અનિલ અંબાણીના બેંક ઓફ ઈન્ડિયાના ખાતા 'ફ્રોડ' જાહેર

સ્ટેટ બેંક ઓફ ઈન્ડિયાએ રિલાયન્સ કોમ્યુનિકેશનના ખાતાઓને છેતરપિંડી જાહેર કર્યા બાદ બેંક ઓફ ઈન્ડિયા (BOI) એ પણ પ્રમોટર અનિલ અંબાણી, રિલાયન્સ ટેલિકોમ સહિતનાના ખાતાઓને ફ્રોડ જાહેર કર્યા છે. બેંકે આરોપ લગાવ્યો છે કે આ લોનમાંથી મળેલા ભંડોળનો ઉપયોગ હેતુ સિવાયના કામો માટે કરવામાં આવ્યો હતો. નોટિસમાં કંપની સાથે સંકળાયેલા ઘણા અન્ય લોકોના નામ પણ સામેલ છે.

કંપનીએ ફાઇલિંગમાં જણાવ્યું હતું કે રિલાયન્સ કોમ્યુનિકેશનને 22 ઓગસ્ટ, 2025 ના રોજ બેંક ઓફ ઈન્ડિયા તરફથી 8 ઓગસ્ટના રોજ એક પત્ર મળ્યો હતો. રિલાયન્સ કોમ્યુનિકેશન લિમિટેડને મોકલવામાં આવેલી નોટિસમાં BOI એ કહ્યું છે કે અનિલ ધીરજલાલ અંબાણી અને મંજરી આશિક કક્કરના લોન ખાતાઓને 724.78 કરોડ રૂપિયાની બાકી લોન માટે 'ફ્રોડ' તરીકે ચિહ્નિત કરવામાં આવ્યા છે.

કંપની દ્વારા શેર કરાયેલા એક પત્રમાં બેંક ઓફ ઈન્ડિયાએ જણાવ્યું હતું કે, "30 જૂન, 2017 સુધીમાં ઉધાર લેનારનું ખાતું 724.78 કરોડ રૂપિયાના બાકી લેણાં સાથે NPA થઈ ગયું હતું. બેંક બાકી રકમ ચૂકવવા માટે ઉધાર લેનારાઓ અને ગેરંટરોનો સંપર્ક કરી રહી છે. પરંતુ તેઓ બાકી રકમ ચૂકવવામાં નિષ્ફળ રહ્યા છે અને બેદરકારી દાખવી રહ્યા છે."

રિલાયન્સ ટેલિકોમને મોકલવામાં આવેલી નોટિસમાં બેંક ઓફ ઈન્ડિયાએ કંપનીના ખાતા તેમજ ડિરેક્ટર ગ્રેસ થોમસ અને સતીશ સેઠના ખાતાઓને 51.77 કરોડ રૂપિયાના લોન ડિફોલ્ટ માટે 'ફ્રોડ' ગણાવ્યા છે. આ કેસમાં અન્ય લોકોમાં ગૌતમ ભાઈલાલ દોશી, દગદુલાલ કસ્તુરીચંદ જૈન અને પ્રકાશ શેનોયનો સમાવેશ થાય છે.

ઉલ્લેખનીય છે કે, શનિવારે સીબીઆઈએ બેંકો સાથે છેતરપિંડી કેસમાં અનિલ અંબાણીના નિવાસસ્થાન અને સંબંધિત ઓફિસો પર દરોડા પાડ્યા હતા. આ અંગે કંપનીના પ્રવક્તાએ જણાવ્યું હતું કે અનિલ અંબાણી તમામ આરોપોને સખત રીતે નકારે છે અને કાનૂની પ્રક્રિયા દ્વારા સંપૂર્ણ સન્માન સાથે પોતાનો પક્ષ રજૂ કરશે.

નિવેદનમાં કહેવામાં આવ્યું છે કે સ્ટેટ બેંક ઓફ ઈન્ડિયા દ્વારા દાખલ કરવામાં આવેલી ફરિયાદ 10 વર્ષ જૂનો કેસ છે. તે સમયે અનિલ અંબાણી ફક્ત નોન-એક્ઝિક્યુટિવ ડિરેક્ટરની ભૂમિકામાં હતા અને કંપનીના દૈનિક કામકાજ સાથે તેમનો કોઈ સંબંધ નહોતો. વધુમાં જણાવ્યું કે SBI એ આ જ કેસમાં પાંચ અન્ય નોન-એક્ઝિક્યુટિવ ડિરેક્ટરો સામેની કાર્યવાહી પાછી ખેંચી લીધી છે. પરંતુ અનિલ અંબાણીને ખાસ નિશાન બનાવવામાં આવ્યા છે. આ એકપક્ષીય વલણ સમજણની બહાર છે.

નિવેદનમાં વધુમાં કહેવામાં આવ્યું છે કે, હાલમાં રિલાયન્સ કોમ્યુનિકેશન્સની જવાબદારી SBI દ્વારા સંચાલિત લેણદારોની સમિતિ પાસે છે અને તે રિઝોલ્યુશન પ્રોફેશનલ (RP) ની દેખરેખ હેઠળ ચલાવવામાં આવી રહી છે. આ મામલો છેલ્લા 6 વર્ષથી નેશનલ કંપની લો ટ્રિબ્યુનલ (NCLT) અને સુપ્રીમ કોર્ટ સહિત અન્ય ન્યાયિક મંચો સમક્ષ પેન્ડિંગ છે.

--IANS