છેલ્લા 18 મહિનામાં સુરક્ષા દળો દ્વારા દેશભરમાં ચલાવવામાં આવેલા સઘન અને સતત ઓપરેશન્સના પરિણામે, 4 દાયકાથી હથિયારોની તાકાત પર 'ક્રાંતિ'નો દાવો કરનારા નક્સલવાદી જૂથે આખરે હથિયાર હેઠા મૂકી દીધા છે. આ સમયગાળામાં 500થી વધુ માઓવાદીઓ ઠાર થયા છે, જેમાં 13 કેન્દ્રીય સમિતિના ટોચના નેતાઓનો પણ સમાવેશ થાય છે. માત્ર છત્તીસગઢમાં જ બસવ રાજુ, ચલપતિ, સુધાકર અને મોડેમ બાલકૃષ્ણ જેવા અગ્રણી કમાન્ડરો માર્યા ગયા છે, જ્યારે લગભગ 2,000 નક્સલવાદી કેડર અને સમર્થકોએ આત્મસમર્પણ કર્યું છે.&nbsp;
નક્સલવાદી ચળવળના અંતનો સંકેત
આ અભૂતપૂર્વ દબાણના કારણે માઓવાદી સંગઠને પહેલી વાર સત્તાવાર રીતે હથિયાર છોડીને સરકાર સાથે શાંતિ વાર્તા માટે પહેલ કરી છે. આ એક ઐતિહાસિક ઘટના છે, જે નક્સલવાદી ચળવળના અંતનો સંકેત આપી રહી છે. કેન્દ્ર સરકારના નક્સલવાદને ખતમ કરવાના મિશન હેઠળ, સુરક્ષા દળો દ્વારા ચલાવવામાં આવેલા ઓપરેશન્સના પરિણામે માઓવાદી જૂથોના નેતાઓ અને કમાન્ડરોને ભારે નુકસાન થયું છે. આ દબાણ વચ્ચે, 15 ઓગસ્ટ, 2025ના રોજ, માઓવાદી જૂથ તરફથી 'અભય'ના નામથી એક પત્ર મળ્યો, જેમાં તેઓએ સંઘર્ષવિરામની જાહેરાત કરી હતી.
જનતાની સમસ્યાઓનું નિરાકરણ લાવવાની ઈચ્છા
આ પત્રમાં, તેઓએ લોકશાહી પ્રક્રિયામાં જોડાઈને જનતાની સમસ્યાઓનું નિરાકરણ લાવવાની ઈચ્છા વ્યક્ત કરી હતી. સૌથી આશ્ચર્યજનક બાબત એ હતી કે, આ પત્રમાં પ્રથમ વખત સંગઠનના સત્તાવાર ફેસબુક અને ઈ-મેલ એકાઉન્ટ્સની સાથે અભયની તસવીર પણ જાહેર કરવામાં આવી હતી, જે અત્યારસુધી ક્યારેય થયું ન હતું.
આ પણ વાંચો:<a href="https://www.benefitnews24.com/gujarati/crime/maoist-mastermind-with-a-bounty-of-rs-1-crore-surrenders/19290" target="_blank" rel="noopener"> </a><a href="https://www.benefitnews24.com/gujarati/crime/maoist-mastermind-with-a-bounty-of-rs-1-crore-surrenders/19290" target="_blank" rel="noopener">1 કરોડની ઇનામી, મહિલા નક્સલી સુજાતાનું આત્મસમર્પણ</a>
પત્રની સઘન ચકાસણી કરવા નિર્દેશ આપ્યા
આ પગલાથી સુરક્ષા નિષ્ણાતો 2 દ્રષ્ટિકોણથી જોઈ રહ્યા છે, એક તરફ, તેને શાંતિ પ્રક્રિયા તરફનું એક મહત્વપૂર્ણ પગલું ગણવામાં આવે છે, જ્યારે બીજી તરફ, આ ઓળખ જાહેર કરવા પાછળ કોઈ શંકાસ્પદ ઈરાદો પણ હોઈ શકે છે. ગૃહમંત્રી વિજય શર્માએ આ પત્રની સઘન ચકાસણી કરવાના નિર્દેશ આપ્યા છે, કારણ કે આ ઈ-મેલ અને ફેસબુક એકાઉન્ટ સુરક્ષા એજન્સીઓ માટે નક્સલવાદી નેટવર્ક અને તેના હેન્ડલર્સ સુધી પહોંચવાનો માર્ગ બની શકે છે.
હથિયારો સાથે કોઈપણ વાટાઘાટો શક્ય નથી: સરકાર
છેલ્લા 10 મહિનામાં, માઓવાદીઓએ છઠ્ઠી વખત સરકાર સાથે વાતચીત માટે અપીલ કરી છે. જોકે, અગાઉના તમામ પ્રયાસો હિંસા અને સુરક્ષા દળો પરના હુમલાઓને કારણે નિષ્ફળ રહ્યા હતા. સરકારે હંમેશા સ્પષ્ટ કર્યું છે કે, હથિયારો સાથે કોઈપણ પ્રકારની વાટાઘાટો શક્ય નથી. આથી, આ વખતે માઓવાદીઓએ પોતાના પત્રમાં ઉલ્લેખ કર્યો છે કે તેઓ શાંતિ વાર્તા પર સંમત કેડર ઉપરાંત જેલમાં કેદ સભ્યો અને અન્ય રાજ્યોમાં સક્રિય નેતાઓની ભલામણો પર ધ્યાન આપશે. આ માટે તેઓએ એક મહિનાના સંઘર્ષવિરામની માંગ કરી છે જેથી સચોટ અને સાર્થક વાતચીત થઈ શકે.
નક્સલવાદીઓ માટે શાંતિ વાર્તા એકમાત્ર વિકલ્પ
ત્તીસગઢ, મહારાષ્ટ્ર, તેલંગાણા અને ઝારખંડમાં ચાલી રહેલા સંયુક્ત ઓપરેશન્સે માઓવાદીઓના નેટવર્કને મોટા પાયે વિખેરી નાખ્યું છે. જાન્યુઆરી, 2025થી અત્યાર સુધીમાં માત્ર છત્તીસગઢમાં જ 463 માઓવાદી ઠાર થયા છે, અને 13થી વધુ એસઝેડસીએમ સ્તરના નેતાઓનું પણ એન્કાઉન્ટર થયું છે. આ દબાણના કારણે, તાજેતરમાં કેન્દ્રીય માઓવાદી નેતા સુજાતાએ તેલંગાણામાં આત્મસમર્પણ કર્યું, અને મે, 2024માં ગઢચિરોલીમાં 28 માઓવાદી નેતાઓ માર્યા ગયા હતા. આ તમામ પરિબળો દર્શાવે છે કે, સુરક્ષા દળોની કાર્યવાહી નક્સલવાદીઓ માટે શાંતિ વાર્તા કરવાનો એકમાત્ર વિકલ્પ બની રહી છે.

નક્સલવાદીઓનો કર્યો ઠાર

સુરક્ષા દળોની કાર્યવાહી બાદ, 40 વર્ષ જૂના નક્સલવાદી જૂથે હથિયાર છોડીને શાંતિ માટે અપીલ કરી

September 17, 2025 | 22:29 IST