હોમવર્ક બરાબર ન કરતા પિતાએ પુત્રીને મારી નાખી

હરિયાણાના ફરીદાબાદમાં એક કાળજું કંપાવનારી ઘટના સામે આવી છે, જ્યાં એક પિતાએ માત્ર ગણિતનું હોમવર્ક ન કરવા બદલ પોતાની 4 વર્ષની માસૂમ દીકરીની નિર્મમ હત્યા કરી નાખી છે. અભ્યાસના નામે પિતાએ ક્રૂરતાની તમામ હદો વટાવી દીધી અને દીકરીના મોતના સમાચારને અકસ્માતમાં ખપાવવાનો પ્રયાસ પણ કર્યો હતો.

ગણિતના અંક ન લખતા ગુસ્સે ભરાયો પિતા:

બલ્લભગઢના સેક્ટર ૫૮માં રહેતા 31 વર્ષીય કૃષ્ણા જયસ્વાલે તેની દીકરી વંશિકાને 1થી 50 સુધીના અંક લખવા માટે આપ્યા હતા. માસૂમ વંશિકા આ હોમવર્ક બરાબર કરી શકી નહીં, જેનાથી કૃષ્ણા એટલો ગુસ્સે ભરાયો કે તેણે વેલણ વડે દીકરીને ઢોર માર માર્યો. એટલું જ નહીં, તેણે માસૂમને જમીન પર જોરથી પછાડી હતી, જેના કારણે તે બેભાન થઈ ગઈ હતી.

અકસ્માતનું નાટક અને પુત્રની સાક્ષી:

દીકરીને ગંભીર હાલતમાં હોસ્પિટલ લઈ જતી વખતે પિતાએ ડોક્ટરોને ખોટું કહ્યું કે તે સીડી પરથી પડી ગઈ છે. સારવાર દરમિયાન વંશિકાનું મોત થયું હતું. હત્યારો પિતા આ ગુનાને છુપાવી રહ્યો હતો, પરંતુ તેનો 6 વર્ષનો પુત્ર આ સમગ્ર અત્યાચારનો સાક્ષી હતો. જ્યારે માતા નોકરી પરથી ઘરે આવી ત્યારે પુત્રએ પિતાની કરતૂત જણાવી દીધી હતી.

માતાની હિંમત અને પોલીસ કાર્યવાહી:

પોતાની લાડકી દીકરીની હત્યા થઈ હોવાની જાણ થતા જ માતા રંજીતાએ હિંમત દાખવી મોડી રાત્રે પોલીસ કંટ્રોલ રૂમને જાણ કરી હતી. પોલીસે 6 વર્ષના પુત્રના નિવેદન અને પત્નીની ફરિયાદના આધારે ગુરુવારે કૃષ્ણા જયસ્વાલની ધરપકડ કરી લીધી છે. આ ઘટનાએ ફરી એકવાર વાલીઓમાં બાળકોના શિક્ષણ પ્રત્યે વધી રહેલા વિકૃત તણાવ સામે અનેક ગંભીર પ્રશ્નો ઉભા કર્યા છે.