ઉત્તરાખંડના ચમોલીમાં વાદળ ફાટવાથી વિનાશ

બુધવારે મોડી રાત્રે ઉત્તરાખંડના ચમોલી જિલ્લામાં વાદળ ફાટવાની ઘટના બની, જેના કારણે નંદનગર પંચાયતના 2 ગામો કુંત્રી અને ધૂર્મા માં ભારે વિનાશ સર્જાયો. આ અચાનક આવેલી કુદરતી આફતને કારણે થયેલા નુકસાનમાં, 5 લોકો ગુમ થયા હોવાના અહેવાલ હતા, જેમાંથી 2ને બચાવ ટીમોએ સુરક્ષિત રીતે બહાર કાઢ્યા છે, જ્યારે બાકીના 3ની શોધખોળ હજુ ચાલુ છે. આ ઘટનાની જાણ થતાં જ મેડિકલ ટીમો, NDRF અને SDRFની ટીમો તાત્કાલિક ઘટનાસ્થળે પહોંચી ગઈ હતી.

મકાનો અને પશુધનને ભારે નુકસાન

પ્રાથમિક માહિતી અનુસાર, નગર પંચાયત નંદનગરના વોર્ડ કુંત્રી લગાપાલીમાં ભારે વરસાદને કારણે મોટી માત્રામાં કાટમાળ ધસી આવ્યો હતો. આ વિનાશક પ્રવાહમાં 6 મકાનો સંપૂર્ણપણે નાશ પામ્યા. ધૂર્મા ગામમાં પણ વાદળ ફાટવાને કારણે 5 ઘરોને નુકસાન પહોંચ્યું છે. આ ઘટનામાં પશુધનને પણ મોટા પાયે નુકસાન થયું છે, જેની માહિતી તપાસ દરમિયાન સામે આવી છે. સ્થાનિક લોકોના જણાવ્યા અનુસાર, આ ઘટના રાત્રિ દરમિયાન બની હોવાથી લોકોને બચાવ માટે પૂરતો સમય મળ્યો ન હતો.

આ પણ વાંચો: દેહરાદૂનમાં વાદળ ફાટ્યું: 100 લોકોનું રેસ્ક્યૂ

તાત્કાલિક રાહત અને બચાવ કામગીરી

સ્થાનિક પ્રશાસન અને આપત્તિ વ્યવસ્થાપન ટીમોએ યુદ્ધના ધોરણે રાહત અને બચાવ કામગીરી શરૂ કરી દીધી છે. સ્ટેટ ડિઝાસ્ટર રિસ્પોન્સ ફોર્સની એક ટીમ નંદપ્રયાગ પહોંચી ચૂકી છે, અને નેશનલ ડિઝાસ્ટર રિસ્પોન્સ ફોર્સની એક ટીમ પણ ગોચરથી નંદપ્રયાગ જવા રવાના થઈ છે. ચીફ મેડિકલ ઓફિસરે ઈજાગ્સ્તોને તાત્કાલિક સારવાર આપવા માટે 3 108 એમ્બ્યુલન્સ અને એક મેડિકલ ટીમ ઘટનાસ્થળે મોકલી આપી છે. બચાવ ટીમો ગુમ થયેલા લોકોને શોધવા માટે સતત પ્રયાસો કરી રહી છે.