Ayodhya: અભિજીત મુહૂર્તમાં રામ દરબારની પ્રાણપ્રતિષ્ઠા, હીર-સોનાનું દાન કરાયું

ગુરુવારે ભવ્ય મંદિરમાં સીએમ યોગી આદિત્યનાથે રાજા રામને અભિષેક કર્યો ત્યારે રામનગરીના ઇતિહાસમાં વધુ એક સુવર્ણ પ્રકરણ ઉમેરાયું. ચારે બાજુથી વૈદિક મંત્રોનો અવાજ ગુંજી રહ્યો હતો. બ્રહ્મમુહૂર્તથી જ મંદિર પરિસરમાં પંડિતો, આચાર્યો અને સંતોનો સામૂહિક અવાજ, શંખનો નાદ અને હવનની સુગંધથી આધ્યાત્મિક વાતાવરણ સર્જાયું.

Ayodhya માં રામ મંદિરમાં અભિજીત મુહૂર્તમાં રામ દરબારની પ્રાણપ્રતિષ્ઠા કરવામાં આવી. સીએમ યોગીએ રામ દરબારની પૂજા કરી. આ કાર્યક્રમનો સવારે 11 થી 11.40 વાગ્યા દરમિયાન અભિજીત મુહૂર્તમાં પ્રારંભ થયો. સીએમ યોગીએ રામ મંદિરના પહેલા માળે બનેલા રામ દરબારની પૂજા કરી. રામ દરબાર રામલલ્લાના ગર્ભગૃહની ઉપર એટલે કે પહેલા માળે બનાવવામાં આવ્યો છે. તેમાં ભગવાન રામ, માતા સીતા, ત્રણ ભાઈઓ- લક્ષ્મણ, ભરત, શત્રુઘ્ન તેમજ હનુમાનજીની મૂર્તિઓ છે. સુરતના ઉદ્યોગપતિ મુકેશ પટેલે રામ દરબાર માટે હીરા, સોના અને ચાંદીના ઘરેણાંનું દાન કર્યું છે.

મુખ્યમંત્રી યોગી આદિત્યનાથની હાજરીએ આ ગૌરવપૂર્ણ ક્ષણને વધુ દિવ્ય બનાવી દીધી. મુખ્યમંત્રીએ તમામ દેવતાઓની મૂર્તિઓનો અભિષેક કર્યો. આ પછી, રામ દરબારની મૂર્તિ પરથી આવરણ દૂર કરવામાં આવ્યું. રાજા રામને આભૂષણોથી શણગારવામાં આવ્યા. આ દરમિયાન, અયોધ્યાના 19 સંતો અને ધાર્મિક નેતાઓ પણ હાજર હતા. આ ઉપરાંત, ટ્રસ્ટ, સંઘ અને વીએચપીના અધિકારીઓ પણ હાજર હતા. આ પહેલા, મુખ્યમંત્રીએ હનુમાનગઢીની મુલાકાત પણ લીધી હતી.