દિલ્હીના ઉત્તમ નગરના હસ્તસાલ ગામમાં આ વર્ષે ઈદનો તહેવાર અગાઉ જેવો રહ્યો નથી. અંદાજે બે અઠવાડિયા પહેલા હોળીના દિવસે થયેલી હિંસા અને 26 વર્ષીય તરુણ કુમારની હત્યા બાદ વિસ્તારમાં હજુ પણ ભારે તંગદિલી પ્રવર્તી રહી છે.&nbsp;
ઈદના પર્વે સામાન્ય રીતે ધમધમતા બજારો અને સાંકડી ગલીઓમાં આ વખતે ઉત્સાહને બદલે સન્નાટો અને પોલીસનો કડક પહેરો જોવા મળી રહ્યો છે.
સમગ્ર વિવાદ:
ઘટનાની શરૂઆત 4 માર્ચના રોજ થઈ હતી, જ્યારે 11 વર્ષની એક બાળકીએ અગાસી પરથી પાણીનો ફુગ્ગો (બલૂન) ફેંક્યો હતો જે એક મુસ્લિમ મહિલાને વાગ્યો હતો. આ સામાન્ય બાબતે બંને પરિવારો વચ્ચે ઉગ્ર દલીલો થઈ અને જોતજોતામાં મામલો બિચક્યો હતો.
આ અથડામણમાં 8 લોકો ઘાયલ થયા હતા, જેમાં તરુણ કુમાર ગંભીર રીતે ઈજાગ્રસ્ત થયો હતો અને બાદમાં તેનું હોસ્પિટલમાં મોત નીપજ્યું હતું.
પોલીસ કાર્યવાહી
તરુણની હત્યાના કેસમાં અત્યાર સુધીમાં 14 લોકોની ધરપકડ કરવામાં આવી છે અને 2 સગીરોની અટકાયત કરાઈ છે. સોશિયલ મીડિયા પર ભડકાવ ભાષણો અને પોસ્ટને કારણે સ્થિતિ વધુ ન બગડે તે માટે દિલ્હી પોલીસ અને CRPF દ્વારા લોખંડી બંદોબસ્ત ગોઠવવામાં આવ્યો છે. 'વજ્ર' અને 'વિક્રાંત' જેવા તોફાન વિરોધી વાહનો તૈનાત કરવામાં આવ્યા છે અને દરેક શેરીના પ્રવેશદ્વાર પર બેરિકેડ્સ મુકાયા છે.
સ્થાનિક વેપારીઓના જણાવ્યા અનુસાર, દર વર્ષે ઈદ નિમિત્તે હજારો રૂપિયાનો વેપાર થતો હતો, જે આ વખતે ડરને કારણે 60-70% ઘટી ગયો છે. 18 વર્ષીય વૈશાલી કુમાર જે સેવૈયાં વેચે છે, તેણે જણાવ્યું કે, "દર વર્ષે અમે રોજના 10,000 રૂપિયાનો માલ વેચતા હતા, પણ આ વખતે લોકો ભયના માર્યા બજારમાં આવતા જ નથી." 7 વર્ષની નાની બાળકી રાબિયાએ પણ નિરાશા વ્યક્ત કરતા કહ્યું કે આ વખતે ઈદમાં અગાઉ જેવી રોનક નથી.
દિલ્હી હાઈકોર્ટ પણ આ વિસ્તારની સુરક્ષા વ્યવસ્થા પર નજર રાખી રહી છે જેથી ઈદના પર્વે કોઈ અનિચ્છનીય ઘટના ન બને.

દિલ્હીમાં ફિક્કી પડી ઈદની રોનક

તરુણ હત્યાકાંડ બાદ કોમી તંગદિલી; CRPF અને દિલ્હી પોલીસ તૈનાત, ઉત્તમ નગરમાં ભયનું વાતાવરણ

March 21, 2026 | 14:23 IST