કેમ્પેગૌડા એરપોર્ટ પર બર્ડ સ્ટ્રાઈકના કેસમાં વધારો

બેંગલુરુનું કેમ્પેગૌડા ઇન્ટરનેશનલ એરપોર્ટ (KIA) છેલ્લા સાડા 5 વર્ષમાં બર્ડ સ્ટ્રાઈકની ઘટનાઓમાં દક્ષિણ ભારતના એરપોર્ટમાં મોખરે રહ્યું છે, જેમાં કુલ 343 ઘટનાઓ નોંધાઈ છે. બર્ડ સ્ટ્રાઈક એટલે પક્ષીઓ અને વિમાનો વચ્ચેની ટક્કર, જે સામાન્ય રીતે ઓછી ઊંચાઈએ, ટેક-ઓફ અને લેન્ડિંગ જેવા નિર્ણાયક તબક્કાઓ દરમિયાન થાય છે. આનાથી ઘણીવાર વિમાનના એન્જિન અથવા વિન્ડશિલ્ડને નુકસાન થાય છે, જે સલામતી માટે મોટી ચિંતાનો વિષય છે.

કેન્દ્રીય નાગરિક ઉડ્ડયન મંત્રાલયના જણાવ્યા અનુસાર, 2020થી જૂન 2025 વચ્ચે દેશભરમાં લગભગ 2,800 બર્ડ સ્ટ્રાઈકની ઘટનાઓ નોંધાઈ હતી. કોરોના સમયે વર્ષો દરમિયાન આ ઘટનાઓમાં ઘટાડો થયો હતો, પરંતુ હવાઈ મુસાફરી ફરી શરૂ થતાં જ તેમાં સતત વધારો જોવા મળ્યો છે. છેલ્લા 3 વર્ષમાં, બેંગલુરુમાં સરેરાશ વાર્ષિક 85 બર્ડ સ્ટ્રાઈકના કેસ નોંધાયા છે. દક્ષિણ ભારતના અન્ય મોટા એરપોર્ટ પૈકી 2020થી હૈદરાબાદમાં 191 કેસ, ચેન્નાઈમાં 188 અને તિરુવનંતપુરમમાં 109 કેસ નોંધાયા છે.

જોકે, બેંગલુરુમાં બર્ડ સ્ટ્રાઈકને કારણે કોઈ મોટી દુર્ઘટના નોંધાઈ નથી, પરંતુ ઉડ્ડયન નિષ્ણાતો આવી ઘટનાઓની ઊંચી આવૃત્તિને એરપોર્ટ નજીક વધતી વ્યાપારી પ્રવૃત્તિઓ અને ફ્લાઈટ ઓપરેશન્સમાં થયેલા વધારા સાથે જોડે છે. બેંગલુરુ હાલમાં ભારતનું ત્રીજું સૌથી વ્યસ્ત એરપોર્ટ છે, જેણે 2024-25માં રેકોર્ડ 41.88 મિલિયન મુસાફરોને હેન્ડલ કર્યા છે. તે 76 સ્થાનિક અને 34 આંતરરાષ્ટ્રીય સ્થળો સાથે કનેક્ટિવિટી પૂરી પાડે છે. એરપોર્ટની આસપાસના વિસ્તારોમાં ઝડપી રિયલ એસ્ટેટનો વિકાસ પણ થઈ રહ્યો છે.

બર્ડ સ્ટ્રાઈકના જોખમો ઘટાડવા માટે, બેંગલુરુ એરપોર્ટે રાષ્ટ્રીય અને આંતરરાષ્ટ્રીય ઉડ્ડયન સુરક્ષા પ્રોટોકોલને અનુરૂપ મલ્ટી-લેયર્ડ વાઇલ્ડલાઈફ હેઝાર્ડ મેનેજમેન્ટ પ્લાન અમલમાં મૂક્યો છે. એક સમર્પિત ટીમ વાસ્તવિક સમયમાં પક્ષી અને વન્યજીવનની ગતિવિધિઓ પર નજર રાખે છે અને જરૂરિયાત મુજબ નિવારક પદ્ધતિઓનો ઉપયોગ કરે છે. 

એરપોર્ટના સૂત્રોના જણાવ્યા અનુસાર, આ પગલાંઓમાં પક્ષી ભગાડવાના ઉપાયો, ઉંદર નિયંત્રણ, નિવાસસ્થાન અને જંતુ વ્યવસ્થાપન, જૈવિક અને રાસાયણિક નિયંત્રણ પદ્ધતિઓ, અને એરપોર્ટની આસપાસ કચરા વ્યવસ્થાપન પર ધ્યાન કેન્દ્રિત કરતી જાગૃતિ ઝુંબેશનો સમાવેશ થાય છે. બર્ડ સ્ટ્રાઈક ઘટાડવા માટે આ પ્રયાસો સતત ચાલુ રહેશે.