છત્તીસગઢના સુકમા જિલ્લામાં સુરક્ષા દળોને માઓવાદીઓ (નક્સલીઓ) વિરુદ્ધની લડાઈમાં મોટી સફળતા મળી છે. રવિવારે સવારે ભેજ્જી-ચિંતાગુફા સરહદ પર આવેલા તુમાલપાડ જંગલમાં થયેલી ભીષણ અથડામણમાં સુરક્ષા દળોએ કુલ ₹15 લાખના ઈનામી ત્રણ કુખ્યાત નક્સલીઓને ઠાર માર્યા છે.
માર્યા ગયેલા નક્સલીઓમાં જનમિલિશિયા કમાન્ડર અને સ્નાઈપર સ્પેશિયાલિસ્ટ તરીકે જાણીતો માડવી દેવાનો પણ સમાવેશ થાય છે.
ઓપરેશન અને ઓળખ
સુકમાના પોલીસ અધિક્ષક (SP) કિરણ ચવ્હાણના જણાવ્યા અનુસાર, જંગલમાં મોટા નક્સલી નેતાઓની હાજરીની ચોક્કસ માહિતીના આધારે ડિસ્ટ્રિક્ટ રિઝર્વ ગાર્ડ (DRG)ની ટીમને સર્ચ ઓપરેશન માટે મોકલવામાં આવી હતી. રવિવારે સવારથી જ સુરક્ષા દળો અને નક્સલીઓ વચ્ચે છૂટીછવાઈ ગોળીબારી શરૂ થઈ હતી, જે લાંબા સમય સુધી ચાલી. અથડામણ બાદ સર્ચિંગ દરમિયાન ત્રણેય નક્સલીઓના મૃતદેહ મળી આવ્યા હતા.
મૃતક નક્સલીઓની ઓળખ માડવી દેવા, પોડિયમ ગંગી અને સોડી ગંગી તરીકે કરવામાં આવી છે. આ ત્રણેય પર પાંચ-પાંચ લાખ રૂપિયાનું મોટું ઇનામ જાહેર કરાયું હતું. ઘટનાસ્થળેથી સુરક્ષા દળોએ એક .303 રાઇફલ, બીજીએલ (બેરલ ગ્રેનેડ લોન્ચર્સ) અને મોટી માત્રામાં ગોળા-બારૂદ પણ જપ્ત કર્યો છે.
માસ્ટરમાઇન્ડ હતો માડવી દેવા
માડવી દેવા એક કુખ્યાત જનમિલિશિયા કમાન્ડર, સ્નાઈપર સ્પેશિયાલિસ્ટ અને એરિયા કમિટીનો સભ્ય હતો. તે નિર્દોષ ગ્રામીણોની હત્યાઓ અને સ્નાઈપર હુમલાઓ માટે જવાબદાર હતો. મહત્વની વાત એ છે કે, 9 જૂનના રોજ થયેલા આઇઇડી (IED) બ્લાસ્ટમાં શહીદ થયેલા ASP આકાશ રાવની ઘટનાનો તે મુખ્ય માસ્ટરમાઇન્ડ હતો.
બસ્તરમાં નક્સલવાદ તેના અંતિમ તબક્કામાં
આ સફળતા બાદ IGP બસ્તર રેન્જના આઈજીપી સુંદરરાજ પટ્ટલિંગમે જણાવ્યું કે બસ્તરમાં નક્સલવાદ હવે તેના અંતિમ તબક્કામાં છે. તેમણે ઉમેર્યું કે, છેલ્લા બે વર્ષમાં 450 જેટલા નક્સલીઓ માર્યા ગયા છે, જે સંગઠનની નબળાઈ અને નબળી પડતી તાકાત દર્શાવે છે. આઈજીપીએ નક્સલી કેડરોને હિંસાનો માર્ગ છોડીને પુનર્વસન નીતિ અપનાવવા માટે અપીલ કરી છે. હાલમાં આ વિસ્તારમાં DRG, બસ્તર ફાઇટર્સ અને CRPF દ્વારા સંયુક્ત રીતે વ્યાપક સર્ચ ઓપરેશન ચલાવવામાં આવી રહ્યું છે.

15 લાખના ઇનામ વાળા 3 નક્સલી ઠાર

સ્નાઈપર સ્પેશિયાલિસ્ટ માડવી દેવા સહિત ત્રણ ઈનામી નક્સલીઓનો ખાતમો

November 16, 2025 | 21:19 IST