લેહમાં વિરોધ પ્રદર્શનમાં 4 લોકોના મોત

બુધવારે લદ્દાખમાં થયેલી હિંસા માટે કેન્દ્ર સરકારે સોશિયલ એક્ટિવિસ્ટ સોનમ વાંગચુકને જવાબદાર ગણાવ્યા છે. ગૃહ મંત્રાલયે એક નિવેદનમાં કહ્યું કે, વાંગચુકે ભડકાઉ નિવેદનો આપીને લોકોને ઉશ્કેર્યા હતા. વારંવારની અપીલ છતાં તેમણે પોતાની ભૂખ હડતાળ ચાલુ રાખી હતી અને હિંસા ફાટી નીકળ્યા બાદ તે તત્કાલ સમેટી લીધી હતી, પરંતુ પરિસ્થિતિને કાબૂમાં લેવાને બદલે તેઓ એમ્બ્યુલન્સમાં પોતાના ગામ પરત ફર્યા હતા. 

વિરોધ પ્રદર્શનમાં 4 લોકોના મોત

મંત્રાલયે એમ પણ કહ્યું કે, તેમણે આરબ સ્પ્રિંગ અને નેપાળમાં થયેલા વિરોધ પ્રદર્શનોનો ઉલ્લેખ કરીને લોકોને ગેરમાર્ગે દોર્યા હતા. આ ઘટનાઓ વચ્ચે, 24 સપ્ટેમ્બરે લેહમાં વિરોધ પ્રદર્શન દરમિયાન હિંસા ફાટી નીકળી હતી, જેમાં 4 લોકોના મોત થયા અને 80થી વધુ લોકો ઈજાગ્રસ્ત થયા હતા, જેમાં 30થી વધુ સુરક્ષા કર્મચારીઓનો પણ સમાવેશ થાય છે.

આ પણ વાંચો: લેહ જઈ રહેલી ઈન્ડિગોની ફ્લાઈટનું ટેકનિકલ ખામી સર્જાતા ઇમરજન્સી લેન્ડિંગ, વિમાન સુરક્ષિત દિલ્હીમાં ઉતર્યું

વાંગચુકની માંગણીઓ અને સરકારી વાટાઘાટ

સોનમ વાંગચુકે 10 સપ્ટેમ્બરના રોજ લદ્દાખને પૂર્ણ રાજ્યનો દરજ્જો આપવા અને બંધારણની છઠ્ઠી અનુસૂચિમાં સમાવેશ કરવાની માંગ સાથે ભૂખ હડતાળ શરૂ કરી હતી. કેન્દ્ર સરકારે જણાવ્યું કે, સરકાર આ મુદ્દાઓ પર લેહ અને કારગિલ ડેમોક્રેટિક એલાયન્સ સાથે પહેલાથી જ ચર્ચા કરી રહી હતી. આ વાટાઘાટોના પરિણામ સ્વરૂપે કેટલાક મુખ્ય નિર્ણયો લેવામાં આવ્યા હતા, જેમાં અનુસૂચિત જનજાતિ અનામતમાં 45%થી વધારીને 84%નો વધારો, મહિલાઓ માટે કાઉન્સિલમાં 33% અનામત અને ભોટી અને પારગી ભાષાઓને સત્તાવાર ભાષાનો દરજ્જો આપવાનો સમાવેશ થાય છે. આ ઉપરાંત, 1800 નોકરીઓ માટે ભરતી પ્રક્રિયા પણ શરૂ કરવામાં આવી હતી. સરકારનો દાવો છે કે, આ પ્રગતિથી કેટલાક લોકો નાખુશ હતા અને તેમણે વાટાઘાટોને ખોરવી નાખવાનો પ્રયાસ કર્યો હતો.

30થી વધુ સુરક્ષા કર્મચારીઓને ઈજા

24 સપ્ટેમ્બરે સવારે 11.30 વાગ્યે, વિરોધ સ્થળેથી એક ટોળું નીકળીને લેહમાં ભાજપ કાર્યાલય અને સરકારી CEC કાર્યાલય પર હુમલો કર્યો હતો. વિરોધીઓએ કાર્યાલયો અને વાહનોમાં આગ લગાવી, પોલીસ પર હુમલો કર્યો અને 30થી વધુ સુરક્ષા કર્મચારીઓને ઈજા પહોંચાડી હતી. પરિસ્થિતિને કાબૂમાં લેવા માટે પોલીસે ગોળીબાર કરવો પડ્યો, જેના પરિણામે કેટલાક લોકોના મોત થયા.

સોનમ વાંગચુકે ભૂખ હડતાળ સમેટી

સાંજે 4 વાગ્યા સુધીમાં પરિસ્થિતિ કાબૂમાં આવી હતી અને વહીવટીતંત્રે લેહમાં કર્ફ્યુ લાદી દીધો હતો. હિંસા ફાટી નીકળ્યા બાદ સોનમ વાંગચુકે તાત્કાલિક પોતાની ભૂખ હડતાળ સમેટી લીધી હતી. આ ઘટના પર પ્રતિક્રિયા આપતા તેમણે કહ્યું કે, આ લદ્દાખ માટે એક દુઃખદ દિવસ છે અને યુવાનોના મૃત્યુથી ભૂખ હડતાળનો હેતુ પૂરો થતો નથી. તેમણે સરકારને શાંતિના સંદેશને સાંભળવાની અપીલ કરી અને કહ્યું કે, જ્યારે શાંતિના સંદેશને અવગણવામાં આવે છે, ત્યારે આવી પરિસ્થિતિઓ સર્જાય છે.