56 કલાકના રેસ્ક્યુ ઓપરેશન બાદ પણ આર્યનને ના બચાવી શકાયો

રાજસ્થાનના દૌસા જિલ્લામાં બોરવેલમાં પડી ગયેલા બાળક આર્યનના મૃત્યુ અંગે ચીફ મેડિકલ ઓફિસર દીપક શર્માએ જણાવ્યું હતું કે બાળકના શરીર પર કોઈ ઈજાના નિશાન નથી અને એવું લાગે છે કે તે પડી ગયા પછી કોઈ કડક વસ્તુ સાથે અથડાયું હશે. ચીફ મેડિકલ ઓફિસરે કહ્યું, "લાંબા સમય સુધી બોરવેલમાં રહેવાને કારણે બાળકને ખૂબ જ તકલીફ પડી, જેના કારણે તેની હાલત નાજુક બની ગઈ."

તેમણે કહ્યું કે , “જ્યારે બાળકને બોરવેલમાંથી બહાર કાઢવામાં આવ્યો ત્યારે તેને આશા સાથે હોસ્પિટલમાં દાખલ કરવામાં આવ્યો હતો. પરંતુ, જ્યારે અમે ECG કર્યું ત્યારે જાણવા મળ્યું કે બાળકનું મૃત્યું થયું  છે. આ ઉપરાંત લાંબા સમય સુધી ખાધા વિના રહેવાને કારણે પણ તેને મુશ્કેલીનો સામનો કરવો પડ્યો હતો. જો કે શરીર પર કોઈપણ પ્રકારની ઈજાના નિશાન જોવા મળ્યા નથી. પરંતુ, એવું લાગે છે કે બોરવેલમાં પડ્યા પછી તે કોઈ સખત વસ્તુ સાથે ટકરાયો હશે." તેમણે કહ્યું, "હવે બાકીની વાત પોસ્ટમોર્ટમ રિપોર્ટ બાદ જ સ્પષ્ટ થશે."

તમને જણાવી દઈએ કે આર્યનને 56 કલાકના રેસ્ક્યુ ઓપરેશન બાદ બહાર કાઢવામાં આવ્યો હતો. પરંતુ, તેને બચાવી શકાયો ન હતો. તેને બોરવેલમાંથી બહાર કાઢવા માટે ઊંડું ખોદકામ પણ કરવામાં આવ્યું હતું. 9 ડિસેમ્બરથી બચાવ કામગીરી ચાલી રહી હતી. આ અકસ્માત બાળકના ઘરથી લગભગ 100 ફૂટ દૂર થયો હતો. 9મી ડિસેમ્બરની રાત્રે લગભગ 2 વાગ્યા પછી બોરવેલ પર બાળકની કોઈ હિલચાલ જોવા મળી ન હતી.

બાળકને બચાવવા માટે બોરવેલ પાસે 125 ફૂટ ઊંડો ખાડો ખોદવામાં આવ્યો હતો. દરમિયાન ખાડો ખોદવાનું મશીન પણ તૂટી ગયું હતું. જેના કારણે કેટલાક કલાકો સુધી બચાવ કામગીરી ખોરવાઈ ગઈ હતી. બોરવેલની અંદરની માટી બાળક પર પડી હતી. આ પછી, દૌસા જિલ્લા મેજિસ્ટ્રેટ દેવેન્દ્ર કુમારની હાજરીમાં બાળકને હૂકમાંથી બહાર કાઢવાની મંજૂરી આપવામાં આવી હતી. બોરવેલ પાસે મેડિકલ ટીમ પણ તૈનાત કરવામાં આવી હતી. બાળક બહાર આવતાની સાથે જ તેને તાત્કાલિક હોસ્પિટલ લઈ જવામાં આવ્યું હતું. તપાસમાં મૃત્યુની પુષ્ટિ થઈ હતી.