મિડલ ઈસ્ટમાં વધી રહેલા તણાવ અને આંતરરાષ્ટ્રીય સ્તરે ઉર્જા સંકટની અસરો વચ્ચે ભારત સરકારે સ્થાનિક ગ્રાહકો માટે એક મહત્વપૂર્ણ રણનીતિ ઘડી છે. પેટ્રોલિયમ મંત્રાલય દ્વારા ઘરેલુ રાંધણ ગેસ (LPG) ના બુકિંગ માટેના નિયમોમાં ફેરફાર કરીને તેનો સમયગાળો લંબાવી દેવામાં આવ્યો છે. આ નિર્ણય પાછળનો મુખ્ય ઉદ્દેશ્ય બજારમાં થતી સંગ્રહખોરી રોકવાનો અને દરેક જરૂરિયાતમંદ પરિવાર સુધી ગેસ પહોંચાડવાનો છે.
બુકિંગના સમયગાળામાં શું ફેરફાર થયો ?
સરકારી સૂત્રો પાસેથી મળતી માહિતી મુજબ, અગાઉ જે ગેસ બુકિંગનો સમયગાળો 21 દિવસનો હતો, તેને હવે વધારીને 25 દિવસ કરવામાં આવ્યો છે. આનો સીધો અર્થ એ છે કે ગ્રાહકોએ હવે એક સિલિન્ડર લીધા બાદ બીજું સિલિન્ડર બુક કરાવવા માટે ઓછામાં ઓછો 24 દિવસનો અંતર જાળવવો પડશે. નોંધનીય છે કે માત્ર ત્રણ દિવસ પહેલા જ આ મર્યાદા 15 દિવસથી વધારીને 21 દિવસ કરવામાં આવી હતી, જે હવે ફરી વધારીને 25 દિવસ કરી દેવાઈ છે.
સંગ્રહખોરી અને કાળાબજાર પર લગામ :&nbsp;
યુદ્ધ જેવી સ્થિતિમાં ઘણીવાર લોકો ગભરાટમાં આવીને ગેસ સિલિન્ડરનો સ્ટોક કરવાનું શરૂ કરી દેતા હોય છે. સરકારે સ્પષ્ટ કર્યું છે કે દેશમાં હાલમાં પેટ્રોલ, ડીઝલ કે ઘરેલુ ગેસની કોઈ જ અછત નથી. પુરવઠો પૂરતા પ્રમાણમાં ઉપલબ્ધ છે, પરંતુ કાળાબજાર કરનારા તત્વો પર લગામ કસવા માટે બુકિંગના દિવસોમાં આ વધારો કરવો અનિવાર્ય બન્યો છે.
ભાવ વધારા અંગે મોટી રાહત :&nbsp;
વૈશ્વિક બજારમાં અસ્થિરતા હોવા છતાં, સામાન્ય જનતા માટે રાહતના સમાચાર એ છે કે આગામી સમયમાં ઘરેલુ ગેસના ભાવમાં કોઈ મોટા વધારાની શક્યતા નહિવત છે. સરકાર દેશમાં ગેસનો સપ્લાય જાળવી રાખવા માટે ઔદ્યોગિક વપરાશ માટેના LNG (લિક્વિફાઈડ નેચરલ ગેસ) ના જથ્થાને ઘરેલું વપરાશ માટે ડાયવર્ટ કરવાની યોજના બનાવી રહી છે. આ પગલાથી સપ્લાય ચેઈન મજબૂત બનશે અને ભાવમાં સ્થિરતા જળવાઈ રહેશે.
તાજેતરનો ભાવ વધારો :&nbsp;
ઉલ્લેખનીય છે કે, પશ્ચિમ એશિયામાં ચાલી રહેલા સંઘર્ષની અસર કિંમતો પર જોવા મળી છે. તાજેતરમાં જ ઘરેલુ LPG સિલિન્ડરના ભાવમાં ₹60 અને કોમર્શિયલ સિલિન્ડરના ભાવમાં ₹114.5 નો વધારો ઝીંકવામાં આવ્યો હતો. ઈન્ડિયન ઓઈલ કોર્પોરેશન મુજબ, દિલ્હીમાં સબસિડી વગરના 14.2 કિલોગ્રામના સિલિન્ડરની કિંમત હવે ₹913 પર પહોંચી છે.&nbsp;

LPG ગેસ બુકિંગ નિયમ ફેરફાર

સંગ્રહખોરી રોકવા સરકારે LPG સિલિન્ડર બુકિંગ અંતર 21થી વધારી 25 દિવસ કર્યું

March 10, 2026 | 11:15 IST