વડાપ્રધાન નરેન્દ્ર મોદીએ આજે રવિવારે દિલ્હી મેટ્રોના બે નવા કોરિડોરનું ઉદ્ઘાટન કરીને દેશની રાજધાનીને મોટી ભેટ આપી છે. આ સાથે જ વડાપ્રધાને દિલ્હીમાં ₹33,500 કરોડના વિકાસલક્ષી પ્રોજેક્ટ્સનું લોકાર્પણ અને શિલાન્યાસ પણ કર્યો હતો.
બીજી તરફ, અમદાવાદમાં પણ મેટ્રોના વ્યાપક વિસ્તરણ માટે ફેઝ-3ની તૈયારીઓ શરૂ કરી દેવામાં આવી છે, જેમાં અમદાવાદને પણ પોતાનો 'સર્ક્યુલર રૂટ' મળશે.
દિલ્હી મેટ્રો: પીંક અને મેજેન્ટા લાઇનનું વિસ્તરણ
PM મોદીએ દિલ્હીમાં પીંક લાઇનના મજલિસ પાર્ક-મૌજપુર-બાબરપુર સેક્શન અને મેજેન્ટા લાઇનના દીપાલી ચોક-મજલિસ પાર્ક સ્ટ્રેચનું ઉદ્ઘાટન કર્યું છે. આ ઉદ્ઘાટન સાથે જ દિલ્હીની પીંક લાઇન હવે 71.56 કિલોમીટર લાંબી થઈ ગઈ છે, જે ભારતની પ્રથમ સંપૂર્ણ કાર્યરત 'રિંગ મેટ્રો' બની છે. આ રૂટ ઉત્તર-પૂર્વ અને ઉત્તર-પશ્ચિમ દિલ્હી વચ્ચેની કનેક્ટિવિટીને વધુ મજબૂત બનાવશે.
અમદાવાદ મેટ્રોમાં પણ બનશે સર્ક્યુલર રૂટ
દિલ્હીની જેમ અમદાવાદમાં પણ હવે મેટ્રોના સર્ક્યુલર રૂટની યોજના સાકાર થવા જઈ રહી છે. ગુજરાત મેટ્રો રેલ કોર્પોરેશન (GMRC) એ ફેઝ-3 માટેની પ્રક્રિયા શરૂ કરી દીધી છે. અમદાવાદના ફેઝ-3 ની મુખ્ય વિગતો:
સર્ક્યુલર રૂટ: RTO થી શરૂ થઈને જીવરાજ પાર્ક, નારોલ અને મેમ્કોને જોડતો રિંગ રોડ જેવો સર્ક્યુલર રૂટ બનશે.
નવા વિસ્તારો: મેટ્રો હવે થલતેજ ગામથી આગળ વધીને બોપલ, શીલજ અને ગોધાવી જેવા વિસ્તારો સુધી પહોંચશે.
દિલ્હી મેટ્રો ફેઝ-5(A)નો શિલાન્યાસ
PM મોદીએ દિલ્હીમાં ફેઝ-5(A) હેઠળ ત્રણ નવા કોરિડોરનો શિલાન્યાસ પણ કર્યો હતો. જેમાં સેન્ટ્રલ વિસ્ટા કોરિડોર (રામકૃષ્ણ આશ્રમ માર્ગથી ઇન્દ્રપ્રસ્થ), ગોલ્ડન લાઇનનું એરોસિટી થી એરપોર્ટ ટર્મિનલ-1 સુધીનું વિસ્તરણ અને તુગલકાબાદથી કાલિંદી કુંજ સુધીના રૂટનો સમાવેશ થાય છે. આ પ્રોજેક્ટ્સથી દિલ્હી અને NCR શહેરો જેમ કે નોઈડા અને ફરીદાબાદ વચ્ચેનું અંતર ઘટશે.
અમદાવાદમાં હાલ 62.7 કિમીનું નેટવર્ક કાર્યરત છે અને ફેઝ-3 પૂર્ણ થયા બાદ અમદાવાદ દેશના પાંચ સૌથી મોટા મેટ્રો નેટવર્ક ધરાવતા શહેરોમાં સામેલ થઈ જશે.

દિલ્હી રિંગ મેટ્રો બાદ અમદાવાદમા ફેઝ-3નું આયોજન

પીંક- મેજેન્ટા લાઇનના વિસ્તરણ સાથે દિલ્હીમાં મેટ્રો નેટવર્ક મજબૂત બન્યું, અમદાવાદ પણ સજ્જ.

March 8, 2026 | 17:08 IST