lab to land : કેન્દ્ર સરકારનું મેગા કૃષિ અભિયાન પ્રારંભ, ખેતીને આધુનિક બનાવવા પર PM નો ભાર...

કેન્દ્રની મોદી સરકારે ભારતના કૃષિ ક્ષેત્રમાં ક્રાંતિકારી સુધારા અને વિકાસને વેગ આપવા માટે આજે દેશભરમાં "વિકસિત કૃષિ સંકલ્પ અભિયાન"નો પ્રારંભ કર્યો છે. આ અભિયાનના શુભારંભ પ્રસંગે, PM નરેન્દ્ર મોદીએ ભારતીય કૃષિને વધુ આધુનિક બનાવવા અને તેમાં આધુનિક ટેકનોલોજીનો સમાવેશ કરવા પર ભાર મૂક્યો હતો. તેમણે જણાવ્યું કે, આ અભિયાન અંતર્ગત વૈજ્ઞાનિકોની ટીમ 'લેબ ટુ લેન્ડ' (lab to land) (પ્રયોગશાળાથી ખેતર સુધી) અભિયાનને આગળ વધારી રહી છે.

PM મોદીનું વિઝન...

PM મોદીએ "વિકસિત કૃષિ સંકલ્પ અભિયાન"ના શુભારંભ પર બોલતા કહ્યું કે, "હવે બજાર બદલાઈ રહ્યા છે, ગ્રાહકોની પ્રાથમિકતાઓ પણ બદલાઈ રહી છે. તેથી, અમારો પ્રયાસ છે કે ખેડૂતો અને રાજ્ય સરકારો સાથે મળીને કૃષિ પ્રણાલીઓમાં પરિવર્તન લાવવામાં આવે અને ભારતીય કૃષિને વધુ આધુનિક કેવી રીતે બનાવી શકાય તે અંગે ખેડૂતો સાથે ચર્ચા કરવામાં આવે." તેમણે ભારપૂર્વક જણાવ્યું કે, આ અભિયાન હેઠળ વૈજ્ઞાનિકોની ટીમ 'લેબ ટુ લેન્ડ' (lab to land) અભિયાનને સક્રિયપણે આગળ વધારી રહી છે, જેથી નવીનતમ સંશોધનો સીધા ખેડૂતો સુધી પહોંચી શકે.

વૈજ્ઞાનિક સંશોધન અને પ્રગતિશીલ ખેડૂતોનું સન્માન...

PM એ જણાવ્યું કે, "છેલ્લા દાયકાઓમાં આપણા કૃષિ વૈજ્ઞાનિકોએ અનેક ક્ષેત્રોમાં ઉત્તમ સંશોધનો કર્યા છે અને સારા પરિણામો આપ્યા છે. બીજી તરફ, દેશના પ્રગતિશીલ ખેડૂતો પણ પોતાના પ્રયોગો દ્વારા કૃષિ ક્ષેત્રમાં મોટા પરિવર્તનો લાવ્યા છે. તેમણે ઉત્પાદન વધાર્યું છે અને સફળ પ્રયોગો કર્યા છે." તેમણે ભારપૂર્વક કહ્યું કે, વૈજ્ઞાનિકોના સફળ સંશોધનો અને પ્રગતિશીલ ખેડૂતોના સફળ પ્રયોગોની માહિતી તમામ ખેડૂતો સુધી પહોંચવી ખૂબ જ જરૂરી છે. PM મોદીએ ઉમેર્યું કે, આ દિશામાં શરૂઆતથી જ પ્રયાસો થઈ રહ્યા છે, પરંતુ હવે તેને નવા જોશ સાથે કરવાની જરૂર છે અને "વિકસિત કૃષિ સંકલ્પ અભિયાન" આ માટે ભરપૂર અવસરો પૂરા પાડશે.

દેશભરમાં અભિયાનનો વ્યાપક પ્રસાર...

કેન્દ્ર સરકારે કૃષિ ક્ષેત્રમાં સુધારા અને વિકાસને પ્રોત્સાહન આપવા માટે આજે દેશભરમાં આ અભિયાન શરૂ કર્યું છે. આના દ્વારા ખેડૂતોને આધુનિક કૃષિ તકનીકો, વૈજ્ઞાનિક પદ્ધતિથી ખેતી અને સતત વિકાસની દિશામાં પ્રેરિત કરવામાં આવશે, જેનાથી તેમને પાક ઉત્પાદન ક્ષમતા વધારવામાં મદદ મળશે. આ અભિયાનની ઔપચારિક શરૂઆત ઓડિશાથી કરવામાં આવી હતી.

કૃષિ મંત્રીનો 20 રાજ્યોનો પ્રવાસ...

કેન્દ્રીય કૃષિ મંત્રી આ અભિયાનની ઔપચારિક શરૂઆત ઓડિશાના પુરીથી કરી હતી. પંદર દિવસ સુધી ચાલનારા આ અભિયાન દરમિયાન, કૃષિ મંત્રી 20 રાજ્યોનો પ્રવાસ કરશે. કેન્દ્રીય મંત્રી આ અભિયાન અંતર્ગત 12 જૂન સુધી જમ્મુ, રાજસ્થાન, ગુજરાત, ઉત્તર પ્રદેશ, બિહાર, મહારાષ્ટ્ર, હરિયાણા, પંજાબ, ઉત્તરાખંડ, આસામ, મેઘાલય, કર્ણાટક, તમિલનાડુ, તેલંગાણા, આંધ્ર પ્રદેશ, મધ્ય પ્રદેશ, દિલ્હી અને છત્તીસગઢમાં ખેડૂતો અને વૈજ્ઞાનિકોનો ઉત્સાહ વધારવા માટે તેમની સાથે સીધો સંવાદ કરશે.

1.5 કરોડ ખેડૂતો સુધી પહોંચવાનો લક્ષ્યાંક...

"વિકસિત કૃષિ સંકલ્પ અભિયાન" દરમિયાન, 2170 ટીમો દેશભરના 700 થી વધુ જિલ્લાઓ, 65 હજાર ગામો અને લગભગ દોઢ કરોડ (1.5 કરોડ) ખેડૂતો સુધી પહોંચશે. આ અભિયાન ભારતીય કૃષિ ક્ષેત્રમાં એક નવો યુગ લાવશે તેવી અપેક્ષા છે. શું આ મેગા અભિયાન ખરેખર ખેડૂતોના જીવનમાં વાસ્તવિક પરિવર્તન લાવી શકશે?