હવાઈ મુસાફરી રોડ ટ્રાવેલ કરતા 1000 ગણી વધુ સુરક્ષિત છે : ડૉ. સુભાષ ગોયલ

STIC ટ્રાવેલ ગ્રુપના ચેરમેન ડૉ. સુભાષ ગોયલે શુક્રવારે જણાવ્યું હતું કે, અમદાવાદ વિમાન દુર્ઘટના જેવા અકસ્માતોથી માનસિક ભય પેદા થાય છે, જોકે, હવાઈ મુસાફરી રોડ ટ્રાવેલ કરતાં 1000 ગણી વધુ સુરક્ષિત છે.

ડૉ. સુભાષ ગોયલે કહ્યું કે, મૃત્યુને કોઈ રોકી શકતું નથી. જો અકસ્માત થવાનો હોય તો તમે રસ્તો ક્રોસ કરતી વખતે પણ અકસ્માતનો ભોગ બની શકો છો.

ગોયલે પોતાનો મુદ્દો સમજાવતા કહ્યું કે, "અમે જોયું કે બોઇંગ 787 ડ્રીમલાઇનર, જે વિશ્વનું સૌથી સુરક્ષિત વિમાન માનવામાં આવે છે, તે બોમ્બની જેમ કેવી રીતે વિસ્ફોટ થયું. આ પહેલી વાર છે જ્યારે કોઈ ડ્રીમલાઇનર ક્રેશ થયું છે. આ ભયાનક અને દુ:ખદ ઘટનામાં, અમે એ પણ જોયું કે એક માણસ કેવી રીતે બચી ગયો. આ હિન્દી કહેવતને સાચી સાબિત કરે છે કે 'જાકો રાખે સૈયાં, માર સાકે ના કોઈ'. જેનો અર્થ છે કે, પરિસ્થિતિ ગમે તે હોય, ભગવાનના આશીર્વાદ પામેલાને કોઈ નુકસાન પહોંચાડી શકતું નથી."

તેમણે પોતાના મુદ્દા પર ભાર મૂક્યો અને કહ્યું કે, હવાઈ મુસાફરી સૌથી સલામત છે. જો કે, જો તમારા ભાગ્યમાં મૃત્યુ લખાયેલું હોય, તો તમે માર્ગ અકસ્માતમાં પણ મૃત્યુ પામી શકો છો. તેથી, હવાઈ મુસાફરી ન કરવાની સલાહ આપવામાં આવતી નથી.

એર ઇન્ડિયાના વિમાનની સલામતી અંગે ગોયલે કહ્યું કે, "દુનિયામાં ભાગ્યે જ કોઈ એવી એરલાઈન હશે જે ક્રેશ ન થઈ હોય. એર ઇન્ડિયાના વિમાનમાં 6 બેટરી જનરેટરની સુવિધા હતી, જે એન્જિન ફેલ થવાના કિસ્સામાં ઉપયોગી થઈ હોત. એવું કહેવું સંપૂર્ણપણે ખોટું હશે કે, કોઈ ચોક્કસ એરલાઈન સલામત છે."

તેમણે કહ્યું કે, અહીં એ પણ સમજવું જરૂરી છે કે જ્યારે પણ વિમાન ઉડાન ભરે છે, ત્યારે તેના દરેક ભાગની તપાસ કરવામાં આવે છે. આ કિસ્સામાં પાઈલટની ભૂલ થવાની કોઈ શક્યતા નથી. કારણ કે, દરેક પાઇલટ બોર્ડિંગ પહેલાં તબીબી તપાસ કરાવે છે. વિમાન ઉડવાનું શરૂ કરી ચૂક્યું હતું, એટલે કે એન્જિનમાં કોઈ સમસ્યા ન હતી. ટેક ઓફ પછી શું થયું તે વિશે કંઈ કહી શકાય નહીં. તપાસ પછી જ બધી માહિતી બહાર આવવાની અપેક્ષા છે.

ગોયલે કહ્યું કે, બ્લેક બોક્સ મળી આવ્યું છે અને તપાસ ચાલી રહી છે. તેમણે કહ્યું કે, "એવિએશન રેગ્યુલેટર ડિરેક્ટોરેટ જનરલ ઓફ સિવિલ એવિએશનની તપાસ ટીમ આવી ગઈ છે. યુકેથી પણ એવિએશન સેફ્ટી નિષ્ણાતો આવી રહ્યા છે. બોઇંગના લોકો USથી આવી ગયા છે. અમને આશા છે કે, વિશ્લેષણ પછી જ ઘટનાના કારણો જાણી શકાશે."