ભારતમાં ટેલિકોમ સેક્ટરની એક ઉચ્ચ સ્તરીય રિવ્યૂ બેઠક બાદ આ પ્રસ્તાવ ચર્ચામાં આવ્યો છે. ટેલિકોમ્યુનિકેશન વિભાગ (DoT) ને એવી સૂચના આપવામાં આવી છે કે તેઓ મોબાઈલ ડેટાના ઉપયોગ પર ટેક્સ લાદવાની શક્યતાઓ અને તેના વિવિધ પાસાઓની ઝીણવટભરી તપાસ કરે. જો આ દરખાસ્ત મંજૂર થશે, તો ઈન્ટરનેટ સર્ફિંગ, વિડિયો સ્ટ્રીમિંગ અને સોશિયલ મીડિયાનો ઉપયોગ મોંઘો સાબિત થશે.
પ્રતિ GB 1 રૂપિયો ટેક્સ લાદવાનું મોડલ :&nbsp;
સૂત્રો પાસેથી મળતી માહિતી મુજબ, સરકાર પ્રતિ 1 GB ડેટા વપરાશ પર 1 રૂપિયો ટેક્સ લાદવાના વિકલ્પ પર વિચાર કરી રહી છે. આ પદ્ધતિ મુજબ, ગ્રાહક જેટલો ડેટા વાપરશે તે મુજબ તેના પર વધારાનો ટેક્સ લાગશે. પ્રાથમિક અંદાજ મુજબ, જો આ 1 રૂપિયાની ફોર્મ્યુલા લાગુ કરવામાં આવે, તો સરકારની તિજોરીમાં દર વર્ષે અંદાજે 22,900 કરોડ રૂપિયાથી વધુની વધારાની આવક થઈ શકે છે. જોકે, આ બાબતે હજુ સુધી કોઈ અંતિમ નિર્ણય લેવાયો નથી.
ભારતમાં વધતો ડેટા વપરાશ અને સસ્તું ઈન્ટરનેટ :&nbsp;
વિશ્વના અન્ય દેશોની સરખામણીએ ભારતમાં મોબાઈલ ડેટાના દરો ખૂબ જ નીચા છે. સસ્તા ઈન્ટરનેટને કારણે દેશમાં વિડિયો સ્ટ્રીમિંગ, ઓનલાઇન ગેમિંગ અને શોર્ટ વિડિયો રીલ્સનો ક્રેઝ વધ્યો છે, પરિણામે ડેટાનો વપરાશ પણ અનેકગણો વધી ગયો છે. સરકાર કદાચ આ વધતા વપરાશને આવકનું સાધન બનાવવા માંગતી હોય તેમ જણાય છે.
GST ઉપરાંત વધારાનો બોજ ?
અત્રે ઉલ્લેખનીય છે કે, હાલમાં ભારતીય યૂઝર્સ મોબાઈલ રિચાર્જ અને પોસ્ટપેડ બિલ પર પહેલેથી જ 18 ટકા GST ચૂકવી રહ્યા છે. જો ડેટા વપરાશ પર અલગથી ટેક્સ લાગશે, તો તે ગ્રાહકો માટે 'ડબલ ટેક્સ' જેવી સ્થિતિ સર્જી શકે છે. ટેલિકોમ વિભાગ હાલમાં આ પ્રસ્તાવના ફાયદા અને ગેરફાયદાનો અભ્યાસ કરી રહ્યો છે. આ રિપોર્ટ રજૂ થયા બાદ જ સરકાર કોઈ સત્તાવાર જાહેરાત કરશે.
સોશિયલ મીડિયા અને રેડિટ જેવા પ્લેટફોર્મ પર આ મુદ્દે અત્યારથી જ ચર્ચાઓ શરૂ થઈ ગઈ છે. જોકે, સરકાર તરફથી હજુ સુધી કોઈ સત્તાવાર નિવેદન જારી કરવામાં આવ્યું નથી. સામાન્ય જનતા માટે આ સમાચાર આંચકા સમાન છે, કારણ કે ડિજિટલ ઈન્ડિયાના યુગમાં ઈન્ટરનેટ હવે જીવનની પ્રાથમિક જરૂરિયાત બની ગયું છે.&nbsp;

મોબાઈલ ડેટા ટેક્સ ભારત

પ્રતિ 1 GB ડેટા વપરાશ પર 1 રૂપિયો ટેક્સ લાદવા સરકારનો વિચાર, મોબાઈલ યૂઝર્સ પર વધશે આર્થિક

March 13, 2026 | 18:12 IST