પંજાબના સનૌર વિધાનસભા બેઠક પરથી આમ આદમી પાર્ટી (AAP)ના ધારાસભ્ય હરમીત સિંહ પઠાનમાજરાને પટિયાલા પોલીસે એક ગુપ્ત ઓપરેશન દ્વારા મધ્યપ્રદેશના શિવપુરી-ગ્વાલિયર પટ્ટામાંથી ઝડપી લીધા છે.
ધારાસભ્ય સામે બળાત્કાર, છેતરપિંડી અને જાનથી મારી નાખવાની ધમકી આપવા બદલ એફઆઈઆર નોંધવામાં આવી હતી, ત્યારથી તેઓ પોલીસને હાથતાળી આપી રહ્યા હતા.
7 મહિના બાદ પોલીસના હાથમાં
ધારાસભ્ય પઠાનમાજરા ગત 2 સપ્ટેમ્બર 2025થી ફરાર હતા. લાંબા સમય સુધી હાજર ન થતા અદાલતે તેમને ભગોડા જાહેર કર્યા હતા અને તેમની સામે લુકઆઉટ નોટિસ પણ જારી કરવામાં આવી હતી. પટિયાલા એસએસપી વરુણ શર્માના જણાવ્યા અનુસાર, પોલીસની 5થી 6 ટીમો સતત તેમની પાછળ હતી.
આખરે આંતરરાજ્ય ઓપરેશન હેઠળ તેઓ અને તેમના ત્રણ સાથીઓ સ્કોર્પિયો કારમાં મુસાફરી કરી રહ્યા હતા ત્યારે પોલીસના સકંજામાં આવ્યા હતા.
સમગ્ર મામલો:
ધારાસભ્ય હરમીત સિંહ સામે એક મહિલાએ લગ્નની લાલચ આપી બળાત્કાર ગુજારવા અને છેતરપિંડી કરવાનો ગંભીર આક્ષેપ કર્યો હતો. આ ફરિયાદ બાદ પંજાબના રાજકારણમાં ગરમાવો આવ્યો હતો. ધારાસભ્ય ભૂગર્ભમાં ઉતરી જતા વિપક્ષોએ પણ સરકાર પર આકરા પ્રહારો કર્યા હતા.
ધરપકડ બાદ પોલીસે તમામ આરોપીઓને પટિયાલા લાવવાની કાર્યવાહી પૂર્ણ કરી છે. આજે તેમને પટિયાલાની કોર્ટમાં રજૂ કરવામાં આવશે, જ્યાં પોલીસ પૂછપરછ અને તપાસ માટે તેમના રિમાન્ડની માંગણી કરશે. એસએસપીએ ઉમેર્યું કે, આ મામલે કાયદા મુજબ કડક કાર્યવાહી કરવામાં આવશે અને અન્ય પાસાઓની પણ તપાસ ચાલુ છે.
ધારાસભ્ય હરમીત સિંહ પઠાનમાજરા ભૂતકાળમાં અન્ય વિવાદોના વમળમાં પણ જોડાયેલા હતા. હરમીત સિંહ પઠાનમાજરા માત્ર આ રેપ કેસમાં જ નહીં, પરંતુ અગાઉ પણ અનેક વિવાદોમાં રહી ચૂક્યા છે:
બીજી પત્ની સાથેનો વિવાદ અને વાયરલ વીડિયો
2022માં પઠાનમાજરા ત્યારે ચર્ચામાં આવ્યા હતા જ્યારે તેમની બીજી પત્નીએ તેમની સામે ગંભીર આક્ષેપો કર્યા હતા.&nbsp;પત્નીએ સોશિયલ મીડિયા પર તેમના અંગત જીવનના કેટલાક વીડિયો અને ફોટા વાયરલ કર્યા હતા, જેના કારણે તેમની રાજકીય છબીને મોટું નુકસાન થયું હતું.
તેમની બીજી પત્નીએ એવો પણ દાવો કર્યો હતો કે હરમીત સિંહે તેની સાથે લગ્ન કરતા પહેલા પોતાની પ્રથમ પત્ની સાથેના છૂટાછેડા અંગે જૂઠું બોલ્યા હતા. આ મામલે પણ પટિયાલામાં પોલીસ ફરિયાદની અરજી થઈ હતી.
જ્ઞાતિ વિષયક ટિપ્પણીનો વિવાદ
પઠાનમાજરા પર એક ઓડિયો ક્લિપ વાયરલ થયા બાદ અમુક જ્ઞાતિઓ વિરુદ્ધ અપમાનજનક શબ્દો વાપરવાનો પણ આરોપ લાગ્યો હતો, જેનો સ્થાનિક સ્તરે વિરોધ થયો હતો.
બજેટ સત્રમાં ગેરહાજરી અને ભગોડા જાહેર થવું
છેલ્લા 7 મહિનાથી ફરાર હોવાને કારણે તેઓ પંજાબ વિધાનસભાના મહત્વના સત્રોમાં પણ ગેરહાજર રહ્યા હતા. અદાલતે વારંવાર સમન્સ મોકલવા છતાં હાજર ન થતા તેમને 'ભગોડા' (PO) જાહેર કરવામાં આવ્યા હતા, જે એક ધારાસભ્ય માટે અત્યંત શરમજનક સ્થિતિ ગણાય છે.
પઠાનમાજરાની ધરપકડથી વિપક્ષોને 'આપ' સરકારને ઘેરવાનો મોકો મળી ગયો છે. વિપક્ષો આરોપ લગાવી રહ્યા છે કે પંજાબમાં કાયદો અને વ્યવસ્થા કથળી રહી છે અને સત્તાધારી પક્ષના નેતાઓ જ ગંભીર ગુનાઓમાં સંડોવાયેલા છે.

AAPના હરમીત સિંહની MPથી ધરપકડ

રેપ અને છેતરપિંડીના આરોપમાં પટિયાલા પોલીસે હરમીત સિંહને મધ્યપ્રદેશના શિવપુરીથી દબોચ્યા..

March 25, 2026 | 13:32 IST