પશ્ચિમ એશિયામાં વધી રહેલા તણાવ અને યુદ્ધ જેવી સ્થિતિને કારણે ભારતમાં એલપીજી (LPG) સિલિન્ડરના પુરવઠામાં વિક્ષેપ પડવાની ભીતિ સેવાઈ રહી છે. આ પરિસ્થિતિને પહોંચી વળવા માટે કેન્દ્ર સરકાર હરકતમાં આવી છે. તાજેતરમાં કેન્દ્રીય ગૃહ સચિવ ગોવિંદ મોહનની અધ્યક્ષતામાં તમામ રાજ્યોના મુખ્ય સચિવો અને પોલીસ વડાઓ (DGPs) સાથે એક ઉચ્ચ સ્તરીય બેઠક યોજાઈ હતી. આ બેઠકનો મુખ્ય હેતુ દેશમાં રાંધણ ગેસની ઉપલબ્ધતા સુનિશ્ચિત કરવાનો અને કોઈપણ પ્રકારની ગેરરીતિ અટકાવવાનો છે.
સુરક્ષા વ્યવસ્થા સઘન બનાવવાની સૂચના :&nbsp;
કેન્દ્ર સરકારે રાજ્યોને સ્પષ્ટ આદેશ આપ્યા છે કે ગેસ બોટલિંગ પ્લાન્ટ્સ, ડિસ્ટ્રિબ્યુશન સેન્ટર્સ અને પરિવહન કરતા વાહનોની સુરક્ષામાં વધારો કરવામાં આવે. પુરવઠા શૃંખલામાં કોઈ અડચણ ન આવે તે માટે રાઉન્ડ ધ ક્લોક મોનિટરિંગ કરવાની સૂચના અપાઈ છે. ખાસ કરીને જે લોકો અછતનો લાભ ઉઠાવીને કાળાબજારી અથવા સંગ્રહખોરી કરે છે, તેમની સામે ફોજદારી કાર્યવાહી કરવાના આદેશ આપવામાં આવ્યા છે.
અફવાઓ પર અંકુશ અને જનજાગૃતિ :&nbsp;
ગૃહ મંત્રાલયે નોંધ્યું છે કે સોશિયલ મીડિયા પર જૂના વીડિયો અથવા ખોટી માહિતી ફેલાવીને લોકોમાં ગભરાટ પેદા કરવામાં આવી રહ્યો છે. રાજ્યોને આવા તત્વો વિરુદ્ધ કડક કાયદાકીય પગલાં લેવા અને સામાન્ય જનતાને સાચી માહિતી આપવા માટે જનજાગૃતિ અભિયાન ચલાવવા જણાવાયું છે. લોકો ખોટા 'પેનિક બુકિંગ' ન કરે તે માટે તંત્રને સતર્ક રહેવા સૂચના અપાઈ છે.
રિફાઇનરીઓને આદેશ અને વિતરણમાં ફેરફાર :&nbsp;
સરકારે દેશની તમામ રિફાઇનરીઓને એલપીજીનું ઉત્પાદન વધારવા અને ઘરગથ્થુ ગ્રાહકોની જરૂરિયાતોને પ્રથમ પ્રાથમિકતા આપવા જણાવ્યું છે. પુરવઠાના સંતુલનને જાળવવા માટે હાલમાં હોટલ, રેસ્ટોરન્ટ અને અન્ય કોમર્શિયલ એકમો માટે ગેસ વિતરણ પર આંશિક નિયંત્રણો લાદવામાં આવ્યા છે. જોકે, હોસ્પિટલો અને શૈક્ષણિક સંસ્થાઓ જેવી અનિવાર્ય સેવાઓને આ નિયંત્રણોમાંથી મુક્તિ આપવામાં આવી છે જેથી સામાન્ય જનજીવન પ્રભાવિત ન થાય.
રીયલ-ટાઇમ મોનિટરિંગ માટે કંટ્રોલ રૂમ :&nbsp;
પરિસ્થિતિ પર સીધી નજર રાખવા માટે ગૃહ મંત્રાલયે એક વિશેષ કંટ્રોલ રૂમ શરૂ કર્યો છે. આ કંટ્રોલ રૂમ રાજ્યો સાથે સીધા સંપર્કમાં રહેશે અને દરરોજ ગેસના જથ્થાની સમીક્ષા કરશે. સરકારનો ઉદ્દેશ્ય એ છે કે આંતરરાષ્ટ્રીય સ્તરે ભલે ગમે તેટલી અસ્થિરતા હોય, પરંતુ ભારતના રસોડા સુધી પહોંચતો ગેસ અટકે નહીં.&nbsp;

LPG સિલિન્ડર પુરવઠાના નવા નિયમો

પશ્ચિમ એશિયામાં યુદ્ધના લીધે LPG પુરવઠા પર અસરની આશંકા

March 12, 2026 | 18:50 IST