Operation Sindoor ની સફળતા, રક્ષામંત્રી રાજનાથ સિંહ ભુજ એરબેઝની મુલાકાત લેશે

પાકિસ્તાન અને તેના આતંકવાદીઓ સામે ભારતીય સશસ્ત્ર દળોનું ઓપરેશન સિંદૂર (Operation Sindoor) સફળ રહ્યું છે. થોડા જ સમયના હુમલામાં ભારતની સેનાઓએ પાકિસ્તાનને ઘૂંટણિયે લાવી દીધું અને પાકિસ્તાન યુદ્ધવિરામ માટે વિનંતીઓ કરવા લાગ્યું. ત્યારબાદ બંને વચ્ચે યુદ્ધવિરામ થયો છે. આ યુદ્ધવિરામ વચ્ચે હવે સૂત્રોના હવાલાથી મોટી માહિતી સામે આવી છે. માહિતી મુજબ, ભારતના રક્ષામંત્રી રાજનાથ સિંહ શુક્રવારે વાયુસેનાના ભુજ એરબેઝની મુલાકાત લેવા જશે.

રક્ષામંત્રી ભારત-પાક સરહદનો પ્રવાસ કરશે...

સામે આવેલી માહિતી મુજબ, ભારતના રક્ષામંત્રી રાજનાથ સિંહ શુક્રવારે ભુજ પહોંચશે. રક્ષામંત્રી ભુજ એરબેઝની મુલાકાત લેશે. રાજનાથ સિંહની આ યાત્રા બે દિવસીય એટલે કે શુક્રવાર અને શનિવાર માટે રહેશે. માહિતી મુજબ, રક્ષામંત્રી રાજનાથ સિંહ ગુજરાતની ભારત પાકિસ્તાન સરહદનો પ્રવાસ કરશે.

પાકિસ્તાને ભુજમાં ડ્રોન મોકલ્યા હતા...

સૈન્ય તણાવ દરમિયાન પાકિસ્તાની સેનાએ ડ્રોનની મદદથી ભારતના ભુજને નિશાન બનાવવાનો પ્રયાસ કર્યો હતો. જો કે, ભારતના સુરક્ષા દળોએ એર ડિફેન્સ સિસ્ટમની મદદથી એક પછી એક પાકિસ્તાનના હુમલાઓને સતત નિષ્ફળ બનાવ્યા હતા. આખરે કોઈ પણ સફળતા ન મળતા અને સતત સૈન્ય નુકસાનને જોતા પાકિસ્તાને યુદ્ધવિરામની અપીલ કરી હતી.

PM મોદીએ આદમપુરની મુલાકાત લીધી હતી...

આ પહેલા PM મોદીએ પણ મંગળવારે પાકિસ્તાન સાથેની સરહદથી માત્ર 100 કિલોમીટરના અંતરે આવેલા આદમપુર એરબેઝ પર જવાનોને સંબોધિત કર્યા હતા. PM મોદીએ પાકિસ્તાનને ચેતવણી આપતા કડક શબ્દોમાં કહ્યું હતું કે ભારત તરફ નજર ઉઠાવવાનું પરિણામ તબાહી હશે. PM મોદીએ કહ્યું- "આતંક સામે ભારતની લક્ષ્મણ રેખા એકદમ સ્પષ્ટ છે. હવે જો કોઈ આતંકવાદી હુમલો થશે તો ભારત જવાબ આપશે, ચોક્કસ જવાબ આપશે." જણાવી દઈએ કે, પાકિસ્તાની સેનાએ આદમપુર એરબેઝ અને એસ-400 મિસાઈલ લોન્ચરને તબાહ કરવાનો ખોટો દાવો કર્યો હતો. જો કે, PM મોદીએ એરબેઝની મુલાકાત લઈને પાકિસ્તાનના દાવાની પોલ ખોલી નાખી હતી.