પ્રેમમાં સંમતિથી શારીરિક સંબંધ દુષ્કર્મ નહિ

અલ્હાબાદ હાઈકોર્ટે પ્રેમ સંબંધો અને શારીરિક સંબંધો સાથે જોડાયેલા એક કેસમાં ઐતિહાસિક ચુકાદો આપ્યો છે. કોર્ટે જણાવ્યું છે કે, જો કોઈ મહિલા શરૂઆતથી જ જાણતી હોય કે સામાજિક કારણોસર લગ્ન શક્ય નથી, તેમ છતાં તે લાંબા સમય સુધી સંમતિથી શારીરિક સંબંધ બાંધે, તો તેને દુષ્કર્મની શ્રેણીમાં મૂકી શકાય નહિ. આ ચુકાદો ભવિષ્યમાં આવા અનેક કેસો માટે દિશા નિર્દેશક બની શકે છે.

કેસની વિગતો અને મહિલાનો આરોપ

આ કેસ 2 એકાઉન્ટન્ટ્સ સાથે સંબંધિત છે. એક મહિલા એકાઉન્ટન્ટે તેના સહકર્મી પર ગંભીર આરોપ લગાવ્યો હતો કે, 2019માં તેના જન્મદિવસની પાર્ટીના બહાને તેને ઘરે બોલાવી અને નશીલો પદાર્થ પીવડાવી દુષ્કર્મ આચર્યું. પીડિતાએ દાવો કર્યો હતો કે, આરોપીએ આ ઘટનાનો વીડિયો બનાવીને તેને બ્લેકમેઈલ કરી હતી અને બાદમાં લગ્નનું વચન આપ્યું હતું. 

જાતિ વિશે કહીને લગ્ન કરવાનો ઈનકાર

જોકે, 4 વર્ષ પછી આરોપીએ તેની જાતિ વિશે કહીને લગ્ન કરવાનો ઈનકાર કરી દીધો. મહિલાએ આ મામલે પોલીસમાં ફરિયાદ નોંધાવવાનો પ્રયાસ કર્યો, પરંતુ તે દાખલ થઈ નહિ. આખરે, તેણે SC-ST વિશેષ કોર્ટમાં ફરિયાદ કરી, પરંતુ કોર્ટે દુષ્કર્મનો કેસ ન બનતો હોવાનું કહીને ફરિયાદ રદ્દ કરી દીધી હતી. ત્યારબાદ મહિલાએ ન્યાય માટે અલ્હાબાદ હાઈકોર્ટમાં અરજી દાખલ કરી હતી.

આ પણ વાંચો: સંભલ મસ્જિદ સમિતિને ફટકો, હાઇકોર્ટે 'રંગરોગાન'ના કામ પર રોક લગાવી

આરોપીની દલીલો અને કોર્ટનો નિર્ણય

કોર્ટમાં આરોપી એકાઉન્ટન્ટના વકીલે રજૂઆત કરી હતી કે, પીડિતાએ પોતે જ SPને લેખિતમાં જણાવ્યું હતું કે, તે કોઈ કાર્યવાહી કરવા ઈચ્છતી નથી. આ સાથે, એ પણ દાવો કરાયો હતો કે, આરોપીએ પીડિતાને આપેલા 2 લાખ રૂપિયા પાછા માંગતા તેણે આ ફરિયાદ દાખલ કરાવી હતી. 

હાઈકોર્ટ પીડિતાની અપીલને નકારી

જસ્ટિસ અરૂણ કુમાર સિંહ દેશવાલની સિંગલ બેન્ચે તમામ તથ્યો અને રજૂઆતો પર ધ્યાન આપ્યું. કોર્ટે પોતાના ચુકાદામાં સ્પષ્ટ કહ્યું કે, જો કોઈ મહિલા જાણતી હોય કે સામાજિક કારણોને લીધે લગ્ન સંભવ નથી, છતાં તે લાંબા સમય સુધી સંમતિથી સંબંધ બાંધે, તો તેને દુષ્કર્મ ન કહી શકાય. આ અલ્હાબાદ હાઈકોર્ટનો ચુકાદો પીડિતાની અપીલને નકારી કાઢીને આપવામાં આવ્યો હતો.

ચુકાદાનું મહત્ત્વ

આ ચુકાદો પ્રેમ અને સંમતિથી બંધાયેલા શારીરિક સંબંધોના કાયદાકીય પાસાઓને સ્પષ્ટ કરે છે. તે સાબિત કરે છે કે, દરેક શારીરિક સંબંધ જેમાં પાછળથી લગ્નના વચનનો ભંગ થાય, તે દુષ્કર્મ ગણાતો નથી. કોર્ટે સંમતિ અને પીડિતાની સમજણ પર વિશેષ ભાર મૂક્યો છે. આ અલ્હાબાદ હાઈકોર્ટનો ચુકાદો સમાજ અને કાયદા બન્ને માટે એક મહત્ત્વપૂર્ણ દાખલો બેસાડશે, જે ભવિષ્યમાં આવા કેસોનો નિર્ણય કરવામાં મદદરૂપ થશે.