જ્યોતિ કેસમાં હિસાર પોલીસે કર્યો ખુલાસો, 'કોઈ ડાયરી નથી મળી, આતંકી જોડાણના પણ નથી પુરાવા'

હિસારના ન્યૂ અગ્રસેન કોલોનીમાં રહેતી યુટ્યુબર જ્યોતિ મલ્હોત્રાને પાકિસ્તાન માટે જાસૂસી કરવાનો આરોપ લાગ્યો છે. પોલીસે તેની ધરપકડ કરીને તપાસ શરૂ કરી છે. આરોપ મુજબ, તેણે પાકિસ્તાની ઈન્ટેલિજન્સ સાથે માહિતીની આપ-લે કરી હોવાનું કહેવાય છે.

હાલમાં હિસાર પોલીસ સ્પષ્ટ રીતે જણાવી રહી છે કે, આ કેસમાં ઘણા દાવા પાયાવિહોણા સાબિત થયા છે. તેની કોઈ પર્સનલ ડાયરી નથી મળી કે, ન તો કોઈ આતંકી કનેક્શન મળ્યું છે. પોલીસના જણાવ્યા મુજબ, 5 દિવસના રિમાન્ડ દરમિયાન પણ આવા કોઈ સ્પષ્ટ પુરાવા સામે આવ્યા નથી કે, આરોપીનો સીધો સંબંધ કોઈ આતંકવાદી સંગઠન સાથે છે.

પોલીસ અધિકારીએ એક પ્રેસ કોન્ફરન્સમાં જણાવ્યું કે, સોશિયલ મીડિયા અને અન્ય માધ્યમો દ્વારા ખોટી માહિતી ફેલાવવામાં આવી રહી છે, જે માત્ર અફવા છે. આવા અહેવાલો પોલીસ તપાસમાં વિક્ષેપ ઊભો કરે છે અને રાષ્ટ્રીય સુરક્ષા માટે પણ જોખમ ઊભું કરે છે.

તપાસ દરમિયાન પોલીસ દ્વારા આરોપીના લેપટોપ અને અન્ય ઇલેક્ટ્રોનિક ઉપકરણો જપ્ત કરવામાં આવ્યા છે, જે હાલ ફોરેન્સિક પરીક્ષણ માટે મોકલ્યા છે. આરોપીની વોટ્સએપ ચેટ, બેંક વિગતો સહિતની માહિતી તપાસ હેઠળ છે, પરંતુ હાલ પૈસાની કોઈ સ્પષ્ટ લેવડ-દેવડ સામે આવી નથી.

અધિકારીઓએ જણાવ્યું કે, કુરુક્ષેત્રના હરકીરત નામના યુવાનને પણ પૂછપરછ માટે બોલાવવામાં આવ્યો છે. હાલ સુધી આરોપીની કોઈ પણ PIO (Pakistan Intelligence Officer) સાથે લગ્ન થયા હોવા કે, ધર્મપરિવર્તનના દાવા અંગે કોઈ પુરાવા નથી. જ્યોતિ હિસાર પોલીસની કસ્ટડીમાં છે અને ગુપ્ત એજન્સીઓની પણ પૂછપરછ ચાલુ છે, જોકે હજુ કોઈ અન્ય એજન્સીને કસ્ટડી સોંપવામાં આવી નથી.