હિમાચલમાં મેઘતાંડવ: કરોડનું નુકસાન, 126નાં મોત

છેલ્લા કેટલાક વર્ષોથી ચોમાસા દરમિયાન પૂર્વોત્તર રાજ્યો, ખાસ કરીને હિમાચલ પ્રદેશ અને ઉત્તરાખંડમાં, વાદળ ફાટવાની ઘટનાઓમાં સતત વધારો થઈ રહ્યો છે. હાલમાં જ, બુધવારે સાંજે કુલ્લુમાં બે અલગ-અલગ સ્થળોએ વાદળ ફાટવાની ઘટનાઓ નોંધાઈ હતી, જેના કારણે સમગ્ર રાજ્યમાં પૂર અને તબાહીની સ્થિતિ સર્જાઈ છે. આ ઘટનાઓને કારણે બે રાષ્ટ્રીય ધોરીમાર્ગો સહિત રાજ્યના 325 રસ્તાઓ બંધ કરવા પડ્યા છે.

અસહ્ય આર્થિક અને જાનમાલનું નુકસાન

સતત વરસાદને કારણે હિમાચલ પ્રદેશને ભારે આર્થિક નુકસાન થયું છે. અધિકારીઓના જણાવ્યા અનુસાર, 20 જૂનથી શરૂ થયેલા વરસાદમાં અત્યાર સુધીમાં ₹2031 કરોડનું નુકસાન થઈ ચૂક્યું છે. આ ઉપરાંત, જાનમાલનું પણ મોટું નુકસાન થયું છે. આ ચોમાસાની સીઝનમાં અત્યાર સુધી વરસાદ સંબંધિત ઘટનાઓમાં 126 લોકોએ જીવ ગુમાવ્યો છે, જ્યારે 36 લોકો હજુ પણ ગુમ છે.

કુલ્લુ અને શિમલામાં વાદળ ફાટવાની ઘટનાઓ

મળતી માહિતી મુજબ, કુલ્લુમાં નિરમંડ ઉપમંડળની શ્રીખંડ પહાડી અને બંજાર ઉપમંડળની તીર્થન ખીણની બાથાધ પહાડી પર બુધવારે સાંજે વાદળ ફાટ્યું હતું. શ્રીખંડ પહાડીમાં વાદળ ફાટવાને કારણે કુરપન રાવી નદીમાં પૂર આવ્યું હતું અને પ્રશાસને તત્કાળ બાગીપુલ બજાર ખાલી કરાવ્યું હતું. તેવી જ રીતે, બુધવારે રાત્રે શિમલાના રામપુર વિસ્તારના નંટીમાં પણ વાદળ ફાટ્યું, જેના પરિણામે એક પુલ ધરાશાયી થયો. તીર્થન નદી કિનારે બનેલા કેટલાક કોટેજને નુકસાન પહોંચ્યું છે અને અનેક વાહનો પાણીમાં વહી ગયા છે.

કુલ્લુના ડેપ્યુટી કમિશનર તોરલ એસ. રવિશે જણાવ્યું કે, તંત્રની ટીમો તાત્કાલિક ઘટનાસ્થળે પહોંચી ગઈ છે અને નુકસાનનું મૂલ્યાંકન કરવામાં આવી રહ્યું છે. રાહતની વાત એ છે કે, હજુ સુધી આ ઘટનાઓમાં કોઈ જાનહાનિના અહેવાલો નથી.

લાહૌલ-સ્પિતિમાં પણ અસર

લાહૌલ-સ્પિતિ જિલ્લામાં પણ વાદળ ફાટવાની ઘટના નોંધાઈ છે, જેના કારણે બે પુલ ધોવાઈ ગયા છે. કરપટ ગામમાં વધતા જોખમને ધ્યાનમાં રાખીને લોકોને સુરક્ષિત સ્થળોએ ખસેડવામાં આવી રહ્યા છે.

હવામાન વિભાગનું એલર્ટ

સ્થાનિક હવામાન વિભાગ કેન્દ્રએ ચંબા, કાંગડા અને મંડી જિલ્લામાં ગુરુવાર માટે ભારેથી અતિભારે વરસાદ માટે ઓરેન્જ એલર્ટ જાહેર કર્યું છે. આ ઉપરાંત, શુક્રવારથી રવિવાર સુધી ચારથી છ જિલ્લામાં પણ ભારે વરસાદનું એલર્ટ જારી કરવામાં આવ્યું છે. આ એલર્ટને કારણે સ્થાનિકો અને પ્રશાસન બંને એલર્ટ પર છે.