દિવ્યાંગ ‘ઓમ’ને સુંદરકાંડ-ગીતા સહિતાના 2000થી વધુ શ્લોક કંઠસ્થ

 અમદાવાદના 18 વર્ષીય દિવ્યાંગ ઓમ જીગ્નેશ વ્યાસે રાષ્ટ્રીય સ્તરે પોતાના પરિવાર સહિત સમગ્ર ગુજરાતનું નામ રોશન કર્યું છે. ડિસેમ્બર મહિનાના અંતમાં વીર બાળ દિવસ નિમિત્તે નવી દિલ્હીમાં આયોજિત સમારંભમાં દેશના વિવિધ રાજ્યમાંથી આવેલા 17 બાળકોને તેમની અસાધારણ સિદ્ધિઓ માટે પ્રધાનમંત્રી રાષ્ટ્રીય બાળ પુરસ્કાર એનાયત કરવામાં આવ્યા હતા. જેમાં ગુજરાતના અમદાવાદ શહેરમાં રહેતા દિવ્યાંગ બાળક ઓમ જીગ્નેશ વ્યાસને પણ રાષ્ટ્રપતિ દ્રૌપદી મુર્મુના હસ્તે બાળ પુરસ્કાર એનાયત કરવામાં આવ્યો હતો. કારણ કે, શારીરિક અને માનસિક રીતે દિવ્યાંગ ઓમ જીગ્નેશ વ્યાસને સુંદરકાંડ અને ભાગવત ગીતા સહિતના 2000થી પણ વધુ શ્લોક કંઠસ્થ છે. તેણે જાતે જ આ સિદ્ધિ ફક્ત શ્લોક સાંભળીને હાંસલ કરી છે. આસાથે જ વિશેક વર્લડ ઓફ રેકોર્ડની બુકમાં તેનું નામ નોંધાયેલું છે.

 ઓમ વ્યાસની સાથે વાત કરવા બેનેફીટ ન્યુજની ટીમ પહોંચી હતી. ઓમ વ્યાસના પરીવારે જણાવ્યું કે  તે બિલકુલ પણ લખી કે વાંચી શકતો નથી, પરંતુ તેને સુંદરકાંડ તથા ભગવત ગીતાના શ્લોકો સહિત સંસ્કૃતના 2000થી વધુ શ્લોકો કંઠસ્થ છે. આશ્ચર્યની વાત છે કે, ઓમ માત્ર ભક્તિના ગીતો અને શ્લોકોમાં જ રુચિ ધરાવે છે, આ સિવાય અન્ય કોઈપણ પ્રકારનું મ્યુઝિક અથવા તો હિન્દી ગીતો અને બોલીવુડ ગીતો તથા ગરબામાં તેને રુચિ નથી. તેના માટે મનોરંજનનું સાધન એટલે માત્ર આધ્યાત્મિક ભક્તિ ગીતો છે. ઓમની ઉંમર જેમ જેમ વધતી જાય છે તેમતેમ આધ્યાત્મિક ક્ષેત્રે તેની અભિરુચિ વધતી જાય છે. ઓમને અન્ય કોઈ સ્થળ પર જવા કરતા મંદિરે જવું ખૂબ જ પસંદ છે.

આગળ વાત કરતા ઓમ વ્યાસના માતા વર્ષાબેન વ્યાસે જણાવ્યું હતું કે, આ ઉપરાંત હનુમાન ચાલીસા, શિવ મહિમ્ન સ્ત્રોત, શિવ માનસ પૂજા, રામ રક્ષાસ્ત્રોત, શિવ તાંડવ, ગાયત્રી મંત્ર, ગાયત્રી ચાલીસા અને મારી હૂંડી સ્વીકારો મહારાજ, શંભુ શરણે પડી વગેરે જેવા ભજનો કંઠસ્થ છે અને નવાઈની વાત કે આ બધું ઓમ વ્યાસે સાંભળી સાંભળીને કંઠસ્થ કર્યું છે. તાજેતરમાં જ રાષ્ટ્રપતિને હસ્તે સામાન્ય બાળકોની સાથે જ તેને એવોર્ડ મળ્યો છે તે અમારા માટે ખૂબ જ ગૌરવની લાગણી છે. 17 જેટલા બાળકોને રાષ્ટ્રપતિને હસ્તે સન્માનિત કરવામાં આવ્યા હતા, જેમાંથી બે બાળકો જ દિવ્યાંગ હતા, તેમ છતાં તેમને સામાન્ય બાળકોની સાથે જ તુલના કરીને એવોર્ડ આપવામાં આવ્યો છે.