દિલ્હીમાં પ્રદૂષણ સામે ચાલતા વિરોધ પ્રદર્શન દરમિયાન એક ચોંકાવનારી ઘટના સામે આવી છે. ઈન્ડિયા ગેટ નજીક ચાલી રહેલા આ દેખાવમાં પ્રદર્શનકારોએ પોલીસને વિખેરવાના પ્રયાસ દરમિયાન પેપર સ્પ્રેથી હુમલો કર્યો હતો. આ હુમલામાં અનેક પોલીસકર્મીઓ ઘાયલ થયા છે. ખાસ વાત એ છે કે કેટલાક પ્રદર્શનકારોએ તાજેતરમાં માર્યા ગયેલા નક્સલી કમાન્ડર માડવી હિડમાના સમર્થનમાં સૂત્રોચ્ચાર કરતા પરિસ્થિતિ વધુ તંગ બની ગઈ હતી.
બેરિકેડ તોડીને રસ્તા પર બેસી ગયા પ્રદર્શનકારો :&nbsp;
દિલ્હીની અત્યંત ખરાબ હવા ગુણવત્તા સામે કડક પગલાં લેવા માંગતા પ્રદર્શનકારો ઈન્ડિયા ગેટના સી-હેક્સાગોન વિસ્તારમાં ભેગા થયા હતા. પોલીસ દ્વારા તેમને સમજાવાયું હતું કે પાછળ અનેક એમ્બ્યુલન્સ અને ડોકટરો ફસાયેલા છે અને માર્ગ ખાલી કરવો જરૂરી છે.
જો કે, પ્રદર્શનકારો ઉશ્કેરાઈ ગયા અને બેરિકેડ તોડી રસ્તા પર બેસી ગયા હતા.&nbsp; પોલીસે પરિસ્થિતિ કાબૂમાં લેવા આગળ વધતા જ કેટલાક લોકોએ પોલીસકર્મીઓ પર પેપર સ્પ્રેનો ઉપયોગ કર્યો. આ હુમલામાં 3 થી 4 પોલીસકર્મીઓ ઘાયલ થયા અને તેમની સારવાર ચાલુ છે.
પોલીસ અધિકારીઓએ ઘટના અસામાન્ય ગણાવી :&nbsp;
ડેપ્યુટી પોલીસ કમિશનર દેવેશ કુમાર મહાલાએ જણાવ્યું કે આવી પ્રકારની હિંસક હરકત પહેલીવાર જોવા મળી છે. તેમણે ઘટનાને અત્યંત અસામાન્ય ગણાવી અને પ્રદર્શનકારોનો હેતુ શંકાસ્પદ હોવાનું જણાવ્યું.
નક્સલી કમાન્ડરના સમર્થનમાં સૂત્રોચ્ચાર :&nbsp;
પોલીસનું કહેવું છે કે પ્રદૂષણ મુદ્દે ભેગા થયેલા કેટલાક લોકો નક્સલી કમાન્ડર માડવી હિડમાના સમર્થનમાં સૂત્રોચ્ચાર કરી રહ્યા હતા, જેના કારણે પ્રદર્શનનો એજન્ડા ક્યાંક બીજી દિશામાં વળી ગયો હોય તેવી શંકા ઊભી થઈ છે.
દિલ્હીમાં વધતું પ્રદૂષણ અને હિંસક વિરોધ હવે રાજધાનીની કાયદો અને વ્યવસ્થાની સ્થિતિ અંગે ગંભીર પ્રશ્નો ઉભા કરી રહ્યા છે.

દિલ્હી પ્રદર્શન પેપર સ્પ્રે હુમલો

ઈન્ડિયા ગેટ પાસે પ્રદૂષણ વિરોધ દરમિયાન બેરિકેડ તોડાયા અને પોલીસ પર પેપર સ્પ્રેનો હુમલો

November 24, 2025 | 15:23 IST