ઉત્તરાખંડમાં વિશ્વ પ્રસિદ્ધ ચારધામ યાત્રા 2026 શરૂ થાય તે પહેલા શ્રી બદ્રીનાથ-કેદારનાથ મંદિર સમિતિ (BKTC) દ્વારા દર્શન અને સુરક્ષા વ્યવસ્થાને લઈ અત્યંત મહત્વના નિર્ણયો લેવામાં આવ્યા છે. આ વર્ષે યાત્રામાં શિસ્ત અને ધાર્મિક પરંપરાઓને જાળવી રાખવા માટે સમિતિએ ત્રણ મુખ્ય ફેરફારો કર્યા છે, જેની સીધી અસર બોલિવૂડ સેલેબ્રિટીઝથી લઈને સામાન્ય શ્રદ્ધાળુઓ પર પડશે.
1. બિન-સનાતનીઓ માટે એફિડેવિટ ફરજિયાત
મંદિર સમિતિએ નિર્ણય લીધો છે કે જે વ્યક્તિ સનાતન ધર્મમાં આસ્થા ધરાવતી નથી, તેમને ધામોમાં પ્રવેશ આપવામાં આવશે નહીં. આ માટે એક વિશેષ સબ-કમિટી SOP તૈયાર કરી રહી છે. ખાસ કરીને અભિનેત્રી સારા અલી ખાન જેવા શ્રદ્ધાળુઓ, જેઓ વારંવાર કેદારનાથની મુલાકાત લે છે, તેમણે પણ હવે સોગંદનામું આપીને પોતાની આસ્થા સ્પષ્ટ કરવી પડશે. જોકે, આ મુદ્દે રાજકીય વિવાદ પણ શરૂ થયો છે અને વિપક્ષે આસ્થા પર સવાલ ઉઠાવવાની આ નીતિ સામે વાંધો વ્યક્ત કર્યો છે.
2. મંદિર પરિસરમાં મોબાઈલ પર પ્રતિબંધ
શ્રદ્ધાળુઓ હવે મંદિરના મુખ્ય પરિસરની 60 મીટરની ત્રિજ્યામાં મોબાઈલ ફોન લઈ જઈ શકશે નહીં. આ નિયમ માત્ર મુલાકાતીઓ જ નહીં, પણ મંદિરના પદાધિકારીઓ અને કર્મચારીઓ પર પણ સમાન રીતે લાગુ પડશે. આ નિર્ણય પાછળનો હેતુ મંદિરની પવિત્રતા જાળવવાનો અને ભીડને યોગ્ય રીતે નિયંત્રિત કરવાનો છે.
3. ફોટોગ્રાફી માટે અલગ ઝોનની વ્યવસ્થા&nbsp;
સોશિયલ મીડિયા માટે રીલ્સ અને ફોટા પાડવાની વધતી જતી પ્રવૃત્તિઓને રોકવા માટે હવે મંદિરમાં ફોટોગ્રાફી માટે ચોક્કસ સ્થાનો નક્કી કરવામાં આવશે. નિર્ધારિત સ્થળો સિવાય અન્ય ક્યાંય પણ ફોટોગ્રાફી કરવા પર કડક મનાઈ રહેશે.
યાત્રા 2026 માટે ભવ્ય આયોજન :&nbsp;
મંદિર સમિતિના અધ્યક્ષ હેમંત દ્વિવેદીએ માહિતી આપી હતી કે આ વર્ષે યાત્રાળુઓની સુવિધાઓ માટે 121 કરોડ રૂપિયાનું બજેટ ફાળવવામાં આવ્યું છે. જેમાં બદ્રીનાથ માટે 57 કરોડ અને કેદારનાથ માટે 63 કરોડ રૂપિયા ખર્ચવામાં આવશે.
મુખ્ય હાઈલાઈટ્સ :
રેકોર્ડ નોંધણી: યાત્રા માટે અત્યાર સુધીમાં સવા છ લાખથી વધુ શ્રદ્ધાળુઓએ રજિસ્ટ્રેશન કરાવ્યું છે.
ઓનલાઈન પૂજા: ભક્તો ઘરે બેઠા પૂજામાં જોડાઈ શકે તે માટે ડિજિટલ વ્યવસ્થાને પ્રોત્સાહન અપાશે.
તીર્થ પુરોહિત કલ્યાણ કોષ: સ્થાનિક પુરોહિતોના હિત માટે વિશેષ ફંડની રચના કરવામાં આવી છે.
કર્મચારી નીતિ: મંદિરના કર્મચારીઓના વેતનમાં વધારો અને બદલી માટે નવી નીતિ અમલમાં મુકાશે.
આ નવા નિયમો અને વ્યવસ્થાથી ચારધામ યાત્રા વધુ સુરક્ષિત અને આધ્યાત્મિક બનશે તેવી આશા વ્યક્ત કરવામાં આવી છે.&nbsp;

ચારધામ યાત્રા 2026 નવા નિયમો

બિન-સનાતનીઓના પ્રવેશ પર પ્રતિબંધ અને મોબાઈલ ફોન અંગે મંદિર સમિતિએ લીધા મોટા નિર્ણયો

March 18, 2026 | 12:04 IST