દિલ્હીમાં થયેલા બોમ્બ બ્લાસ્ટ કેસમાં સંડોવણીના આરોપો બાદ અલ-ફલાહ યુનિવર્સિટી સતત તપાસના કેન્દ્રમાં છે. આ કેસમાં રેડ ફોર્ટ બ્લાસ્ટર ડૉ. ઉમર ઉન નબી અને જૈશ-એ-મોહમ્મદ (JeM) સાથે જોડાયેલા ફરીદાબાદ ટેરર ​​મોડ્યુલના અન્ય આરોપીઓ આ યુનિવર્સિટીમાં કામ કરતા હતા, જેના પગલે હવે યુનિવર્સિટીના સ્થાપક અને ચેરમેન જાવેદ અહેમદ સિદ્દીકી પર તપાસનો ગાળિયો કસવામાં આવ્યો છે. ED એ અલ-ફલાહ યુનિવર્સિટી અને તેની સાથે સંકળાયેલા વ્યક્તિઓની નાણાકીય ગેરરીતિઓના સંબંધમાં મની લોન્ડરિંગ નિવારણ અધિનિયમ હેઠળ કેસ દાખલ કર્યો છે.&nbsp;મંગળવારે વહેલી સવારથી જ ED દ્વારા દિલ્હી અને ફરીદાબાદમાં યુનિવર્સિટીના મુખ્યમથક સહિત ટ્રસ્ટીઓના પરિસરો પર કુલ 25 સ્થળોએ દરોડા પાડવામાં આવ્યા હતા.
યુનિવર્સિટી ગ્રાન્ટ્સ કમિશનની ફરિયાદના આધારે 2 FIR
આ દરોડા દરમિયાન ED એ યુનિવર્સિટીના ચેરમેન જાવેદ અહેમદ સિદ્દીકીના નિવાસસ્થાને તેમની પૂછપરછ પણ શરૂ કરી હતી. વધુમાં, દિલ્હી પોલીસ ક્રાઈમ બ્રાન્ચે પણ અલ-ફલાહ યુનિવર્સિટી સામે છેતરપિંડી અને બનાવટના આરોપો હેઠળ યુનિવર્સિટી ગ્રાન્ટ્સ કમિશનની ફરિયાદના આધારે 2 અલગ-અલગ FIR નોંધી છે. યુનિવર્સિટીની મેમ્બરશિપ એસોસિયેશન ઓફ ઈન્ડિયન યુનિવર્સિટીઝ દ્વારા પહેલેથી જ રદ્દ કરવામાં આવી છે. આ FIRના સંદર્ભમાં પોલીસે યુનિવર્સિટીના સ્થાપક જાવેદ ફારુકીને 2 સમન્સ જારી કર્યા છે અને ટૂંક સમયમાં પૂછપરછ માટે બોલાવશે. અગાઉ, જાવેદ ફારુકી ફરાર હોવાના અહેવાલો હતા, પરંતુ ક્રાઈમ બ્રાન્ચે સ્પષ્ટતા કરી કે, તે ફરાર નથી કે વિદેશ ભાગી ગયો નથી. પોલીસના જણાવ્યા અનુસાર, યુનિવર્સિટી દ્વારા UGC 12B પ્રમાણપત્રોના ખોટા દાવા કરીને વિદ્યાર્થીઓને પ્રવેશ માટે લલચાવવામાં આવ્યા હતા, અને 2018 માં NACCની માન્યતા સમાપ્ત થયા પછી પણ પ્રવેશ સ્વીકારવાનું ચાલુ રાખ્યું હતું.
આ પણ વાંચો: <a href="https://www.benefitnews24.com/gujarati/crime/car-blast-in-front-of-red-fort-was-a-suicide-attack-nia-accepts-for-the-first-time/22694" target="_blank" rel="noopener">દિલ્હી બ્લાસ્ટ: NIAએ માન્યો આત્મઘાતી હુમલો</a>
14થી 15 FIR કરી દાખલ
અલ-ફલાહ યુનિવર્સિટીના માલિક 61 વર્ષીય જાવેદ અહેમદ સિદ્દીકી અગાઉ ચિટ ફંડનું સંચાલન કરતા હતા અને લોકોને પૈસા ચૂકવવામાં નિષ્ફળ રહ્યા હતા, જેના પગલે તેમની સામે 14થી 15 FIR દાખલ કરવામાં આવી હતી અને તેમને 3 વર્ષ જેલમાં પણ વિતાવ્યા હતા. એવી આશંકા છે કે, તેમણે આ નાણાંનો ઉપયોગ યુનિવર્સિટી સ્થાપવા માટે કર્યો હતો, જોકે બાદમાં તેમણે બધાના પૈસા પરત કર્યા અને નિર્દોષ છૂટ્યા હતા. તે રોકાણ, શિક્ષણ, સોફ્ટવેર, ઊર્જા અને કન્સલ્ટન્સી સહિત 9 કંપનીઓના ડિરેક્ટર છે, અને 1992માં અલ-ફલાહ ઇન્વેસ્ટમેન્ટ કંપનીના ડિરેક્ટર બન્યા હતા, બાદમાં અલ-ફલાહ ટ્રસ્ટની સ્થાપના કરી હતી.
વર્ષ 2000માં પણ છેતરપિંડીનો કેસ
દિલ્હી પોલીસ દ્વારા વર્ષ 2000માં પણ તેમની વિરુદ્ધ 'હલાલ ઈન્વેસ્ટમેન્ટ'ના નામે છેતરપિંડીનો કેસ નોંધવામાં આવ્યો હતો. આ દરમિયાન, જાવેદ સિદ્દીકીના નાના ભાઈ, હમૂદ અહેમદ સિદ્દીકીની મધ્યપ્રદેશમાં લગભગ 25 વર્ષ જૂના છેતરપિંડીના કેસમાં હૈદરાબાદથી ધરપકડ કરવામાં આવી છે. તપાસ એજન્સીઓનું માનવું છે કે, 14 લોકોના જીવ લેનાર અને 20થી વધુ લોકોને ઈજા પહોંચાડનાર હાઈ-ઇન્ટેન્સિટી બ્લાસ્ટનું આયોજન અલ-ફલાહ યુનિવર્સિટીના પરિસરમાં થયું હતું, અને આ યુનિવર્સિટી બ્લાસ્ટ કેસનું મુખ્ય કેન્દ્ર બની છે.

અલ-ફલાહ યુનિવર્સિટી

દિલ્હી બ્લાસ્ટ કેસમાં અલ-ફલાહ યુનિવર્સિટીનું નામની પણ ચર્ચાઓ

November 18, 2025 | 15:10 IST