<p dir="ltr" data-pm-slice="1 1 []"><strong>ગુજરાત સરકારનો ઐતિહાસિક નિર્ણય: તમામ વિભાગોમાં Zoho ઈમેઈલ અને ઓફિસ સુઈટ ફરજિયાત, અમિત શાહે પણ અપનાવ્યું Zoho Mail</strong></p>
<p dir="ltr">આત્મનિર્ભર ભારત અને ડિજિટલ સ્વદેશીની દિશામાં ગુજરાત સરકારે એક મહત્વપૂર્ણ પગલું ભર્યું છે. રાજ્યના વિજ્ઞાન અને ટેક્નોલોજી વિભાગે તમામ શાસકીય વિભાગો, બોર્ડ, કોર્પોરેશન, હેડ ઓફ ડિપાર્ટમેન્ટ અને જાહેર ક્ષેત્રની સંસ્થાઓ (PSUs)ને સ્વદેશી Zoho ઈમેઈલ અને ઓફિસ સુઈટ અપનાવવાની સૂચના જારી કરી છે. આ નિર્ણય ડેટા સુરક્ષા, ગોપનીયતા અને ડિજિટલ સ્વરાજને મજબૂત કરવાના ઉદ્દેશ્ય સાથે લેવાયો છે.</p>
<h2 dir="ltr"><span style="font-size: 12pt;">અમિત શાહનું Zoho Mail અપનાવવાનું ટ્વીટ</span></h2>
<p dir="ltr">કેન્દ્રીય ગૃહમંત્રી અમિત શાહે પણ Gmail છોડીને Zoho Mail અપનાવવાનો નિર્ણય જાહેર કર્યો છે. તેમણે ટ્વીટમાં લખ્યું, &ldquo;I have switched to Zoho Mail. Kindly note the change in my email address.&rdquo; આ પગલું આત્મનિર્ભર ભારતના સંદેશને મજબૂત કરે છે અને સ્વદેશી ટેક્નોલોજીમાં સરકારના વિશ્વાસને દર્શાવે છે. Zohoના ફાઉન્ડર શ્રીધર વેમ્બુએ અમિત શાહનો આભાર વ્યક્ત કરતાં ટ્વીટ કર્યું, &ldquo;અમિત શાહજીના આ નિર્ણયથી ભારતીય એન્જિનિયરોને નવી પ્રેરણા મળશે. આભાર કે તેમણે ભારતીય ટેક્નોલોજી પર વિશ્વાસ મૂક્યો.&rdquo;</p>
<h2 dir="ltr"><span style="font-size: 12pt;">ગુજરાત સરકારનો સર્ક્યુલર: ડિજિટલ સ્વદેશીનો સંકલ્પ</span></h2>
<p dir="ltr">વિજ્ઞાન અને ટેક્નોલોજી વિભાગના સર્ક્યુલરમાં જણાવાયું છે કે, ભારતની ડિજિટલ સ્વતંત્રતા અને સરકારી માહિતીની સુરક્ષા માટે સ્થાનિક ટેક્નોલોજી પ્લેટફોર્મ્સનો ઉપયોગ અનિવાર્ય છે. Zoho એ ભારત આધારિત કંપની છે, જેના સર્વર અને ડેટા સેન્ટર્સ ભારતમાં સ્થિત છે, જે ડેટા લોકલાઈઝેશન અને ગોપનીયતાને સુનિશ્ચિત કરે છે. આ પહેલના સંકલન માટે 'ડિરેક્ટોરેટ ઓફ આઈસીટી એન્ડ ઈ-ગવર્નન્સ (DIT)'ને નોડલ એજન્સી નિયુક્ત કરવામાં આવી છે.</p>
<p dir="ltr">સરકારે ભારપૂર્વક જણાવ્યું છે કે આ ફક્ત ટેક્નિકલ બદલાવ નથી, પરંતુ ભારતની ડિજિટલ સર્વભૌમત્વ તરફનું મજબૂત પગલું છે. આ નિર્ણયથી Gmail, Outlook જેવી વિદેશી સેવાઓને ધીમે-ધીમે બદલે Zoho પર સ્વિચ કરવામાં આવશે.</p>
<h2 dir="ltr"><span style="font-size: 12pt;">Zoho: સ્વદેશી ટેક્નોલોજીનું પ્રતિક</span></h2>
<p dir="ltr">Zoho એ ચેન્નાઈ સ્થિત ભારતીય સોફ્ટવેર કંપની છે, જે ઈમેઈલ, ઓફિસ સુઈટ, CRM અને અન્ય બિઝનેસ ટૂલ્સ પૂરાં પાડે છે. તેના ડેટા સેન્ટર્સ ભારતમાં હોવાથી સંવેદનશીલ માહિતીની સુરક્ષા અને ડેટા પ્રાઇવસીની ખાતરી રહે છે. આ નિર્ણયથી સ્થાનિક ટેક્નોલોજી કંપનીઓને પ્રોત્સાહન મળશે અને ભારતના IT સેક્ટરને નવો વેગ મળશે.</p>
<h2 dir="ltr"><span style="font-size: 12pt;">ડિજિટલ સ્વરાજનો માઇલસ્ટોન</span></h2>
<p dir="ltr">વિશ્લેષકોના મતે, આ પહેલ ડેટા સુરક્ષા અને સ્વદેશી ટેક્નોલોજીના પ્રચાર માટે માઇલસ્ટોન સાબિત થઈ શકે છે. એક તરફ કેન્દ્રીય ગૃહમંત્રી અમિત શાહે Zoho Mail અપનાવીને દેશને પ્રેરણા આપી છે, તો બીજી તરફ ગુજરાત સરકારની આ નીતિ રાજ્યના ડિજિટલ માળખામાં સ્વદેશી ટેક્નોલોજીનો પ્રભાવ વધારશે. આ નિર્ણયથી ભારતની IT કંપનીઓને વૈશ્વિક સ્તરે સ્પર્ધા કરવાની તક મળશે.</p>
<p dir="ltr"><strong>ગુજરાત સરકાર અને અમિત શાહનું આ પગલું આત્મનિર્ભર ભારતના સપનાને સાકાર કરવા દિશામાં એક મોટું પગલું છે. વધુ માહિતી માટે ગુજરાત સરકારની વેબસાઇટ તપાસો.</strong></p>

Gmail-Outlook છોડી Zoho અપનાવશે

Gmail-Outlook છોડી Zoho અપનાવશે, અમિત શાહનો પણ સ્વદેશી ઈમેઈલને સમર્થન

October 11, 2025 | 24:13 IST