Fire in Muzaffarpur, ચાર બાળકો સહિત પાંચ લોકો ભડથું, આખું ગામ શોકમગ્ન

બિહારના મુઝફ્ફરપુરમાં એક હૃદયદ્રાવક ઘટના બની છે. બુધવારના રોજ એક દલિત વસ્તીમાં ભીષણ આગ લાગી હતી. આ અગ્નિકાંડમાં 50 થી વધુ ઘરો રાખ થઈ ગયા છે. દુર્ઘટનામાં ચાર બાળકો સહિત પાંચ લોકો ગંભીર રીતે દાઝી જવાથી મૃત્યુ પામ્યા છે. આ ઘટના બરિયારપુર પોલીસ સ્ટેશન વિસ્તારના રામપુર મની પંચાયતમાં બની હતી.

મુઝફ્ફરપુરમાં ચાર બાળકો જીવતા ભૂંજાયા...

જાણવા મળ્યું છે કે, ગોલક પાસવાનના ઘરમાં શોર્ટ સર્કિટના કારણે આગ લાગી હતી અને પળવારમાં જ આ આગ આખા ઝૂંપડપટ્ટી વિસ્તારમાં ફેલાઈ ગઈ હતી. સ્થાનિક લોકોએ જણાવ્યું કે રાજુ પાસવાન નામના વ્યક્તિના 12 વર્ષ, આઠ વર્ષ અને નવ વર્ષના ત્રણ બાળકો આ આગમાં ભડથું થઈ ગયા હતા. આ ઘટના બાદ વિસ્તારમાં ભારે અફરાતફરી મચી ગઈ હતી.

જિલ્લા અધિકારીએ શું કહ્યું?

જિલ્લા અધિકારી સુબ્રત કુમાર સેને જણાવ્યું કે આ એક દુઃખદ ઘટના છે. આગ લાગવાની ઘટનામાં ચાર બાળકોના મોત થયા છે, અને તેઓ બધા એક જ પરિવારના હતા. કાયદાકીય પ્રક્રિયા પૂર્ણ થયા બાદ મૃતદેહોને પોસ્ટમોર્ટમ માટે મોકલવામાં આવશે. આપત્તિ વ્યવસ્થાપન વિભાગ દ્વારા તમામ મૃતકોના પરિવારને 4-4 લાખ રૂપિયાની સહાય રાશિ આપવામાં આવશે. જેમના ઘર બળી ગયા છે તેમના માટે ભોજનની વ્યવસ્થા કરવામાં આવશે.

જિલ્લા અધિકારી સુબ્રત કુમાર સેને વધુમાં જણાવ્યું, "ગામના ગોલક પાસવાનના ઘરમાં અચાનક શોર્ટ સર્કિટથી આગ લાગી હતી. લોકો કંઈ સમજે તે પહેલાં જ પવનના કારણે આગ ખૂબ જ ઝડપથી ફેલાઈ ગઈ હતી. આગની જ્વાળાઓ ખૂબ જ ઊંચી હતી, જેના કારણે બાળકો ડરી ગયા અને બહાર નીકળી શક્યા નહીં અને આગની લપેટમાં આવી ગયા."

ભીષણ આગથી ગામમાં કોહરામ...

ગ્રામજનોએ તાત્કાલિક પોલીસ અને ફાયર બ્રિગેડને આગની જાણ કરી હતી. ફાયર બ્રિગેડની ગાડીઓ ઘટનાસ્થળે પહોંચીને આગ ઓલવવાનો પ્રયાસ કરી રહી છે. ઘટના બાદથી ઘટનાસ્થળે ચીસો અને આક્રંદનો માહોલ છે. 15 બાળકો ગુમ હોવાનું પણ જાણવા મળ્યું છે અને પીડિત પરિવારો તેમના બાળકોને શોધી રહ્યા છે.

આખું ગામ ગમગીન...

ગામની સ્થિતિ અત્યંત હૃદયવિદારક બની ગઈ છે. ચારે તરફ અફરાતફરીનો માહોલ છે. મૃત્યુ પામેલા ચાર બાળકોના મૃતદેહોને બહાર કાઢવામાં આવ્યા છે. આખું ગામ શોકમાં ડૂબી ગયું છે. મૃતકોના પરિજનો મોટે મોટેથી રડી રહ્યા છે. ઘટનાસ્થળે પહોંચેલી પોલીસે તપાસ શરૂ કરી દીધી છે અને મૃતદેહોને પોસ્ટમોર્ટમ માટે SKMCH મોકલવાની કાર્યવાહી ચાલી રહી છે.