કોર્ટમાં ED VS TMC: I-PAC પર દરોડા બાદ વિરોધ

પશ્ચિમ બંગાળમાં કેન્દ્રીય તપાસ એજન્સીઓના દરોડાને લઈને રાજકીય વાતાવરણ અત્યંત ગરમાયું છે. મુખ્યમંત્રી મમતા બેનર્જી આજે શુક્રવારે કોલકાતામાં એક વિશાળ વિરોધ કૂચનું નેતૃત્વ કરવા જઈ રહ્યા છે. આ વિરોધ પ્રદર્શન બપોરે 2:00 વાગ્યે 8B બસ સ્ટેન્ડથી શરૂ થઈને હાઝરા મોર સુધી ચાલશે. આ વિરોધ કૂચનું મુખ્ય કારણ બુધવારે I-PACની ઓફિસ પર ED દ્વારા પાડવામાં આવેલા દરોડા છે, જેમાં TMC એ લોકશાહી પર હુમલો ગણાવ્યો છે. મમતા બેનર્જીએ આરોપ લગાવ્યો છે કે, EDએ ગેરકાયદેસર રીતે પાર્ટીનો ડેટા, લેપટોપ અને રણનીતિઓ જપ્ત કરી છે, જે એક ગંભીર ગુનો છે.

I-PAC વચ્ચેના હવાલા નેટવર્કની તપાસ

બીજી તરફ, એન્ફોર્સમેન્ટ ડિરેક્ટોરેટે આક્ષેપોને નકારી કાઢતા વળતો પ્રહાર કર્યો છે. EDએ દાવો કર્યો છે કે, તપાસ દરમિયાન મમતા બેનર્જી પોતે પ્રતીક જૈનના નિવાસસ્થાને ગયા હતા અને ત્યાંથી મહત્વના પુરાવાઓ અને ઇલેક્ટ્રોનિક ઉપકરણો લઈ ગયા હતા. એજન્સીએ વધુમાં જણાવ્યું કે, CMના કાફલાએ I-PAC ઓફિસ પર જઈને તપાસમાં અવરોધ ઊભો કર્યો હતો અને ભૌતિક દસ્તાવેજો બળજબરીથી દૂર કર્યા હતા. EDના જણાવ્યા મુજબ, આ દરોડા કોઈ રાજકીય પક્ષ વિરુદ્ધ નથી પરંતુ 2020ના કોલસા કૌભાંડ અને મની લોન્ડરિંગના કેસ સાથે જોડાયેલા છે, જેમાં શાકંભરી ગ્રુપ અને I-PAC વચ્ચેના હવાલા નેટવર્કની તપાસ કરવામાં આવી રહી છે.

આ પણ વાંચો: I-PAC પર EDના દરોડા વચ્ચે મમતા બેનર્જી પહોંચ્યા

મમતા બેનર્જીનો તપાસ એજન્સીઓને ડરાવવાનો પ્રયાસ

આ સંઘર્ષ હવે કલકત્તા હાઈકોર્ટના દ્વારે પહોંચ્યો છે. તૃણમૂલ કોંગ્રેસે ED વિરુદ્ધ કેસ દાખલ કર્યો છે, જેની સુનાવણી આજે થવાની છે. સામા પક્ષે EDએ પણ હાઈકોર્ટમાં અરજી કરી છે કે રાજ્ય પ્રશાસન અને પોલીસ દ્વારા તેમની કાયદેસરની તપાસમાં અવરોધ પેદા કરવામાં આવી રહ્યો છે. દરમિયાન, કોલકાતા પોલીસે પણ ED વિરુદ્ધ 2 કેસ નોંધ્યા છે. ભાજપે આ સમગ્ર ઘટનાક્રમ પર પ્રહાર કરતા કહ્યું છે કે, જો છુપાવવા માટે કંઈ નથી તો મુખ્યમંત્રી શા માટે પુરાવાઓ દૂર કરવા માટે આટલી ઉતાવળ કરી રહ્યા છે? ભાજપે આક્ષેપ કર્યો છે કે, મમતા બેનર્જી તપાસ એજન્સીઓને ડરાવવાનો પ્રયાસ કરી રહ્યા છે.

અભિષેક બેનર્જી મતુઆ સમુદાયના ગઢ ગણાતા

રાજકીય મોરચે પણ હલચલ તેજ છે. એક તરફ અભિષેક બેનર્જી મતુઆ સમુદાયના ગઢ ગણાતા બોનગાંવની મુલાકાતે છે, તો બીજી તરફ ભાજપના રાષ્ટ્રીય અધ્યક્ષ જે.પી. નડ્ડા પણ બંગાળના પ્રવાસે છે. નડ્ડાએ પક્ષના સંગઠનાત્મક બેઠકો યોજી છે અને AIIMS કલ્યાણીની મુલાકાત લેવાના છે. પશ્ચિમ બંગાળમાં કેન્દ્રીય એજન્સીઓ અને રાજ્ય સરકાર વચ્ચેનો આ ટકરાવ આગામી ચૂંટણીઓ પહેલા મોટા રાજકીય યુદ્ધનું સ્વરૂપ લઈ રહ્યો હોય તેવું જણાય છે.