India Pakistan War : પાકિસ્તાનનું કપટ જગજાહેર, નાગરિક વિમાનોને ઢાલ બનાવી સૈન્ય પર હુમલો...

India Pakistan War : ભારતના સફળ 'ઓપરેશન સિંદૂર'થી ભયભીત પાકિસ્તાની સેનાએ ગુરુવાર રાત્રે ભારતનાં ઉત્તરી અને પશ્ચિમી ક્ષેત્રોમાં અનેક સૈન્ય ઠેકાણાઓ પર ડ્રોન અને મિસાઇલ હુમલાઓ કરવાનો પ્રયાસ કર્યો હતો. જો કે, ભારતે પોતાના S-400 એર ડિફેન્સ સિસ્ટમનો ઉપયોગ કરીને આ હુમલાઓને નિષ્ફળ બનાવી દીધા હતા. આ ઘટનાક્રમ અંગે વિદેશ મંત્રાલય દ્વારા પ્રેસ કોન્ફરન્સ કરીને માહિતી આપવામાં આવી હતી.

ભારતીય સેનાના કર્નલ સોફિયા કુરેશીએ શુક્રવારે જણાવ્યું હતું કે, પ્રાથમિક તપાસમાં પાકિસ્તાની સેના દ્વારા કરવામાં આવેલા હુમલાઓમાં તુર્કીના ડ્રોનનો કાટમાળ મળી આવ્યો છે. કર્નલ કુરેશીએ વધુમાં જણાવ્યું હતું કે, પાકિસ્તાની સેનાએ પશ્ચિમી સરહદો પર 36 સ્થળોએ સૈન્ય સ્થાપનો પર હુમલો કરવાનો પ્રયાસ કર્યો હતો.

પાકિસ્તાને LOC પર ભારે ગોળીબાર કર્યો : કર્નલ સોફિયા કુરેશી

વિદેશ મંત્રાલય દ્વારા સાંજે 5:30 વાગ્યે પ્રેસ બ્રીફિંગ યોજવામાં આવી હતી. આ દરમિયાન વિદેશ સચિવ વિક્રમ મિસરી, કર્નલ સોફિયા કુરેશી અને વિંગ કમાન્ડર વ્યોમિકા સિંહે ઓપરેશન સિંદૂર સંબંધિત નવી માહિતી આપી હતી. કર્નલ સોફિયા કુરેશીએ જણાવ્યું હતું કે પાકિસ્તાને LOC પર ભારે ગોળીબાર કર્યો હતો અને ઘૂસણખોરીનો પ્રયાસ પણ કર્યો હતો. તંગધાર, ઉરી અને ઉધરપુરમાં ભારે ગોળીબાર થયો હતો અને પાકિસ્તાનની ગોળીબારીથી નુકસાન પણ થયું છે. તેમણે તસવીર બતાવતા કહ્યું હતું કે ભારતીય વાયુસેનાએ ભારે સંયમ દાખવ્યો છે.

‘પાકિસ્તાની સેનાએ સૈન્ય માળખાને નિશાન બનાવવાનો પ્રયાસ કર્યો’

કર્નલ સોફિયા કુરેશીએ માહિતી આપતા જણાવ્યું હતું કે, 7 અને 8 મેની રાત્રે પાકિસ્તાની સેનાએ સૈન્ય માળખાને નિશાન બનાવવાના ઇરાદાથી સમગ્ર પશ્ચિમી સરહદ પર અનેક વખત ભારતીય હવાઈ ક્ષેત્રનું ઉલ્લંઘન કર્યું હતું. એટલું જ નહીં, પાકિસ્તાની સેનાએ નિયંત્રણ રેખા પર ભારે કેલિબરના હથિયારોથી પણ ગોળીબાર કર્યો હતો. 36 સ્થળો પર ઘૂસણખોરીના પ્રયાસ માટે લગભગ 300 થી 400 ડ્રોનનો ઉપયોગ કરવામાં આવ્યો હતો. ભારતીય સશસ્ત્ર દળોએ ગતિશીલ અને બિન-ગતિશીલ સાધનોનો ઉપયોગ કરીને આમાંથી ઘણા ડ્રોનને તોડી પાડ્યા હતા. આટલા મોટા પાયે હવાઈ ઘૂસણખોરીનો સંભવિત હેતુ વાયુ સંરક્ષણ પ્રણાલીઓનું પરીક્ષણ કરવાનો અને ગુપ્ત માહિતી એકત્ર કરવાનો હતો. પકડાયેલા ડ્રોનના કાટમાળની ફોરેન્સિક તપાસ ચાલી રહી છે અને શરૂઆતના અહેવાલો સૂચવે છે કે તે તુર્કીના અસિસગાર્ડ સોંગર ડ્રોન છે. કર્નલ કુરેશીએ વધુમાં જણાવ્યું હતું કે, લેહથી લઈને સર ક્રીક સુધી પાકિસ્તાની સેનાએ ઘૂસણખોરી માટે ડ્રોનનો ઉપયોગ કર્યો હતો.

પાકિસ્તાન નાગરિક વિમાનને ઢાલ તરીકે ઉપયોગ કરી રહ્યું છે : વ્યોમિકા સિંહ

ભારતીય વાયુસેનાના વિંગ કમાન્ડર વ્યોમિકા સિંહે જણાવ્યું હતું કે પાકિસ્તાને 7 મેના રોજ રાત્રે 08:30 વાગ્યે એક નિષ્ફળ અને કારણ વગરના ડ્રોન અને મિસાઇલ હુમલાના પ્રયાસ પછી પણ પોતાનું નાગરિક હવાઈ ક્ષેત્ર બંધ કર્યું નથી. પાકિસ્તાન નાગરિક વિમાનને ઢાલ તરીકે ઉપયોગ કરી રહ્યું છે, તે સારી રીતે જાણે છે કે ભારત પરના તેના હુમલાને કારણે દેશ તરફથી ઝડપી હવાઈ સંરક્ષણ પ્રતિસાદ મળશે. આ ભારત અને પાકિસ્તાન વચ્ચેની આંતરરાષ્ટ્રીય સરહદ નજીક ઉડતા આંતરરાષ્ટ્રીય વિમાનો સહિત અજાણ્યા નાગરિક વિમાનો માટે સુરક્ષિત નથી. તેમણે વધુમાં જણાવ્યું હતું કે, અમે હમણાં જ જે સ્ક્રીનશોટ બતાવ્યો છે, તેમાં પંજાબ સેક્ટરમાં ઉચ્ચ વાયુ સંરક્ષણ ચેતવણીની સ્થિતિ દરમિયાન એપ્લિકેશન ફ્લાઇટ રડાર 24 નો ડેટા દર્શાવવામાં આવ્યો છે. તમે જોઈ શકો છો કે અમારી ઘોષિત બંધના કારણે ભારતીય બાજુનું હવાઈ ક્ષેત્ર નાગરિક હવાઈ ટ્રાફિકથી સંપૂર્ણપણે ખાલી છે. જો કે, કરાચી અને લાહોર વચ્ચેના હવાઈ માર્ગ પર નાગરિક વિમાનો ઉડી રહ્યા છે. ભારતીય વાયુસેનાએ પોતાની પ્રતિક્રિયામાં ખૂબ જ સંયમ દાખવ્યો છે, જેનાથી આંતરરાષ્ટ્રીય નાગરિક વાહકોની સુરક્ષા સુનિશ્ચિત થઈ છે.

પાકિસ્તાની સેનાને મોટું નુકસાન થયું : વિક્રમ મિસરી

વિદેશ સચિવ વિક્રમ મિસરીએ પ્રેસ બ્રીફિંગમાં માહિતી આપતા જણાવ્યું હતું કે, પાકિસ્તાને ભારત સામે ઉશ્કેરણીજનક સૈન્ય કાર્યવાહી કરીને કંધાર, ઉરી, પૂંછ, રાજૌરી, અખનૂર અને ઉધમપુર જેવા LOC ને અડીને આવેલા વિસ્તારોમાં ગોળીબાર કર્યો છે. આ હુમલામાં ભારતીય સુરક્ષા દળોને થોડું નુકસાન થયું છે અને જવાનો ઘાયલ પણ થયા છે, જો કે જવાબી કાર્યવાહીમાં પાકિસ્તાની સેનાને પણ મોટું નુકસાન થયું છે. મિસરીએ એમ પણ કહ્યું હતું કે, પાકિસ્તાને ડ્રોન હુમલાનો નિષ્ફળ પ્રયાસ કર્યા પછી પણ પોતાનું નાગરિક હવાઈ ક્ષેત્ર બંધ કર્યું નથી, જે એક ખતરનાક અને ગેરજવાબદાર પગલું છે. તેમણે સ્પષ્ટપણે જણાવ્યું હતું કે, પાકિસ્તાન નાગરિક વિમાનોને ઢાલ તરીકે ઉપયોગ કરી રહ્યું છે, જેનાથી માત્ર પાકિસ્તાન જ નહીં પરંતુ આંતરરાષ્ટ્રીય ફ્લાઇટ્સની સુરક્ષા પણ જોખમમાં મુકાઈ ગઈ છે.

સૈન્ય સ્થાપનોને નિશાન બનાવવાનો પ્રયાસ : વિક્રમ મિસરી

વિદેશ સચિવ વિક્રમ મિસરીએ કહ્યું, ‘પાકિસ્તાન દ્વારા ગુરુવારે રાત્રે કરવામાં આવેલી આ ઉશ્કેરણીજનક અને આક્રમક કાર્યવાહી ભારતીય શહેરો અને નાગરિક માળખા ઉપરાંત સૈન્ય સ્થાપનોને નિશાન બનાવીને કરવામાં આવી હતી. ભારતીય સશસ્ત્ર દળોએ પ્રમાણસર, પર્યાપ્ત અને જવાબદારીપૂર્વક જવાબ આપ્યો. પાકિસ્તાન દ્વારા કરવામાં આવેલા આ હુમલાઓનું પાકિસ્તાની રાજ્ય તંત્ર દ્વારા સત્તાવાર અને સ્પષ્ટપણે હાસ્યાસ્પદ ખંડન તેમના કપટ અને નવી ઊંડાઈનું બીજું ઉદાહરણ છે.’

પાકિસ્તાનનો હાસ્યાસ્પદ દાવો: વિક્રમ મિસરી

વિદેશ સચિવ વિક્રમ મિસરીએ કહ્યું, ‘પોતાની હરકતો સ્વીકારવાને બદલે પાકિસ્તાને આ હાસ્યાસ્પદ અને અપમાનજનક દાવો કર્યો છે કે ભારતીય સશસ્ત્ર દળો અમૃતસર જેવા પોતાના જ શહેરોને નિશાન બનાવી રહ્યા છે અને પાકિસ્તાન પર દોષનો ટોપલો ઢોળવાનો પ્રયાસ કરી રહ્યા છે. તેમના ઇતિહાસ પરથી ખબર પડે છે કે તેઓ આવી હરકતો કરવામાં નિષ્ણાત છે. પાકિસ્તાને ખોટી માહિતી ફેલાવી કે, ભારતે ડ્રોન હુમલા દ્વારા નાનક સાહિબ ગુરુદ્વારાને નિશાન બનાવ્યું, જે તદ્દન જુઠ્ઠાણું છે. પાકિસ્તાન સાંપ્રદાયિક વિવાદ ઊભો કરવાના ઇરાદાથી પરિસ્થિતિને સાંપ્રદાયિક રંગ આપવાનો પૂરો પ્રયાસ કરી રહ્યું છે.’