ઝારખંડ વિધાનસભાની ચૂંટણીઓ વચ્ચે EDના દરોડા, અનેક IAS અધિકારીઓને ત્યાં તપાસ

ઝારખંડ વિધાનસભાની ચૂંટણીઓ વચ્ચે EDના દરોડાથી હડકંપ મચી જવા પામ્યો છે. ED મંગળવારે સવારથી ઝારખંડના વરિષ્ઠ IAS વિનય ચૌબે અને આબકારી વિભાગના સંયુક્ત સચિવ ગજેન્દ્ર સિંહના ઘરો અને તેમના નજીકના સંબંધીઓને ત્યાં તપાસનો ધમધમાટ ચાલી રહ્યો છે. તપાસ અને શોધખોળ માટે EDની ટીમો બંને અધિકારીઓના ચાર્ટર્ડ એકાઉન્ટન્ટ્સને પણ તપાસી રહી છે.   દારૂ કૌભાંડનો આ મામલો છત્તીસગઢ અને ઝારખંડ બંને રાજ્યો સાથે સંબંધિત છે. આ સંદર્ભે, છત્તીસગઢના ભ્રષ્ટાચાર વિરોધી બ્યુરો અને આર્થિક અપરાધ વિંગ (EOW) એ ગયા મહિને સાત લોકો વિરુદ્ધ FIR નોંધી હતી.જેમાં ઝારખંડના એક્સાઇઝ વિભાગના તત્કાલિન સચિવ વિનય ચૌબે અને સંયુક્ત સચિવ ગજેન્દ્ર સિંહ સહિત સાત લોકોને આરોપી બનાવવામાં આવ્યા હતા.એફઆઈઆરમાં કહેવામાં આવ્યું છે કે આ લોકોએ સાથે મળીને ઝારખંડની દારૂની નીતિમાં કથિત રીતે છેડછાડ કરી અને સરકારી તિજોરીને નુકસાન પહોંચાડ્યું. ACB અને EOWની આ FIRના આધારે કેન્દ્રીય તપાસ એજન્સી EDએ તપાસ શરૂ કરી છે.   આ કેસમાં અન્ય આરોપીઓમાં છત્તીસગઢના પૂર્વ આઈએએસ અધિકારી અનિલ તુટેજા, બિઝનેસમેન અનવર ઢેબર, છત્તીસગઢ સ્ટેટ માર્કેટિંગ કોર્પોરેશનના પૂર્વ મેનેજિંગ ડિરેક્ટર અરુણપતિ ત્રિપાઠી, આઈએએસ અધિકારી અને પૂર્વ એક્સાઈઝ કમિશનર નિરંજન દાસ, અરવિંદ સિંહ અને નોઈડાના બિઝનેસમેન વિધુના નામ સામેલ છે.   આ મામલામાં  રાંચીના અરગોરાના રહેવાસી વિકાસ સિંહની ફરિયાદને આધારે FIR દાખલ કરવામાં આવી હતી. જેમાં દાવો કરવામાં આવ્યો હતો કે  આરોપીઓની એક સિન્ડિકેટ રાજ્યની આબકારી નીતિમાં ફેરફાર કરવા માટે ઝારખંડના અધિકારીઓ સાથે મળી હતી. જેથી સિન્ડિકેટના સભ્યોને દારૂના સપ્લાયના કોન્ટ્રાક્ટ મળી શકે. આ સાતે જ આરોપ હતો કે આ સિન્ડિકેટ હિસાબ વગર નકલી હોલોગ્રામ વડે દેશી દારૂનું વેચાણ કરે છે અને કેટલીક ચોક્કસ કંપનીઓને ગેરકાયદેસર રીતે વિદેશી દારૂ પૂરો પાડીને કરોડો રૂપિયાની ગેરકાયદે કમાણી કરે છે. FIR મુજબ, ઝારખંડના આઈએએસ વિનય ચૌબે અને જોઈન્ટ એક્સાઈઝ કમિશનર ગજેન્દ્ર સિંહે તેમના વરિષ્ઠ અધિકારીઓના સમર્થનથી ટેન્ડરના નિયમોમાં સુધારો કર્યો અને આવા ટર્નઓવરની શરત ઉમેરી,જેથી સિન્ડિકેટને જ આ કોન્ટ્રાક્ટ મળી શકે. આ નીતિના કારણે 2022 અને 2023 વચ્ચે ઝારખંડ સરકારની તિજોરીને ભારે નાણાકીય નુકસાન પહોંચાડવાનું ષડયંત્ર રચવામાં આવ્યું હતું.   આ પહેલા, છત્તીસગઢના દારૂ કૌભાંડને લઈને એપ્રિલ 2023માં ઝારખંડના IAS વિનય ચૌબે અને કરણ સત્યાર્થીને EDના રાયપુર યુનિટે સમન્સ પાઠવ્યા હતા અને તેમના નિવેદનો નોંધ્યા હતા.