નેતાજી ક્યારેય Comfort Zone ના બંધનમાં નથી બંધાયા, PM મોદીએ કહી મોટી વાત

PM નરેન્દ્ર મોદીએ ગુરુવારે લોકોને 'વિકસિત ભારત' ના સંકલ્પને પૂર્ણ કરવા માટે એકજૂટ રહેવાનું આહ્વાન કર્યું હતું અને દેશને નબળો પાડવા અને તેની એકતાને તોડવાનો પ્રયાસ કરતી શક્તિઓ સામે ચેતવણી પણ આપી હતી. મહાન સ્વાતંત્ર્ય સેનાની નેતાજી સુભાષ ચંદ્ર બોઝની જન્મજયંતિ નિમિત્તે ઓડિશાના કટકમાં આયોજિત પરાક્રમ દિવસ કાર્યક્રમને એક વીડિયો સંદેશ દ્વારા સંબોધતા મોદીએ કહ્યું કે નેતાજીનું જીવન લોકો માટે સતત પ્રેરણાનો સ્ત્રોત છે.

PM મોદીએ કહ્યું કે, નેતાજીએ કમ્ફર્ટ ઝોન છોડવાનું પસંદ કર્યું અને દેશની આઝાદી માટે લડવાનું પસંદ કર્યું. તેમણે કહ્યું, “નેતાજી સુભાષ કમ્ફર્ટ ઝોનથી બંધાયેલા ન હતા. એ જ રીતે, આજે આપણે બધાએ વિકસિત ભારતનું નિર્માણ કરવા માટે આપણા કમ્ફર્ટ ઝોનમાંથી બહાર આવવું પડશે. આપણે આપણી જાતને વિશ્વમાં શ્રેષ્ઠ બનાવવી પડશે અને શ્રેષ્ઠતા પસંદ કરવી પડશે, કાર્યક્ષમતા પર ધ્યાન કેન્દ્રિત કરવું પડશે.”

શું કહ્યું PM મોદીએ?

તેમણે કહ્યું કે, નેતાજીએ દેશની આઝાદી માટે આઝાદ હિંદ ફોજની રચના કરી હતી અને તેમાં દેશના દરેક ક્ષેત્ર અને દરેક વર્ગના લોકો સામેલ હતા, જેમની ભાષા અલગ-અલગ હતી પરંતુ લાગણી એક હતી અને તે દેશની આઝાદી હતી. તેમણે કહ્યું, “આ એકતા આજે વિકસિત ભારત માટે પણ એક મોટો પાઠ છે. ત્યારે આપણે સ્વરાજ માટે એક થવું પડ્યું, આજે આપણે વિકસિત ભારત માટે એક થવું પડશે.

PM મોદીએ કહ્યું કે, ભારતની એકતા માટે લોકોએ બોઝના જીવનમાંથી પ્રેરણા લેવી જોઈએ. તેમણે વધુમાં કહ્યું, "આપણે એવા લોકોથી સાવધ રહેવું જોઈએ જેઓ દેશને નબળો પાડવા અને તેની એકતાને તોડવા માંગે છે." તેમણે બોસના નામ પર આંદામાનના ટાપુઓનું નામકરણ અને ઈન્ડિયા ગેટ પર તેમની પ્રતિમા સ્થાપિત કરવા અને તેમની જન્મજયંતિને 'પરાક્રમ દિવસ' તરીકે ઉજવવા સહિતના અનેક નિર્ણયોનો ઉલ્લેખ કર્યો અને કહ્યું કે નેતાજીને ભારતની ધરોહર પર ખૂબ ગર્વ હતો. PM મોદીએ કહ્યું કે વિકાસની ઝડપી ગતિ લોકોની પ્રગતિ, સશસ્ત્ર દળોની તાકાત અને સર્વાંગી વિકાસ સાથે સાથે ચાલે છે.

'ભારતનો અવાજ બુલંદ થઈ રહ્યો છે'

તેમણે કહ્યું કે, છેલ્લા એક દાયકામાં 25 કરોડ ભારતીયોને ગરીબીમાંથી બહાર કાઢવામાં આવ્યા છે જે એક મોટી સફળતા છે. તેમણે કહ્યું કે આજે ગામ હોય કે શહેર, દરેક જગ્યાએ આધુનિક ઈન્ફ્રાસ્ટ્રક્ચરનું નિર્માણ થઈ રહ્યું છે અને ભારતીય સેનાની તાકાતમાં પણ અભૂતપૂર્વ વધારો થયો છે. મોદીએ કહ્યું કે, વિશ્વ મંચ પર ભારતની ભૂમિકા વધી રહી છે અને ભારતનો અવાજ બુલંદ બની રહ્યો છે. તેમણે કહ્યું, "તે દિવસ દૂર નથી જ્યારે ભારત વિશ્વની ત્રીજી સૌથી મોટી આર્થિક શક્તિ બની જશે." નેતાજી સુભાષચંદ્ર બોઝની પ્રેરણાથી આપણે 'એક લક્ષ્ય, એક ધ્યેય' સાથે વિકસિત ભારત માટે કામ કરવાનું ચાલુ રાખવું પડશે.