Jammu and Kashmir : પ્રવાસીઓની ચીસોથી ગુંજી ખીણ, પહેલગામમાં આતંકી હુમલો...

કાશ્મીરના પહેલગામની રમણીય બેસરન ખીણમાં આજે શાંતિ ભંગ થઈ હતી. ખીણના ઉપલા વિસ્તારોમાં અચાનક ગોળીબાર થતાં અફરાતફરી મચી ગઈ હતી. આ હુમલામાં કેટલાક લોકો ઘાયલ થયા હોવાના સમાચાર મળ્યા છે. ઘટનાની જાણ થતાં જ સુરક્ષા દળો તાત્કાલિક ઘટનાસ્થળે ધસી ગયા હતા અને વિસ્તારને કોર્ડન કરીને તપાસ હાથ ધરી છે.

સૂત્રો દ્વારા મળતી માહિતી અનુસાર, શંકાસ્પદ આતંકવાદીઓએ પ્રવાસીઓના એક જૂથને નિશાન બનાવીને અંધાધૂન ગોળીબાર કર્યો હતો. આ ગોળીબારમાં ચાર લોકો ગંભીર રીતે ઘાયલ થયા હોવાનું પોલીસ દ્વારા પુષ્ટિ કરવામાં આવ્યું છે. હાલમાં સુરક્ષા દળોની ટીમ પરિસ્થિતિનું આકલન કરી રહી છે અને આસપાસના વિસ્તારોમાં પણ તલાશી અભિયાન ચલાવી રહી છે.

સૂત્રોના જણાવ્યા અનુસાર, આ દુર્ભાગ્યપૂર્ણ ઘટનાનો ભોગ બનેલા પ્રવાસીઓ રાજસ્થાનથી ફરવા માટે આવ્યા હતા. કુદરતી સૌંદર્યનો આનંદ માણવા આવેલા આ પ્રવાસીઓ પર થયેલા આ ઘાતકી હુમલાથી સમગ્ર વિસ્તારમાં ગમગીની છવાઈ ગઈ છે.

આ ઘટનાએ ફરી એકવાર ખીણમાં આતંકવાદના ખતરાને ઉજાગર કર્યો છે. સુરક્ષા દળો આ હુમલાખોરોને પકડવા માટે સઘન કાર્યવાહી કરી રહ્યા છે અને વિસ્તારમાં એલર્ટ જાહેર કરવામાં આવ્યું છે. ઘાયલ થયેલા પ્રવાસીઓને તાત્કાલિક સારવાર માટે હોસ્પિટલ ખસેડવામાં આવ્યા છે.

પહેલગામ જેવા શાંત અને સુંદર સ્થળે પ્રવાસીઓ પર થયેલા આ હુમલાથી પ્રવાસન ઉદ્યોગને પણ મોટો ફટકો પડી શકે છે. સુરક્ષા દળો દ્વારા પરિસ્થિતિને નિયંત્રણમાં લાવવાના તમામ પ્રયાસો કરવામાં આવી રહ્યા છે, પરંતુ આ ઘટનાએ પ્રવાસીઓની સુરક્ષાને લઈને અનેક સવાલો ઊભા કર્યા છે.