સાબરમતી જેલમાં બંધ છે.  અગાઉ ગુજરાત એટીએસ (ATS) દ્વારા લોરેન્સ બિશ્નોઈ ગેંગ સાથે સંકળાયેલા કેટલાક આરોપીઓની ધરપકડ કરવામાં આવી હતી, જેઓ ગુજરાતમાં છુપાયેલા હતા અને વિવિધ ગેરકાયદેસર પ્રવૃત્તિઓમાં સંડોવાયેલા હતા. આ પ્રકારના નેટવર્કના પર્દાફાશથી સ્પષ્ટ થાય છે કે ગેંગસ્ટર નેટવર્ક પંજાબ ઉપરાંત અન્ય રાજ્યો, ખાસ કરીને ગુજરાત, સુધી પણ વિસ્તરેલું છે અને તેઓ વિદેશી બેઝ પરથી ઓપરેટ થઈ રહ્યા છે.

ડીજીપી યાદવે અંતમાં ભારપૂર્વક જણાવ્યું હતું કે, "પંજાબ પોલીસ ગેંગસ્ટર નેટવર્કને તોડી પાડવા અને સમગ્ર પંજાબમાં શાંતિ અને સુરક્ષા સુનિશ્ચિત કરવાના તેના મિશનમાં કટિબદ્ધ છે."