Jammu and Kashmir : સેના દરેક પરિસ્થિતિ માટે તૈયાર, પરમાણુ ધમકીની પરવાહ નથી...

રક્ષા મંત્રી રાજનાથ સિંહ ગુરુવારે જમ્મુ અને કાશ્મીરમાં સમગ્ર સુરક્ષા પરિસ્થિતિ અને સશસ્ત્ર દળોની યુદ્ધ સંબંધિત તૈયારીઓની સમીક્ષા કરવા માટે શ્રીનગર પહોંચ્યા હતા. રક્ષા મંત્રી સાથે જમ્મુ-કાશ્મીરના ઉપરાજ્યપાલ મનોજ સિન્હા પણ હાજર હતા. બાદામી બાગ છાવણીમાં રક્ષા મંત્રી રાજનાથ સિંહે કહ્યું કે, "સૌ પ્રથમ, હું આતંકવાદ અને આતંકવાદીઓ સામે લડતા બહાદુર જવાનોના સર્વોચ્ચ બલિદાનને નમન કરવા માંગુ છું. હું તેમની સ્મૃતિને સન્માન આપું છું. હું પહેલગામમાં માર્યા ગયેલા નિર્દોષ નાગરિકોને પણ શ્રદ્ધાંજલિ અર્પણ કરું છું. હું ઘાયલ સૈનિકોની વીરતાને પણ સલામ કરું છું અને ભગવાનને પ્રાર્થના કરું છું કે તેઓ જલ્દીથી સ્વસ્થ થઈ જાય."

બાદામી બાગ છાવણીમાં રક્ષા મંત્રી રાજનાથ સિંહે કહ્યું કે, "આ કપરી પરિસ્થિતિમાં આપ સૌની વચ્ચે આવીને, આજે હું ખૂબ જ ગૌરવ અનુભવી રહ્યો છું. આપણા PM ના કુશળ નેતૃત્વ અને માર્ગદર્શન હેઠળ, 'ઓપરેશન સિંદૂર' દરમિયાન તમે જે કંઈ પણ કર્યું છે, તેણે સમગ્ર દેશને ગર્વથી ભરી દીધો છે. હું ભલે અત્યારે તમારો રક્ષા મંત્રી હોઉં, પરંતુ તેના પહેલાં તો ભારતનો નાગરિક છું. રક્ષા મંત્રીની સાથે સાથે, હું આજે, ભારતના નાગરિક તરીકે પણ તમારો આભાર વ્યક્ત કરવા આવ્યો છું."

ઓપરેશન સિંદૂર અત્યાર સુધીની સૌથી મોટી કાર્યવાહી...

રાજનાથ સિંહે કહ્યું કે, "ઓપરેશન સિંદૂર એક એવી પ્રતિબદ્ધતા છે, જેનાથી ભારતે બતાવી દીધું કે આપણે માત્ર ડિફેન્સ જ નથી કરતા, જ્યારે સમય આવે છે, તો આપણે કઠોર નિર્ણયો પણ લઈએ છીએ. આ ઓપરેશન, તે એક-એક જવાનની આંખોમાં જોયેલું સપનું હતું કે દરેક આતંકવાદી ઠેકાણું, ભલે તે ખીણોમાં છુપાયેલું હોય કે બંકરોમાં દબાયેલું હોય, અમે ત્યાં પહોંચીશું અને દુશ્મનની છાતી ચીરીને, અમે તે આતંકવાદી ઠેકાણાઓને ખતમ કરીને જ પાછા ફરીશું. ઓપરેશન સિંદૂર આતંકવાદ સામે ભારત દ્વારા ચલાવવામાં આવેલી, અત્યાર સુધીના ઇતિહાસની સૌથી મોટી કાર્યવાહી છે. પાંત્રીસ-ચાળીસ વર્ષોથી ભારત સરહદ પારથી ચલાવવામાં આવી રહેલા આતંકવાદનો સામનો કરી રહ્યું છે. આજે ભારતે સમગ્ર વિશ્વની સામે સ્પષ્ટ કરી દીધું છે કે આતંકવાદ સામે અમે કોઈપણ હદ સુધી જઈ શકીએ છીએ."

પહેલગામ હુમલા બાદ સમગ્ર દેશમાં હતો ગુસ્સો...

રક્ષા મંત્રી રાજનાથ સિંહે કહ્યું કે, "એક રક્ષા મંત્રી તરીકે મને આપ સૌને ખૂબ જ નજીકથી જાણવાની તક મળી છે. હું તમારા સાહસ અને પરાક્રમને તો જાણું જ છું, સાથે સાથે પહેલગામ જેવી ઘટના પ્રત્યે તમારા ગુસ્સાને પણ હું જાણું છું. મને ખબર છે કે પહેલગામ પછી તમારા અંદર ગુસ્સો હતો, સમગ્ર દેશના અંદર ગુસ્સો હતો. મને ખબર છે, કેવું લાગે છે જ્યારે ધમનીઓમાં વહી રહેલું લોહી બેકાબૂ થવા લાગે. અને મને આ વાતની ખુશી પણ છે કે તમે તમારા ગુસ્સાને સાચી દિશા આપતા, મોટી બહાદુરી અને સૂઝબૂઝ સાથે, પહેલગામનો બદલો લીધો."

પહેલગામમાં 22 એપ્રિલના રોજ થયેલા આતંકી હુમલાના જવાબમાં ભારત દ્વારા પાકિસ્તાન અને તેના કબજા હેઠળના કાશ્મીરમાં આતંકવાદીઓ તથા તેમના ઠેકાણાઓને નિશાન બનાવીને ‘ઓપરેશન સિંદૂર’ શરૂ કર્યા બાદથી સિંહની કેન્દ્ર શાસિત પ્રદેશની આ પહેલી મુલાકાત છે. આ દરમિયાન, ઓપરેશન સિંદૂર અને ભારત-પાકિસ્તાન વચ્ચે દુશ્મનાવટ સમાપ્તિ કરાર બાદ, જમ્મુ-કાશ્મીરમાં જનજીવન સામાન્ય થવા લાગ્યું છે. શાળા શિક્ષણ નિયામક, જમ્મુએ બુધવારે જાહેરાત કરી હતી કે જમ્મુ અને કાશ્મીરના કેટલાક સરહદી વિસ્તારોમાં શાળાઓ 15 મેના રોજ ફરીથી ખુલશે. વિદ્યાર્થીઓ અને વાલીઓ માટે રાહતની વાત એ છે કે ભારત અને પાકિસ્તાન વચ્ચે તણાવને ધ્યાનમાં રાખીને બંધ કરવામાં આવેલી જમ્મુ, સાંબા, કઠુઆ, રાજૌરી અને પૂંછ જિલ્લાના ઘણા વિસ્તારોમાં શાળાઓ આવતીકાલે ફરીથી ખુલશે. જમ્મુમાં ચોકી ચોરા, ભલવાલ, ડંસલ, ગાંધી નગર, જમ્મુ ઝોનમાં શાળાઓ ખુલશે. સાંબામાં વિજયપુરમાં કાલે શાળાઓ ખુલશે. કઠુઆમાં બરનોટી, લખનપુર, સલ્લન અને ઘગવાલ ઝોનમાં શાળાઓ ખુલશે. તેવી જ રીતે રાજૌરીમાં પીરી, કાલાકોટ, થાનામંડી, મોઘલા, કોટરંકા, ખવાસ, લોઅર હથલ અને દરહાલ વિસ્તારોમાં શાળાઓ ખુલ્લી રહેશે. પૂંછમાં સુરનકોટ અને બફલિયાઝ વિસ્તારોમાં શાળાઓ ખુલશે.

વૈષ્ણો દેવી મંદિર માટે હેલિકોપ્ટર સેવાઓ ફરીથી શરૂ...

આ દરમિયાન, ભારત અને પાકિસ્તાન વચ્ચે દુશ્મનાવટના કારણે એક સપ્તાહ સુધી સ્થગિત રહ્યા બાદ કટરાથી શ્રી માતા વૈષ્ણો દેવી મંદિર માટે હેલિકોપ્ટર સેવાઓ બુધવારે ફરીથી શરૂ થઈ ગઈ હતી. આ ઉપરાંત, પહેલગામ હુમલા બાદ ભારતીય સેનાએ જમ્મુ-કાશ્મીરમાં આતંકવાદીઓ સામે પોતાનું અભિયાન તેજ કરી દીધું છે. ગયા મહિને પહેલગામમાં થયેલા આતંકી હુમલાના જવાબમાં ભારતે ઓપરેશન સિંદૂર શરૂ કર્યું હતું જેમાં 26 લોકો માર્યા ગયા હતા. 7 મેના રોજ પાકિસ્તાન અને POK માં ભારતના ચોક્કસ હુમલાઓમાં 100 થી વધુ આતંકવાદીઓ માર્યા ગયા હતા.