મધ્ય પૂર્વના દેશો વચ્ચે વણસી રહેલા સૈન્ય સંઘર્ષે હવે વૈશ્વિક પરિવહન વ્યવસ્થાને બાનમાં લીધી છે. અમેરિકા, ઈઝરાયલ અને ઈરાન વચ્ચેના વધતા તણાવને કારણે પશ્ચિમ એશિયાના અનેક દેશોએ પોતાના હવાઈ માર્ગો (એરસ્પેસ) સુરક્ષાના કારણોસર બંધ કરી દીધા છે. આ ભૌગોલિક તણાવની સીધી અસર ભારતના આંતરરાષ્ટ્રીય હવાઈ ટ્રાફિક પર પડી રહી છે, જેના કારણે છેલ્લા કેટલાક દિવસોમાં સેંકડો ફ્લાઈટ્સ રદ કરવી પડી છે.
ભારતના મેટ્રો શહેરોમાં એરપોર્ટ પર ફ્લાઈટ્સનું ભારણ :&nbsp;
યુદ્ધની સ્થિતિ અને એરસ્પેસ પરના પ્રતિબંધોને લીધે 4 માર્ચના રોજ ભારતભરના મુખ્ય એરપોર્ટ્સ પર અફરાતફરીનો માહોલ જોવા મળ્યો હતો. આંકડાઓ મુજબ:
મુંબઈ એરપોર્ટ: આર્થિક રાજધાની મુંબઈમાં સૌથી વધુ અસર જોવા મળી છે, જ્યાં કુલ 93 ફ્લાઈટ્સ રદ કરવામાં આવી છે. જેમાં 48 રવાના થતી અને 45 આગમન વાળી ફ્લાઈટ્સનો સમાવેશ થાય છે.
દિલ્હી એરપોર્ટ: દેશના પાટનગરમાં પણ 52 જેટલી ફ્લાઈટ્સ ખોરવાઈ છે.
બેંગલુરુ અને કોલકાતા: આ શહેરોમાં અનુક્રમે 34 અને 5 થી વધુ આંતરરાષ્ટ્રીય ફ્લાઈટ્સ રદ થતા આઈટી હબ અને પૂર્વ ભારતનો સંપર્ક મધ્ય પૂર્વ સાથે કપાયો છે.
દેશની અગ્રણી એરલાઈન ઈન્ડિગોના જણાવ્યા અનુસાર, 28 ફેબ્રુઆરીથી 3 માર્ચના ટૂંકા ગાળામાં જ તેમની 500 થી વધુ ઉડાનો પર અસર પડી છે.
એર ઈન્ડિયાની વિશેષ વ્યવસ્થા :&nbsp;
એર ઈન્ડિયાએ વર્તમાન પરિસ્થિતિને ધ્યાનમાં રાખીને 5 માર્ચ 2026ની મધ્યરાત્રિ સુધી મધ્ય પૂર્વના જોખમી રૂટ્સ પરની તમામ સેવાઓ સ્થગિત કરી દીધી છે. જોકે, વિદેશમાં ફસાયેલા ભારતીય નાગરિકો માટે રાહતના સમાચાર એ છે કે એરલાઈન દ્વારા મુંબઈ-દુબઈ-દિલ્હી રૂટ પર મોટા કદના B777 વિમાનો મોકલીને સ્પેશિયલ ફ્લાઈટ્સ ચલાવવાનું આયોજન કરાયું છે. જેદ્દાહ માટેની સેવાઓ પણ ટૂંક સમયમાં પૂર્વવત થવાની શક્યતા છે.
આંતરરાષ્ટ્રીય સ્તરે લેવાયેલા મોટા નિર્ણયો :&nbsp;
પશ્ચિમ એશિયાના દેશોમાં ફસાયેલા મુસાફરો માટે વિવિધ સરકારોએ મહત્વના પગલાં ભર્યા છે:
UAE ની રાહત: ફ્લાઈટ્સ રદ થવાને કારણે વિઝાની મુદત પૂરી થઈ ગઈ હોય તેવા મુસાફરો પર યુએઈ સરકારે દંડ માફ કરવાની જાહેરાત કરી છે.
કતરની સ્થિતિ: દોહાનું હમાદ ઇન્ટરનેશનલ એરપોર્ટ હાલમાં સંપૂર્ણપણે બંધ હોવાથી ત્યાંથી તમામ ઉડાનો સ્થગિત છે.
અમેરિકા અને બ્રિટન: આ દેશો પણ પોતાના નાગરિકોને યુદ્ધગ્રસ્ત વિસ્તારોમાંથી બહાર કાઢવા માટે વિશેષ ચાર્ટર્ડ વિમાનોની વ્યવસ્થા કરી રહ્યા છે.
યુદ્ધની ભયાનકતા અને જાનહાનિ :&nbsp;
આ સૈન્ય સંઘર્ષ માત્ર મુસાફરી પૂરતો સીમિત નથી, પરંતુ માનવીય સ્તરે પણ ભારે વિનાશક સાબિત થઈ રહ્યો છે. અત્યાર સુધીના અહેવાલો મુજબ, ઈરાનમાં 1,000 થી વધુ લોકોએ જીવ ગુમાવ્યા છે. લેબનાન અને ઈઝરાયલમાં પણ જાનહાનિના આંકડા વધી રહ્યા છે. આ સંઘર્ષમાં અમેરિકાના 6 સૈનિકોના મોત પણ નિપજ્યા છે. ઈઝરાયલ દ્વારા ઈરાન પર સતત કરવામાં આવી રહેલા હુમલાઓને કારણે સમગ્ર વિશ્વમાં યુદ્ધના વાદળો ઘેરાયા છે.

મધ્ય પૂર્વ યુદ્ધ ફ્લાઈટ

ઈઝરાયલ-ઈરાન સંઘર્ષને કારણે એરસ્પેસ બંધ થતા હજારો મુસાફરો અટવાયા

March 5, 2026 | 11:50 IST