જલગાંવમાં મંત્રીની ગાડીના ડ્રાઇવરે હોર્ન વગાડતા જૂથ અથડામણ, કરફ્યું લગાવાયો

મહારાષ્ટ્રના જલગાંવમાં ચોંકાવનારો બનાવ બહાર આવ્યો છે જ્યાં બે જૂથો વચ્ચે ભારે પથ્થરમારો થયો હોવાનો અહેવાલ છે. મળી રહેલી માહિતી મુજબ શિવસેનાના મંત્રી ગુલાબરાવ પાટીલના પરિવારને લઈ જઈ રહેલા વાહન દ્વારા હોર્ન વગાડવાને લઈને બે જૂથો વચ્ચે તણાવ વધી ગયો હતો. મળતી માહિતી મુજબ, મંગળવારે રાત્રે જલગાંવ જિલ્લાના પાલધી ગામમાં પથ્થરમારો અને આગચંપીનો એક બનાવ બન્યો હતો.

મંત્રી ગુલાબરાવ પાટીલના પરિવારને લઈ જઈ રહેલા વાહનના ડ્રાઈવરે હોર્ન વગાડતા લોકોમાં રોષ ભભૂકી ઉઠ્યો ત્યારે વિવાદ શરૂ થયો હતો. આ પછી ગ્રામજનો અને પાર્ટીના કાર્યકરો વચ્ચે બોલાચાલી થઈ હતી. ગુસ્સે ભરાયેલા ટોળાએ પથ્થરમારો કર્યો હતો અને દુકાનો અને વાહનોને આગ ચાંપી હતી. જલગાંવના ઘણા વિસ્તારોમાં ભારે પોલીસ દળ તૈનાત કરવામાં આવ્યું છે. પોલીસે લગભગ 25 લોકો સામે કેસ નોંધ્યો છે અને લગભગ 10 લોકોની અટકાયત કરી છે.

જલગાંવ પોલીસે જણાવ્યું કે વિસ્તારમાં શાંતિ જાળવવા માટે ગામમાં બુધવાર સાંજ સુધી કર્ફ્યુ લગાવી દેવામાં આવ્યો છે. ગ્રામજનોને કાયદાની વિરુદ્ધ ન જવા અને શાંતિ જાળવવા અપીલ છે. તેમણે કહ્યું કે મંગળવારે રાત્રે ધરણ ગ્રામ્ય પોલીસ સ્ટેશન હેઠળના પરડા ગામમાં બે જૂથો વચ્ચે નજીવી તકરાર પર ઝઘડો થયો હતો, જેમાં કેટલીક દુકાનોને આગ ચાંપી દેવામાં આવી હતી. આ પછી મોટી સંખ્યામાં પોલીસ દળો તૈનાત કરવામાં આવ્યા છે. હાલ સ્થિતિ નિયંત્રણમાં છે. આ મામલે 20 થી 25 અજાણ્યા લોકો સામે કેસ નોંધવામાં આવ્યો છે.

ગત મહિને પરભણી શહેરમાં કલેક્ટર કચેરીની સામે બાબા સાહેબ આંબેડકરની પ્રતિમા આગળ રાખવામાં આવેલી બંધારણની નકલ તોડીને રોષ ફાટી નીકળ્યો હતો. આ પછી પરભણીમાં હિંસાએ આક્રમક સ્વરૂપ ધારણ કર્યું હતું. પ્રદર્શનકારીઓએ વિવિધ સ્થળોએ પથ્થરમારો કર્યો હતો. રસ્તા પરની દુકાનો અને કાર પણ સળગાવી દેવામાં આવી હતી.