ગુજરાતી યુવતીને નકલી પાસપોર્ટ આપનારો ફરાર એજન્ટ 6 વર્ષે ઝડપાયો!

ગેરકાયદે અમેરિકા ગયેલી કિંજલ પટેલ નામની એક ગુજરાતી યુવતીને ગેરકાયદે અમેરિકા મોકલવા નકલી પાસપોર્ટ બનાવી આપનારો એજન્ટ 6 વર્ષ બાદ ઝડપાયો છે. ઝાકીરખાન નામનો એજન્ટ મુંબઈનો છે. જેની દિલ્હી એરપોર્ટ પોલીસે તાજેતરમાં ધરપકડ કરવામાં આવી છે.

ઝાકીરખાને કિંજલ નારણભાઈ પટેલ નામની યુવતીને નકલી પાસપોર્ટ બનાવી આપ્યો હતો. તે વાયા જર્મની, મેક્સિકો થઈને અમેરિકા પહોંચી હતી. બે વર્ષ સુધી તેને જેલમાં રખાયા બાદ 2019માં ડિપોર્ટ કરવામાં આવી હતી. ડિસેમ્બર-2019માં કિંજલ પટેલ અમેરિકાથી ડિપોર્ટ થઈ દિલ્હી એરપોર્ટ લેન્ડ થઈ ત્યારે તેની તપાસ કરવામાં આવી હતી. જેમાં તેનો ઈન્ડિયાથી બહાર જવાનો રેકોર્ડ ના હોવાનું બહાર આવતા તે નકલી પાસપોર્ટ પર અમેરિકા પહોંચી હોવાથી પૂછપરછ કરવામાં આવી હતી.

ધરપકડ બાદ કિંજલ પટેલે પોલીસને જણાવ્યું હતું કે, તે હમશકલના પાસપોર્ટ પર અમેરિકા ગઈ હતી. આ પાસપોર્ટ તેને હેમાંગ મોદી નામના એજન્ટે ચેન્નઈ એરપોર્ટ પર આપ્યો હતો. હેમાંગે જ કિંજલના પિતા તરીકે ઓળખ આપીને તેનું ઈમિગ્રેશન ક્લીયર કરાવી દીધું હતું.

દિલ્હી એરપોર્ટ પોલીસના DCP ઉષા રંગનાનીના જણાવ્યા મુજબ મેક્સિકો પહોંચ્યા બાદ કિંજલે પોતાનો પાસપોર્ટ એજન્ટને પાછો આપી દીધો હતો. ત્યારબાદ તે બોર્ડર ક્રોસ કરીને અમેરિકામાં દાખલ થઈ હતી. આ કેસમાં હેમાંગ મોદી અને હિતેષ ઉર્ફે બોબીની પોલીસે 2024માં ધરપકડ કરી હતી. પરંતુ પાસપોર્ટ તૈયાર કરનારો ઝાકીરખાન નાસતો ફરતો હતો.

ચોક્કસ બાતમીના આધારે દિલ્હી પોલીસની ટીમે અમદાવાદમાંથી ઝાકીરને ઝડપી લીધો હતો. ઝાકીરે પોલીસ સમક્ષ કબૂલાત કરી હતી કે, તે બે લાખ રૂપિયામાં નકલી ડોક્યુમેન્ટ્સ તૈયાર કરી આપતો હતો તેમજ હેમાંગ અને બોબી માટે તેણે ઘણા લોકોના કામ કર્યા હતા.

કિંજલ પટેલ વર્ષ 2017માં ગેરકાયદે અમેરિકા પહોંચી ત્યારે ત્યાં ટ્રમ્પની સરકાર હતી અને બોર્ડર પર ધરપકડ થયા બાદ કિંજલને બે વર્ષ સુધી જેલમાં રાખવામાં આવી હતી. ડિપોર્ટ ના થવું પડે તે માટે કિંજલે ક્રોસિંગ કરતા પહેલા પોતાના પાસપોર્ટનો પણ વહીવટ કરી નાખ્યો હતો.

ગેરકાયદે અમેરિકા જતાં ગુજરાતીઓને એજન્ટો અત્યાર સુધી ક્રોસિંગ પહેલા પાસપોર્ટ ફાડીને ફેંકી દેવાની સલાહ આપતા હતા. કારણકે જો કોઈ ઈમિગ્રન્ટ પાસે પાસપોર્ટ ના હોય તો તેને ડિપોર્ટ કરવો મુશ્કેલ બની જાય છે.

બાઈડન સરકારના કાર્યકાળ દરમિયાન લોકો બોર્ડર ક્રોસ કર્યા બાદ સામેથી જ પોલીસ પાસે જઈને અસાયલમ માગતા હતા અને થોડા દિવસોમાં જેલમાંથી છૂટી જતા હતા. પરંતુ તે વખતે નકલી પાસપોર્ટ પર લોકોનું અમેરિકા જવાનું તો ચાલુ જ હતું.

ગુજરાતમાં ચાલતી સિસ્ટમ અનુસાર કોઈપણ પેસેન્જર અમેરિકા પહોંચી જાય ત્યારબાદ એકથી ત્રણ મહિનામાં એજન્ટને પેમેન્ટ ચૂકતે કરવાનું હોય છે. જો કોઈ જેલમાંથી છૂટી જ ના શકે કે પછી ઘણો લાંબો સમય અંદર રહે અથવા ડિપોર્ટ થાય તો તેને પેમેન્ટ ચૂકવવાનું હોતું નથી.

કિંજલ પટેલના કેસમાં તેણે એજન્ટને એકેય પૈસો ચુકવ્યો નહીં હોય. પરંતુ ગેરકાયદે અમેરિકા જઈ બે વર્ષ સુધી જેલમાં રહેવું પડ્યું હતું અને ડિપોર્ટેશન બાદ ઈન્ડિયામાં પણ કાયદાકીય કાર્યવાહીનો સામનો કરવો પડ્યો હતો. હાલ અમેરિકામાં ડોનાલ્ડ ટ્રમ્પની સેકન્ડ ટર્મ ચાલી રહી છે. તેવામાં કિંજલ પટેલની જેમ ઘણાં ગુજરાતીઓ એજન્ટોની વાતોમાં આવી અમેરિકા પહોંચ્યા બાદ ઘણા મહિનાથી જેલમાં બંધ છે અને તેમાંના મોટાભાગના લોકોને ડિપોર્ટ કરવાનું પણ શરૂ કરી દેવામાં આવ્યું છે.