અમેઠી એક્સપ્રેસવે પર એમ્બ્યુલન્સ અને પિકઅપ વાન વચ્ચે ટક્કર, 5ના થયા મોત 1 ઈજાગ્રસ્ત

ઉત્તર પ્રદેશના અમેઠીમાં પૂર્વાંચલ એક્સપ્રેસ-વે પર રવિવારે સવારે એક ભયાનક માર્ગ અકસ્માત થયો. પૂર ઝડપે એમ્બ્યુલન્સે એક્સપ્રેસ-વે પર પાછળથી આગળ જઈ રહેલી પિકઅપને ટક્કર મારી હતી. આ અકસ્માતમાં એમ્બ્યુલન્સમાં મુસાફરી કરી રહેલા 5 લોકોના ઘટનાસ્થળે જ મોત થયા હતા, જ્યારે એક વ્યક્તિ ઈજાગ્રસ્ત થયો. ઈજાગ્રસ્તને સારવાર માટે જિલ્લા હોસ્પિટલમાં દાખલ કરવામાં આવ્યા છે.

આ માર્ગ અકસ્માત અમેઠીના શુકુલ બજાર પોલીસ સ્ટેશન વિસ્તારમાં એક્સપ્રેસ-વે પર થયો છે. એમ્બ્યુલન્સ હરિયાણાના નુહથી બિહારના સમસ્તીપુર જઈ રહી હતી.

મળતી માહિતી મુજબ, એમ્બ્યુલન્સ અશોક શર્મા નામના વ્યક્તિના મૃતદેહને લઈ જઈ રહી હતી. એમ્બ્યુલન્સે એક્સપ્રેસ-વે પર પાછળથી આગળ જઈ રહેલી પિકઅપને ઝડપી ગતિએ ટક્કર મારી. ટક્કર એટલી ગંભીર હતી કે, બંને વાહનો સંપૂર્ણપણે નુકસાન પામ્યા હતા અને એમ્બ્યુલન્સમાં મુસાફરી કરી રહેલા 5 લોકોના ઘટનાસ્થળે જ મોત થયા હતા.

શુકુલ બજાર પોલીસ સ્ટેશનના ઇન્ચાર્જે જણાવ્યું હતું કે, અકસ્માતની માહિતી મળતા જ પોલીસ ટીમ ઘટનાસ્થળે પહોંચી ગઈ હતી. મૃતદેહોને એમ્બ્યુલન્સમાંથી બહાર કાઢીને પોસ્ટમોર્ટમ માટે મોકલી આપવામાં આવ્યા હતા.

અમેઠી જિલ્લાના એડિશનલ પોલીસ અધિકારીએ જણાવ્યું હતું કે, "આ અકસ્માત રવિવારે સવારે લગભગ 5:30 વાગ્યે થયો હતો. હરિયાણાના નુહથી એક એમ્બ્યુલન્સ મૃતક અશોક શર્માના મૃતદેહને લઈને આવી રહી હતી, જેમાં હરિયાણાના રહેવાસી 2 ડ્રાઇવર સરફરાઝ અને મહાબીર, તેમજ પરિવારના 4 સભ્યો સતીશ શર્મા, રવિ શર્મા, ફૂલો શર્મા અને શંભુ રાય મુસાફરી કરી રહ્યા હતા."

તેમણે વધુમાં જણાવ્યું હતું કે, "બજાર શુકુલ પોલીસ સ્ટેશન વિસ્તારમાં માઇલસ્ટોન નંબર 59.700 નજીક, એમ્બ્યુલન્સ આગળ જઈ રહેલી પિકઅપ સાથે અથડાઈ હતી. આ અકસ્માતમાં, એમ્બ્યુલન્સ સંપૂર્ણપણે નુકસાન થયું હતું. બંને ડ્રાઇવર સરફરાઝ અને મહાબીર અને સતીશ શર્મા, રવિ શર્મા અને ફુલો શર્માનું ઘટનાસ્થળે જ મૃત્યુ થયું હતું. આ દરમિયાન શંભુ રાય ઘાયલ થયા હતા, જેમને સારવાર માટે જિલ્લા હોસ્પિટલમાં દાખલ કરવામાં આવ્યા છે. પોલીસે ક્રેન દ્વારા બંને વાહનોને દૂર કર્યા અને ટ્રાફિક વ્યવસ્થા પુનઃસ્થાપિત કરી. હાલમાં, કેસની તપાસ ચાલી રહી છે."