આ રહ્યું તહેવારોનું લિસ્ટ

દિવાળી 2025: શ્રી કાશી વિદ્વત પરિષદે નક્કી કરી તારીખ, 20 ઓક્ટોબરે ઉજવાશે તહેવાર

શ્રી કાશી વિદ્વત પરિષદે દિવાળીની તારીખ અને મુહૂર્તને લઈને એક મહત્વપૂર્ણ બેઠક યોજી હતી, જેમાં વિવિધ ધાર્મિક ગ્રંથો અને પંચાંગોની તુલના કરીને નિર્ણય લેવાયો કે 2025માં દિવાળી સમગ્ર ભારતમાં 20 ઓક્ટોબરે ઉજવવામાં આવશે. પરિષદે સ્પષ્ટતા કરી કે 21 ઓક્ટોબરે દિવાળી દર્શાવતાં કેલેન્ડરો ધર્મશાસ્ત્ર અને પરંપરા અનુસાર યોગ્ય નથી. આ નિર્ણય સાથે તમામ પંચાંગ નિર્માતાઓ સહમત થયા છે, અને આ નિર્ણય દેશભર માટે જારી કરવામાં આવ્યો છે.

તિથીઓની ગરબડથી બચવા 2026થી એકરૂપતા

બેઠકમાં એ પણ નોંધાયું કે આ વર્ષે ઘણા પંચાંગોમાં તિથીઓ આગળ-પાછળ દર્શાવાઈ છે, જેના કારણે મૂંઝવણ સર્જાઈ હતી. વિદ્વાનોએ નિર્ણય લીધો કે 2026થી આવી ભૂલો નહીં થાય અને તમામ પંચાંગોમાં તારીખો તથા તહેવારોની એકરૂપતા જળવાશે. આ નિર્ણયથી ભવિષ્યમાં ધાર્મિક તહેવારોની ઉજવણીમાં એકસમાનતા આવશે.

અમાસનો સમયગાળો અને લક્ષ્મી પૂજનનું મહત્વ

પરિષદે જણાવ્યું કે 2025માં અમાસનો સમયગાળો 20 ઓક્ટોબરના પ્રદોષ કાળ સુધી લંબાય છે, જે દેવી લક્ષ્મીની પૂજા માટે અત્યંત શુભ માનવામાં આવે છે. 21 ઓક્ટોબરે અમાસ ફક્ત ત્રણ કલાક રહેશે, જ્યારે વૃદ્ધિ ગામિની પ્રતિપદા સાડા ત્રણ કલાક સુધી રહેશે, જેના કારણે 20 ઓક્ટોબર જ દિવાળી માટે યોગ્ય ગણાયો છે.

દિવાળીના દિવસે દેવી લક્ષ્મીની પૂજા કરવાનું વિશેષ મહત્વ છે. શાસ્ત્રો અનુસાર, આ પૂજા ઘરમાં સુખ, સમૃદ્ધિ અને શાંતિ લાવે છે. લક્ષ્મીની સાથે ગણેશજીની પૂજા પણ આવશ્યક માનવામાં આવે છે, કારણ કે લક્ષ્મી ધનની દેવી છે, જ્યારે ગણેશજી બુદ્ધિના દેવતા છે. આ બંનેનું સંયોજન ઘરના લોકોને ધનનો સમજદારીપૂર્વક ઉપયોગ કરવાની શક્તિ આપે છે.

શાસ્ત્રોમાં લક્ષ્મી પૂજાના નિયમો

શાસ્ત્રોમાં દેવી લક્ષ્મીની પૂજા માટે ખાસ નિયમો જણાવાયા છે. નિયમિત પૂજા અને આ નિયમોનું પાલન કરવાથી લક્ષ્મી ઘરમાં કાયમ નિવાસ કરે છે. શુક્રવાર લક્ષ્મી પૂજા માટે ખાસ દિવસ માનવામાં આવે છે, અને આ દિવસે લક્ષ્મીની મૂર્તિની સ્થાપના કરવી શુભ ગણાય છે. શુક્ર ગ્રહની પૂજાથી પણ શુભ પરિણામો મળે છે અને જન્મકુંડળીના દોષો દૂર થાય છે.

બ્રહ્મ પુરાણ અનુસાર, આસો અમાસની મધ્યરાત્રિએ લક્ષ્મી લોકોના ઘરે આવે છે, તેથી ઘરની સફાઈ અને સજાવટ કરીને દિવાળી ઉજવવામાં આવે છે. શ્રીમદ્ ભાગવત અને વિષ્ણુધર્મોત્તર પુરાણ અનુસાર, આસો અમાસના દિવસે સમુદ્ર મંથનમાંથી લક્ષ્મી પ્રગટ થયા હતા, જેના કારણે આ દિવસે લક્ષ્મી પૂજાની પરંપરા શરૂ થઈ. માર્કંડેય પુરાણમાં ઉલ્લેખ છે કે લક્ષ્મીના તેજસ્વી પ્રકાશથી વિશ્વનું સર્જન થયું, જે આ દિવસે પૂજાનું મહત્વ દર્શાવે છે. ઉપરાંત, ભગવાન રામના અયોધ્યા પરત ફરવાના સ્વાગતમાં પણ દિવાળી ઉજવાય છે.

DISCLAIMER

આ લેખ ધાર્મિક માહિતી પર આધારિત છે અને ન્યૂઝના હેતુસર પ્રકાશિત કરવામાં આવ્યો છે. આ માહિતીને સત્ય માની લેવી જરૂરી નથી, કારણ કે ધર્મ દરેકની આસ્થાનો વિષય છે. આ માહિતીનું પાલન કરતા પહેલાં ધર્મશાસ્ત્રના જાણકાર વિદ્વાનોની સલાહ લેવી આવશ્યક છે. કોઈ મુશ્કેલી સર્જાય તો તેની જવાબદારી લેખની નહીં રહે.