થરૂરનું 'સર્જિકલ સ્ટ્રાઈક' નિવેદન, કોંગ્રેસમાં ભડકો, ઉદિત રાજે ગણાવ્યા 'ભાજપના પ્રવક્તા'!

ભારત સરકારે 'ઓપરેશન સિંદૂર'ની સફળતાને વિશ્વ સમક્ષ ઉજાગર કરવા અને પાકિસ્તાન પરથી આતંકવાદનો નકાબ હટાવવા માટે સર્વપક્ષીય પ્રતિનિધિમંડળ વિશ્વના દેશોમાં મોકલ્યું છે. આ પ્રતિનિધિમંડળમાં કોંગ્રેસના વરિષ્ઠ નેતા શશી થરૂરનો સમાવેશ થતા જ રાજકીય ગરમાવો તેજ બન્યો છે. જોકે, પનામામાં એક કાર્યક્રમ દરમિયાન થરૂરે આપેલા વિવાદાસ્પદ નિવેદને કોંગ્રેસ હાઈકમાન્ડમાં ભારે નારાજગી જગાવી છે અને પક્ષમાં આંતરિક કલહ ફરી એકવાર સપાટી પર આવ્યો છે.

થરૂરનું વિવાદાસ્પદ નિવેદન અને કોંગ્રેસની નારાજગી...

શશી થરૂરે પોતાના નિવેદનમાં જણાવ્યું હતું કે, "ભાજપ સરકારમાં પહેલીવાર ક્રોસ-બોર્ડર સર્જિકલ સ્ટ્રાઇક કરવામાં આવી હતી." આ નિવેદનથી રાજકીય વર્તુળોમાં ભારે હોબાળો મચી ગયો છે, કારણ કે કોંગ્રેસ અત્યાર સુધી ભાજપ સરકારના આ દાવાને પડકારતી રહી છે. થરૂરના આ નિવેદનથી કોંગ્રેસ હાઈકમાન્ડ ખુલ્લી રીતે નારાજ થયું છે, કારણ કે તે પક્ષની સ્થાપિત નીતિની વિરુદ્ધ છે.

થરૂરનો ખુલાસો અને આલોચકો પર કટાક્ષ...

વિવાદ વકરતા શશી થરૂરે X (અગાઉ ટ્વિટર) પર પોસ્ટ કરીને સ્પષ્ટતા કરવાનો પ્રયાસ કર્યો હતો. તેમણે કહ્યું કે, તેમણે ફક્ત આતંકવાદી હુમલાઓના જવાબમાં કરાયેલી કાર્યવાહીઓની વાત કરી હતી, યુદ્ધો કે સૈન્ય ઇતિહાસની નહીં. થરૂરે એમ પણ ઉમેર્યું કે તેમની ટિપ્પણી તાજેતરના વર્ષોમાં થયેલા હુમલાઓ પર હતી, જ્યારે ભારતની પ્રતિક્રિયા સંયમિત રહી હતી. જોકે, આ ખુલાસો વિવાદને શાંત પાડવામાં નિષ્ફળ રહ્યો. થરૂરે પોતાના આલોચકો પર કડક કટાક્ષ કરતા કહ્યું કે, તેમની પાસે આવા લોકો માટે સમય નથી અને તેમને તેમના વિચારોને તોડી-મરોડીને રજૂ કરવા સ્વાગત છે.

ઉદિત રાજનો શાબ્દિક હુમલો...

કોંગ્રેસના જ અન્ય નેતા ઉદિત રાજ થરૂરના નિવેદન પર સખ્ત પ્રતિક્રિયા આપતા તેમને "ભાજપના સુપર પ્રવક્તા" ગણાવ્યા છે. ઉદિત રાજે આક્રોશપૂર્ણ શબ્દોમાં કહ્યું કે, "જે વાતો ભાજપના નેતાઓ નથી કહેતા, તે થરૂર કહી રહ્યા છે." આ ટિપ્પણી કોંગ્રેસમાં ચાલી રહેલા આંતરિક ડખ્ખાને સ્પષ્ટપણે દર્શાવે છે, જ્યાં એક નેતા બીજા નેતા પર જાહેરમાં પ્રહાર કરતા અચકાતા નથી. આ સમગ્ર ઘટનાક્રમ દર્શાવે છે કે કોંગ્રેસમાં નેતાઓ વચ્ચે વ્યૂહાત્મક સંકલનનો અભાવ છે અને આંતરિક જૂથબંધી પક્ષને વધુ નબળો પાડી રહી છે. શું કોંગ્રેસ હાઈકમાન્ડ થરૂરના આ નિવેદન પર કોઈ કડક કાર્યવાહી કરશે કે પછી આ વિવાદ પણ સમય સાથે વિસરાઈ જશે તે જોવું રહ્યું.