એરફોર્સનો કર્મચારી પાકિસ્તાની જાસૂસ નીકળ્યો

ભારતીય સુરક્ષા એજન્સીઓએ દેશની આંતરિક સુરક્ષાને નુકસાન પહોંચાડતા એક મોટા જાસૂસી રેકેટનો પર્દાફાશ કર્યો છે. રાજસ્થાન પોલીસની ઈન્ટેલિજન્સ વિંગે આસામના ચાબુઆ એરફોર્સ સ્ટેશન પર કાર્યરત એક સિવિલિયન કર્મચારીની પાકિસ્તાન માટે જાસૂસી કરવાના ગંભીર આરોપસર ધરપકડ કરી છે. આ કાર્યવાહીથી દેશભરમાં ફેલાયેલા પાકિસ્તાની ગુપ્તચર એજન્સીઓના નેટવર્કને મોટો ફટકો પડ્યો છે.

જેસલમેર કનેક્શનથી ખુલ્યું જાસૂસીનું જાળું : 

આ હાઈ-પ્રોફાઈલ કેસની કડીઓ જાન્યુઆરી 2026માં જેસલમેરથી પકડાયેલા ઝાબરા રામ સાથે જોડાયેલી છે. એડિશનલ ડાયરેક્ટર જનરલ ઓફ પોલીસ પ્રફુલ્લ કુમારના જણાવ્યા અનુસાર, ઝાબરા રામની પૂછપરછ દરમિયાન સુમિત કુમારનું નામ સામે આવ્યું હતું. સુમિત સતત પાકિસ્તાની હેન્ડલરોના સંપર્કમાં હોવાનું અને ભારતીય વાયુસેનાની અત્યંત ગુપ્ત વિગતો સરહદ પાર મોકલતો હોવાનું તપાસમાં જાણવા મળ્યું હતું.

કોણ છે આરોપી સુમિત કુમાર ?

ધરપકડ કરાયેલ આરોપી સુમિત કુમાર મૂળ ઉત્તર પ્રદેશના પ્રયાગરાજનો રહેવાસી છે. તે આસામના ડિબ્રુગઢમાં આવેલા ચાબુઆ એરફોર્સ સ્ટેશનમાં મલ્ટી-ટાસ્કિંગ સ્ટાફ (MTS) તરીકે ફરજ બજાવતો હતો. એક સામાન્ય કર્મચારી હોવા છતાં, તેણે એરફોર્સ સ્ટેશનની અંદરની ગતિવિધિઓ અને સંરક્ષણ સાધનોની વિગતો ચોરીછૂપીથી એકત્રિત કરી હતી.

2023થી ચાલતો હતો દેશદ્રોહનો ખેલ : 

તપાસ એજન્સીઓના જણાવ્યા મુજબ, સુમિત વર્ષ 2023થી પાકિસ્તાની ઈન્ટેલિજન્સ એજન્સીઓના સંપર્કમાં હતો. તે નાણાકીય લાલચમાં આવીને સોશિયલ મીડિયાના માધ્યમથી પાકિસ્તાની હેન્ડલર્સને ગુપ્ત માહિતી પૂરી પાડતો હતો. આ સંયુક્ત ઓપરેશનમાં નવી દિલ્હીની એરફોર્સ ઈન્ટેલિજન્સ અને રાજસ્થાન ઈન્ટેલિજન્સની ટીમોએ સાથે મળીને તેને આસામથી દબોચી લીધો હતો.

મિસાઈલ સિસ્ટમ અને ફાઈટર જેટની માહિતી કરી શેર : 

આરોપીએ માત્ર ચાબુઆ જ નહીં, પરંતુ બિકાનેરના નાલ એરફોર્સ સ્ટેશન અને અન્ય લશ્કરી મથકોની વિગતો પણ પાકિસ્તાનને મોકલી હતી. જેમાં નીચે મુજબની સંવેદનશીલ બાબતો સામેલ હતી:

ફાઈટર જેટ્સની મુવમેન્ટ અને લોકેશન

મિસાઈલ સિસ્ટમ્સની ગોઠવણીની વિગતો

એરફોર્સના ઉચ્ચ અધિકારીઓ અને કર્મચારીઓની અંગત માહિતી

ભારતીય સિમ કાર્ડનો ઉપયોગ કરીને પાકિસ્તાની હેન્ડલર્સ માટે સોશિયલ મીડિયા એકાઉન્ટ બનાવી આપવા

કાયદેસરની કાર્યવાહી : 

રાજસ્થાનના જયપુરમાં આરોપી વિરુદ્ધ 'ઓફિશિયલ સિક્રેટ્સ એક્ટ, 1923' અને 'BNS એક્ટ, 2023' હેઠળ ગુનો દાખલ કરવામાં આવ્યો છે. 22 માર્ચના રોજ તેની વિધિવત ધરપકડ કરીને સેન્ટ્રલ ઈન્ટરોગેશન સેન્ટરમાં તેની સઘન પૂછપરછ કરવામાં આવી રહી છે. પોલીસ હવે એ તપાસી રહી છે કે આ નેટવર્ક સાથે ભારતના અન્ય કયા કયા લોકો જોડાયેલા છે.