NHAI ટૉલ પ્લાઝા પર પાસની માહિતી પ્રદર્શિત કરશે

નેશનલ હાઈવે ઓથોરિટી ઓફ ઈન્ડિયા (NHAI)એ હાઈવે યુઝર્સ માટે પારદર્શિતા વધારવા અને જાગૃતિ લાવવાના ઉદ્દેશ્ય સાથે એક મહત્વપૂર્ણ નિર્ણય લીધો છે. NHAI હવે તેના કાર્યક્ષેત્ર હેઠળ આવતા તમામ ટૉલ પ્લાઝા પર માસિક અને વાર્ષિક પાસ સંબંધિત વિગતવાર માહિતી પ્રદર્શિત કરશે.

આ પહેલનો મુખ્ય હેતુ એ સુનિશ્ચિત કરવાનો છે કે વાહનચાલકોને 'લોકલ મંથલી પાસ' અને 'વાર્ષિક પાસ'ની ઉપલબ્ધતા, દરો અને તેને મેળવવાની પ્રક્રિયા વિશે સંપૂર્ણ માહિતી મળી રહે.

ક્યાં અને કેવી રીતે પ્રદર્શિત થશે માહિતી?

NHAI એ તેના ફિલ્ડ ઓફિસોને સ્પષ્ટ નિર્દેશ આપ્યા છે કે આ વિગતો સાઇન બોર્ડ પર સ્પષ્ટ દેખાય તે રીતે પ્રદર્શિત કરવામાં આવે. આ માહિતી ટૉલ પ્લાઝાના પ્રવેશ/બહારના પોઈન્ટ્સ, ગ્રાહક સેવા વિસ્તારો અને પ્લાઝાના એપ્રોચ જેવા દેખીતા સ્થળો પર લગાવવામાં આવશે. આ સાઇનબોર્ડ્સ પર અંગ્રેજી, હિન્દી અને સ્થાનિક પ્રાદેશિક ભાષામાં માહિતી દર્શાવવામાં આવશે.

ફિલ્ડ ઓફિસોને 30 દિવસની અંદર આ બોર્ડ લગાવવા અને લાગુ ફી નિયમો અનુસાર દિવસ-રાત સ્પષ્ટ દેખાય તે સુનિશ્ચિત કરવા માટે કહેવામાં આવ્યું છે. આ ઉપરાંત, આ તમામ માહિતી 'રાજમાર્ગયાત્રા' મોબાઇલ એપ્લિકેશન અને NHAIની સંબંધિત પ્રોજેક્ટ વેબસાઇટ્સ પર પણ અપલોડ કરવામાં આવશે.

બે મુખ્ય છૂટછાટ પાસ

NHAI દ્વારા પ્રવાસીઓને મુસાફરી સરળ અને આર્થિક બનાવવા માટે બે મુખ્ય છૂટછાટ પાસ ઉપલબ્ધ છે:

1. લોકલ મંથલી પાસ:

આ પાસ ખાનગી વાહનો ધરાવતા એવા પ્રવાસીઓ માટે છે, જેઓ ટૉલ પ્લાઝાની 20 કિલોમીટરની ત્રિજ્યા (અથવા લાગુ નિયમ મુજબ) માં રહે છે. આ પાસ મેળવવા માટે આધાર કાર્ડ, વાહન રજિસ્ટ્રેશન સર્ટિફિકેટ (RC) અને રહેઠાણના સરનામાનો પુરાવો જેવા જરૂરી દસ્તાવેજો ટૉલ પ્લાઝાના હેલ્પડેસ્ક પર ચકાસણી બાદ ઇશ્યૂ કરવામાં આવે છે.

2. વાર્ષિક પાસ (Annual Pass):

આ સુવિધા માત્ર ખાનગી વાહનો (કાર/જીપ/વાન) માટે ઉપલબ્ધ છે, જેની માન્યતા એક વર્ષ અથવા 200 ટૉલ પ્લાઝા ક્રોસિંગ (બંનેમાંથી જે વહેલું હોય) સુધીની હોય છે. આ પાસ 'રાજમાર્ગયાત્રા એપ' દ્વારા ₹3,000ની એક વખતના ફી ચુકવીને ખરીદી શકાય છે અને તે વાહનના માન્ય FASTag પર ડિજિટલી સક્રિય થાય છે. આ પાસ દેશભરમાં લગભગ 1,150 ટૉલ પ્લાઝા પર માન્ય છે.

NHAIની આ પહેલ યુઝર્સના અનુભવને સુધારવા, મુસાફરીને વધુ આર્થિક બનાવવા અને સમગ્ર દેશમાં ટૉલ સંચાલનમાં પારદર્શિતા વધારવાની તેની પ્રતિબદ્ધતા દર્શાવે છે.