દિલ્હી-NCRમાં પ્રદૂષણ વધ્યું, AQI 380ને પાર

સેન્ટ્રલ પોલ્યુશન કંટ્રોલ બોર્ડના ડેટા મુજબ, રવિવારે દિલ્હી-NCRની હવાની ગુણવત્તા ‘ખૂબ જ ખરાબ’ શ્રેણીમાં રહી, અને સરેરાશ એર ક્વોલિટી ઇન્ડેક્સ 380 પર પહોંચી ગયો. સવારે 7:15 વાગ્યે, જહાંગીરપુરીમાં AQI 438 નોંધાયો, જે સંપૂર્ણપણે ‘ગંભીર’ શ્રેણીમાં આવે છે, જ્યારે બવાનામાં 431, આનંદ વિહારમાં 427 અને અશોક વિહારમાં 421 પણ ‘ગંભીર પ્રદૂષણ’નું સ્તર દર્શાવે છે. NCR ક્ષેત્રમાં, નોઇડાની એર ક્વોલિટી 396 AQI સાથે ગંભીર માર્કથી સહેજ નીચે રહી. ગ્રેટર નોઈડામાં 380 નોંધાયો, જેને ‘ખૂબ જ ખરાબ’ શ્રેણીમાં મૂકવામાં આવ્યો, જ્યારે ગાઝિયાબાદમાં 426 નોંધાયો, જે ‘ગંભીર’ શ્રેણીમાં આવે છે. ગુરુગ્રામ અને ફરીદાબાદનું પ્રદર્શન થોડું સારું રહ્યું, જ્યાં AQI સ્તર અનુક્રમે 286 અને 228 રહ્યું, જે બંને ‘ખરાબ’ રેન્જમાં આવે છે.

ગ્રેડેડ રિસ્પોન્સ એક્શન પ્લાનમાં ફેરફાર

વધતા પ્રદૂષણના સ્તરને ધ્યાનમાં રાખીને, NCR અને આસપાસના વિસ્તારો માટે એર ક્વોલિટી મેનેજમેન્ટ કમિશન એ શનિવારે ગ્રેડેડ રિસ્પોન્સ એક્શન પ્લાનમાં ફેરફાર કર્યા છે. એક અખબારી યાદીમાં, CAQM એ જણાવ્યું કે, જે પગલાં અગાઉ ગ્રેપ સ્ટેજ 4 હેઠળ ‘ગંભીર’ શ્રેણી માટે આરક્ષિત હતા, તે હવે સ્ટેજ 3માં લાગુ કરવામાં આવશે. આ પગલાંઓમાં ડીઝલ જનરેટરનો ઉપયોગ ઘટાડવા માટે અવિરત વીજળી સપ્લાય સુનિશ્ચિત કરવી, ટ્રાફિક જામવાળા સ્થળોએ વધુ લોકો તૈનાત કરવા, મીડિયા પ્લેટફોર્મ પર પ્રદૂષણના એલર્ટ જારી કરવા, અને સર્વિસ ફ્રીક્વન્સી વધારીને CNG અને ઈલેક્ટ્રિક પબ્લિક ટ્રાન્સપોર્ટ ફ્લીટને વધારવા, તેમજ ઓફ-પીક મુસાફરીને પ્રોત્સાહન આપવા માટે અલગ-અલગ ભાડાં નક્કી કરવાનો સમાવેશ થાય છે.

આ પણ વાંચો: દિલ્હીમાં AQI 400ને પાર, GRAP-III લાગુ

સરકારી ઓફિસો માટે કામના કલાકો અલગ-અલગ

અગાઉ ‘ખૂબ જ ખરાબ’ શ્રેણી માટે સ્ટેજ 3માં રાખવામાં આવેલા કેટલાક પગલાંને હવે સ્ટેજ 2માં ખસેડવામાં આવ્યા છે. જેમાં દિલ્હી, ગુરુગ્રામ, ફરીદાબાદ, ગાઝિયાબાદ અને ગૌતમ બુદ્ધ નગરમાં સરકારી ઓફિસો માટે કામના કલાકો અલગ-અલગ કરવાનો સમાવેશ થાય છે. કેન્દ્ર સરકાર પણ આ વિસ્તારમાં તેની ઓફિસો માટે સમય અલગ-અલગ કરવા પર વિચાર કરી શકે છે.

રાજધાની સતત બગડતી એર ક્વોલિટી

પહેલાં ‘ગંભીર’ AQI દરમિયાન સ્ટેજ 4 માટે જે નિયંત્રણો હતા, જેમ કે પબ્લિક, મ્યુનિસિપલ અને પ્રાઇવેટ ઓફિસોને માત્ર 50 ટકા સ્ટાફ સાથે કામ કરવાની મંજૂરી આપવી અને બાકીના કર્મચારીઓને ઘરેથી કામ કરવા માટે કહેવું, તે હવે સ્ટેજ IIIમાં લાગુ થશે. આ દરમિયાન, દિલ્હી સરકારે પ્રાઈવેટ ઓફિસોને પણ સાવચેતીના ભાગરૂપે 50 ટકા ઓન-સાઈટ સ્ટાફ સાથે કામ કરવા અને બાકીનાને ઘરેથી કામ કરવાની મંજૂરી આપવાનો નિર્દેશ આપ્યો છે, કારણ કે રાજધાની સતત બગડતી એર ક્વોલિટી સામે ઝઝૂમી રહી છે.