મહારાષ્ટ્ર: ભંડારામાં ઓર્ડિનન્સ ફેક્ટરીમાં મોટો વિસ્ફોટ, ઘણા લોકોના મોત

શુક્રવારે મહારાષ્ટ્રના ભંડારાના જવાહર નગરમાં એક ઓર્ડનન્સ ફેક્ટરીમાં વિસ્ફોટ થયો હતો. આ અકસ્માતમાં પાંચ કર્મચારીઓના મોતની આશંકા છે અને ઘણા લોકો ઘાયલ થયા હોવાના અહેવાલ છે. વિસ્ફોટનો અવાજ એટલો જોરદાર હતો કે સમગ્ર વિસ્તારમાં ભયનો માહોલ છવાઈ ગયો.

વિસ્ફોટની માહિતી મળતાં જ, બચાવ અને તબીબી ટીમો તાત્કાલિક ઘટનાસ્થળે રવાના કરવામાં આવી હતી. જિલ્લા કલેક્ટર સંજય કોલ્ટેએ જણાવ્યું હતું કે મહારાષ્ટ્રના ભંડારા જિલ્લામાં ઓર્ડનન્સ ફેક્ટરીમાં સવારે લગભગ 10.30 વાગ્યે વિસ્ફોટ થયો હતો. બચાવ અને તબીબી કાર્યકરો વિસ્ફોટ સ્થળે બચી ગયેલા લોકોને શોધી રહ્યા છે જ્યારે અગ્નિશામક દળ પરિસ્થિતિને કાબુમાં લેવાનો પ્રયાસ કરી રહ્યા છે.

જિલ્લા કલેક્ટરે વધુમાં જણાવ્યું હતું કે વિસ્ફોટને કારણે છત તૂટી પડી હતી અને ઓછામાં ઓછા 12 લોકો તેની નીચે ફસાયા હતા. તેમાંથી બે લોકોને બચાવી લેવામાં આવ્યા છે અને કાટમાળ સાફ કરવા માટે ખોદકામ મશીનોનો ઉપયોગ કરવામાં આવી રહ્યો છે.

અધિકારીઓના જણાવ્યા અનુસાર, "શુક્રવારે સવારે એક ઓર્ડનન્સ ફેક્ટરીમાં વિસ્ફોટ થયો હતો. બચી ગયેલા લોકોને શોધવા માટે બચાવ અને તબીબી ટીમો તૈનાત કરવામાં આવી છે અને બચાવ કામગીરી ચાલુ છે."

મીડિયા રિપોર્ટ્સ અનુસાર, વિસ્ફોટ એટલો શક્તિશાળી હતો કે તેનો અવાજ 5 કિલોમીટર દૂર સુધી સંભળાયો. દૂરથી લેવાયેલા વીડિયોમાં, ફેક્ટરીમાંથી ગાઢ ધુમાડો નીકળતો જોવા મળ્યો હતો.

—IANS