સૈફ પર હુમલો કરનાર વ્યક્તિની ધરપકડ

બોલિવૂડ એક્ટર સૈફ અલી ખાનના ઘર પર હુમલો કરનાર આરોપી ઝડપાઈ ગયો છે. મુંબઈ પોલીસે હુમલાખોરને શનિવારે મોડી રાત્રે થાણેથી પકડી લીધો હતો. આરોપીની ઓળખ મોહમ્મદ અલીયાન ઉર્ફે બીજે તરીકે થઈ છે. પોલીસે થાણેમાં હિરાનંદાની એસ્ટેટ નજીક એક લેબર કેમ્પ પાસેની ઝાડીઓમાંથી આરોપીની ધરપકડ કરી હતી. પોલીસે આરોપીને કસ્ટડીમાં લઈ લીધો છે અને તેની પૂછપરછ કરી રહી છે. જોકે, આરોપી સતત પોતાનું નામ બદલી રહ્યો છે. અત્યાર સુધીમાં, તેણે પોતાના ચાર નામ જાહેર કર્યા છે

 ​​​​​​​સૈફ પર હુમલો કરનારનું અસલી નામ શું છે?

હુમલાખોરના એક કે બે નહીં પણ અનેક નામ છે. અત્યાર સુધી, પોલીસ પૂછપરછ દરમિયાન, તે પોતાનું નામ બિજોય દાસ, વિજય દાસ, મોહમ્મદ ઇલ્યાસ અને બીજે તરીકે જણાવી રહ્યો છે. પોલીસનું કહેવું છે કે આરોપી વારંવાર પોતાનું નામ બદલી રહ્યો છે. સાચું નામ જાણવાના પ્રયાસો ચાલી રહ્યા છે.. 

માહિતી અનુસાર વિજય દાસ એ જ વ્યક્તિ છે જેણે 16 જાન્યુઆરીની રાતે ઘરમાં ઘૂસીને સૈફ પર ચપ્પાથી હુમલા કર્યા હતા. આરોપીની ઓળખ વિજય દાસ તરીકે થઇ છે. પકડાયા બાદ તેણે પોલીસ સામે સ્વીકાર્યું કે મેં જ સૈફ અને કરીનાના ઘરમાં ઘૂસીને હુમલો કર્યો હતો. મુંબઈ પોલીસે હાલ તેની ધરપકડ કરી છે. આરોપી થાણેના રિકી બારમાં હાઉસકીપિંગ વર્કર તરીકે કામ કરતો હતો. 

ઉલ્લેખનીય છે કે સૈફ અલી ખાન પર મોડી રાતે ઘરમાં ઘૂસીને ચપ્પાથી હુમલો કરી દેવામાં આવ્યો હતો. આ હુમલો ચોરીના ઈરાદે કરાયો હોવાનો દાવો કરવામાં આવ્યો હતો. જોકે હવે અસલ ચોર પકડાઈ ગયો છે ત્યારે તે સૈફના ઘરમાં કેમ ઘૂસ્યો હતો તેના રહસ્યો ઉઘાડા પડશે. હાલમાં સૈફની હાલત સ્થિર છે અને તે રિકવરી મોડમાં છે. ગઇકાલે જ ડૉક્ટરોએ તેનું હેલ્થ અપડેટ આપ્યું હતું જેમાં તે ઝડપથી રિકવર થઇ રહ્યો હોવાની જાણકારી આપી હતી. સૈફની સર્જરી પણ સફળ રહી હતી. 

મુખ્ય આરોપી વિજય દાસ એક પબમાં કામ કરે છે. તે પ.બંગાળનો રહેવાશી છે. પોલીસે દાવો કર્યો હતો કે તેના ઘણાં નામ છે. તેને વિજય દાસ, બિજોય દાસ કે મોહમ્મદ ઈલિયાસ તરીકે પણ ઓળખવામાં આવે છે. તેને કોર્ટમાં રજૂ કરવામાં આવશે અને તેના રિમાંડની માગ કરાશે. સૈફ અલી ખાન પર હુમલા બાદ આ વ્યક્તિને સીસીટીવી ફૂટેજમાંથી ઉતરતો જોઈ શકાય છે.