મંડીના ભયાનક પૂરમાં આખો પરિવાર તણાયો પણ 10 મહિનાની બાળકી...

મંડી જિલ્લાના તલવારા ગામમાં વાદળ ફાટવાથી 10 મહિનાની નીતિકાના પરિવારનો જીવ ગયો. તે કદાચ તેના પરિવારની એકમાત્ર જીવિત સભ્ય છે. આ દુ:ખદ ઘટનામાં તેના પિતા, માતા અને દાદી મૃત્યુ પામ્યા હતા અથવા ગુમ થયા હતા.

ગયા મંગળવારે વાદળ ફાટ્યું ત્યારે નીતિકાના 31 વર્ષીય પિતા રમેશ કુમાર બહાર  હતા. બાદમાં તેમનો મૃતદેહ કાટમાળમાંથી મળી આવ્યો હતો. નીતિકાની 24 વર્ષીય માતા રાધા દેવી અને 59 વર્ષીય દાદી પૂર્ણુ દેવી ગુમ થયેલા રમેશને શોધવા નીકળ્યા હતા, પરંતુ બંને હજુ પણ ગુમ છે.

ગામના એક વ્યક્તિ પ્રેમ સિંહે નીતિકાને એકલી રડતી જોઈ અને તેને રમેશના પિતરાઈ ભાઈ બલવંત પાસે લઈ ગયો. બળવંત ભૂતપૂર્વ મુખ્યમંત્રી જય રામ ઠાકુરના અંગત સુરક્ષા અધિકારી છે. તેમણે કહ્યું, "બાળક અમારી સાથે છે."

બળવંતે કહ્યું કે સબ-ડિવિઝનલ મેજિસ્ટ્રેટ (SDM) એ નીતિકા માટે બેંક ખાતું ખોલવાની ઓફર કરી છે, જે આવતીકાલે ખોલવામાં આવશે. એસડીએમએ જણાવ્યું હતું કે આ દુર્ઘટનાના સમાચાર ફેલાતા, ઘણા લોકો છોકરીની મદદ માટે આગળ આવી રહ્યા છે.

વાદળ ફાટવાથી પવારા, થુનાગ, બૈદશાદ, કાંડા અને મુરાદ જેવા વિસ્તારોમાં ભારે નુકસાન થયું છે. રસ્તાઓ, પાણી અને વીજળી યોજનાઓ નાશ પામી છે. મંડી જિલ્લામાં વાદળ ફાટવા, પૂર અને ભૂસ્ખલનની 10 ઘટનાઓમાં અત્યાર સુધીમાં 14 લોકોનાં મોત થયા છે, જ્યારે 31 લોકો હજુ પણ ગુમ છે.

બળવંતે જણાવ્યું હતું કે રમેશે પણ માત્ર છ મહિનાની ઉંમરે તેના પિતાને ગુમાવ્યા હતા. રમેશ ખેડૂત હતો અને તેની આવક ઓછી હતી. પરિવારનો ખર્ચ મોટાભાગે પૂર્ણુ દેવીના પગારથી થતો હતો, જે એક સરકારી શાળામાં પટાવાળા હતા અને સાત મહિના પછી નિવૃત્ત થવાના હતા. નીતિકાના સંબંધીઓને છોકરીના ખર્ચ માટે 25,000 રૂપિયાની આર્થિક સહાય આપવામાં આવી છે.

આ પણ વાંચો---

હિમાચલમાં ભારે વરસાદમાં તણાઇ ગયા બેંકમાં રહેલા કરોડો રુપિયા અને દાગીના