દુબઈ અકસ્માતમાં શહીદ પાયલટને અંતિમ વિદાય

દુબઈ એર શો 2025 દરમિયાન ભારતીય વાયુસેનાનું સ્વદેશી ફાઇટર જેટ તેજસ ક્રેશ થતા પાયલટ વિંગ કમાન્ડર નમાંશ સ્યાલ શહીદ થયા હતા. રવિવારે તેમનું પાર્થિવ શરીર હિમાચલ પ્રદેશના કાંગડા જિલ્લામાં તેમના વતન લાવવામાં આવ્યું. આ સમયે તેમનો પરિવાર, સગાં-મિત્રો અને ગામલોકોની આંખો આંસુથી ભીની થઈ ગઈ હતી. તેમની પત્ની, જે ખુદ પણ વિંગ કમાન્ડર છે, પતિને અંતિમ વિદાય આપવા યુનિફોર્મમાં હાજર રહી હતી.

પત્નીનો અંતિમ સેલ્યુટ જોઈ સૌ થઇ ભાવુક : 

શહીદ નમાંશ સ્યાલના પાર્થિવ દેહને પત્નીએ સેલ્યુટ આપતા તેઓ આકરા રડવા લાગ્યા. આ હૃદયસ્પર્શી દૃશ્યે ત્યાં હાજર દરેકના હૃદયને સ્પર્શી લીધા. શહીદની 7 વર્ષીય પુત્રીને હજુ સમજ નથી કે હવે તે પિતાની બાહોમાં રમવા નહીં મળે. તેમના પિતા ગગન કુમાર શિક્ષક છે, અને સમગ્ર વિસ્તારમાં શોકનું વાતાવરણ ફેલાયું છે.

ગામલોકોનું દુઃખ: “અમે એક રત્ન ગુમાવ્યું” : 

પટિયાલકર ગામના સંદીપ કુમારે જણાવ્યું કે નमेंશ પરિવાર જેવા હતા અને તેમની અણધારી શહીદી દરેકને વ્યથિત કરી ગઈ છે. અન્ય રહેવાસી પંકજ ચઢ્ઢાએ જણાવ્યું કે તેઓ નમાંશ સાથે સૈનિક સ્કૂલ સુજાનપુર ટીરામાં ભણ્યા હતા. તેમણે કહ્યું કે દેશે એક તેજસ્વી યુવા અધિકારી ગુમાવ્યો છે.

કોણ હતા શહીદ વિંગ કમાન્ડર નમાંશ સ્યાલ?

34 વર્ષીય નમાંશ સ્યાલ કાંગડા જિલ્લાના પટિયાલકર ગામના વતની હતા. તેઓ હૈદરાબાદ એરબેઝ પર ફરજ બજાવતા હતા અને તેમની શિસ્ત, કુશળતા અને સેવાભાવ માટે જાણીતા હતા. તેમના પરિવારમાં પત્ની, 7 વર્ષીય પુત્રી અને માતાપિતા છે.

દુબઈ એર શોમાં થયો હતો અકસ્માત : 

દુબઈ એર શોમાં ફ્લાઈંગ ડિસ્પ્લે દરમિયાન તેજસ ફાઇટર જેટ અચાનક નિયંત્રણ ગુમાવી પડ્યું અને સ્થળ પર જ નમાંશ સ્યાલ શહીદ થયા હતા. તેમની બહાદુરી અને દેશપ્રેમ માટે સમગ્ર દેશ તેમને નમન કરી રહ્યો છે.